نبشتانک: 13نومبر راجی شهیدانی روچ
نبشتہ کار: زھیر بلوچ
دی بلوچستان پوسٹ
“هون پُلگُدیں بچانی ریچ اَنت
گُلزمین بانوری سِترے پوش اِیت”
بلوچ گُلزمین دائم زوراک ءُ زورگرانی چمے چیر ءَ بوتگ ءُ انگت استیں 1839 ءَ وهدے نواب مهراب هان ءَ زورگریں انگریز ءِ دیم ءَ وتی سر ئِے جھل کنگ ءِ بدل ءَ چو کوه ءَ مِک بیت ءُ گوں وتئی همرایاں وتی گُلزمین ءِ پھازگ ءَ پہ وتئی سرانی دیمونی ءَ دنت گُرا هما وهد ءَ انگریز ءَ هوار سرجمیں دگنیا اوں زانت کہ بلوچ هجبر زوراک ءِ دیم ءَ وتی سر ءَ جھل نہ کنت ءُ دست ء وت وتی ڈیهہ ءَ زوراکانی دست ءَ نہ دنت ءُ وت ءَ را جدا دپتر ءِ تاکانی تھا پولنگ نہ کنت ۔
داں هما روچ ءَ بِگر روچ ء مروچی همک روچ بلوچ پُسگ چو نواب مهراب هان ءِ وڑ ءَ وتی گُلزمین ءَ چہ بداں رکینگ ءِ جُھد ءَ اَنت ءُ همک روچ چو نواب مهراب ءِ وڑ ءَ وتی سالونکیں سرانی دیمونی دیگ ءَ انت اے گپ راست انت کہ مردُم مرانت گار بنت بلے اے گپ اوں راست انت کہ پہ وتی گُلزمین وتی نَّنگ ءُ ناموس پہ وتی دود ءُ ربیدگاں پہ ندر بوهگ ءَ مردم ابدمان بیت داں بلوچ راجدپتر ھست انت اے پُلگدیں شهید ھست انت ءُ بلوچ ءِ همک پدریچ پہ وتی شهیدانی سر ءَ پهر بند اِیت ۔
13 نومبر هما روچ انت کہ مارا سِکین دنت کہ ما گُلام ایں ما زیردستیں راجیں ءُ مارا پہ وتی گلزمین ءِ آجوئی ءَ پہ وتی ساه ءُ سرانی دیمونی دیگ لوٹ اِیت ۔
مروچی همیں شهیدانی رتکگیں هوناں مارا اے مارشت داتگ مارا همیں شهیدانی رتکگیں هوناں اے کازماس ءِ تھا یک زندگیں راجے ءِ بستار ءَ زندگ بوهگ ءِ سکین داتگ ۔ دگنیا اوں زانت کہ بلوچ پہ وتی ڈیهہ ءِ هاتر ءَ ندر بوهگ زانت وتی لج ءُ ننگ ءِ پھازگ ءُ وتی دود ءُ ربیدگانی پھازگ ءَ زانت ۔
مارا ناں ایوک ءَ 13نومبر ءَ وتی راجی شهید یات کنگی انت بلکیں مارا گوں وتی شهیدانی رتکگیں هوناں گوں مسام کنگی انت کہ ما اوں همے شهیدانی گیچین کُتگیں کِشک ءَ جُنزان بہ ایں اے هما کِشک انت کہ هزاراں بچ گوں آجوئی ءِ واهگ ءَ نمیران بوتگ انت مارا وتی شهیدانی واهگ سرجم کنگی انت مارا وتئی شهیدانی کِشک مُرادانی منزل ءَ سر کنگی اِنت-
زورگریں اِستان همک روچ بلوچ راج ءِ سر ءَ وتی زوراکیاں گوں تُرندی ءَ گیش کنان انت همک روچ مات گهارانی ازت ءَ لگتمال کنگ ءَ انت همک روچ تنگوئیں بچاں بیگواه کنگ ءَ میتگ ءُ گِساں ماندارگ ءَ انت ۔ مروچی پہ بلوچ ءَ هچ پد منتگ ابید ءِ وتی راجی آجوئی ءِ جنگ ءَ چیاکہ بلوچے بدواه بلوچ ءَ هچ وڑ ءَ زندمانی کنگ ءَ نیل ایت پمشکا مروچی شهید ریحان جان ءِ وڑیں بچ کسانیں اُمبر ءَ وتا پہ گُلزمین ءَ ندر کنت مروچی شهید ھمل جان ءُ شهید سلمان جان ءَ هوار اے دگہ هزاراں بچ گوں بچکندے وتی سالونکیں سرانی دیمونی ءَ دے اَنت-
مارا پهر انت وتی ماتانی سر ءَ کہ پہ وتی راج ءُ گلزمین ءَ وتی سالونکیں بچان ندر کنگ ءَ انت ۔
وتی شهیدانی رتکگیں هوناں یات بکن اِت اے هما بچ اَنت کہ اشاں وتی زند سرجمیں واهگ پہ گلزمین بَبا داتگ انت وتی زند ءِ دراھیں وشیاں چہ سرگوستگ انت پہ وتی راج ءب آجوئی ءَ گوں بچکندے مرگ امباز کُتگ ۔
مارا وتی شهیدانی پِکر ءُ پلسپہ ءِ رِد ءَ وتی زند گوازینگی انت
دانکہ وتی شهیدانی مُراد ءُ آجوئی ءِ منزل ءَ سر بہ ایں ۔
سُهریں دُروت بلوچ راجی شهیداں
بلوچستان آجو بات
بلوچ راج ھستت بات ۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔