ھزدار ءَ لوگ پہ لوگ ءَ سرکنوکیں نشہ باپاری دزگیر کتگ – پولیس

ھزدار پولیس ءَ لوگ پہ لوگ ءَ سرکنوکیں نشہ باپاری دزگیر کتگ –

دی بلوچستان پوسٹ

سربیتگیں ھالانی رِد ءَ بلوچستان ءِ دمگ ھزدار ءَ دمگی پولیس ءَ لوگ پہ لوگ ءَ سرکنوکیں ھیروین، چرس، کرسٹال ءِ نشہ پاپاری ھما وھد ءَ دزگیر کتگ کہ آ لوگ پہ لوگ ءَ نشہ سرکنگ ءَ بوتگ –
پولیس ءِ بنشون ءِ رد ءَ ھزدار ءِ پولیس ءِ دمگی ایس ایچ او منیر عالم جتک، سی آئی اے انچارج مقبول احمد موسیانی، اے ایس آئی زاھد مُستپا ءَ ھوار دگہ پولیس کارمندانی ھواری ءَ نشہ باپاری کنوکانی بگیری ءَ گامگیج زرتگ ءُ نشہ باپاری کنوکیں کتکار سناءاللہ خدارانی دزگیر کتگ ءُ بندیگ کرتگ –

پولیس بنشون ءِ گوشگ اِنت سنا اللہ خدارانی لوگ پہ لوگ ءَ نشہ باپاری کنگ ءَ بیتگ ءُ ھمک لوگاں آئی ءَ چیریں رنگے ءَ چرس، کرسٹال ءُ ھیروین سر کرتگ ءُ چاگرد ءَ نشہ آماچی ءَ شنگ کنگ ءَ بیتگ –

زانگ بہ بیت بلوچستان ءِ جتائیں جاھاں چاگردی ءُ سیاسی مردمانی گوشگ اِنت نشہ باپاری کنوکانی پُشتگیری ءَ سرکاری دست ھوار اَنت –

ھمے وڑ ءَ گوست ءَ بلیدہ ءَ ھوار کیچ ءَ نشہ باپاری ءِ ھلاپ ءَ روانک ءُ زھرشانی کنگ بیتگ –

ھمے وڑ ءَ ھمے سال ءِ فروری ءِ ماہ ءَ سمیع اللہ مینگل نشہ باپاری کنوکاں تیرگواری کرتگ ءُ کُشتگ، سمیع اللہ مینگل ءِ کوش ءِ بگیری ءَ زھرشانی کنگ بیتگ اَت ءُ آئی ءِ کوشکارانی گرگ ءِ لوٹ کنگ بیتگ اَت-

ھمے وڑ ءَ گوستانک ءَ ھزدار ءَ داں شال ءَ پند ءَ نشہ باپاری ءِ ھلاپ ءَ روانک کشگ بیتگ –