پنجگور ءَ پاکستانی پوج ءِ چوکی ءِ سر ءَ اُرش، اُرش ءِ زمّہ واری بی آر اے ءَ منّ اِتگ

دمگی پولیس ءَ یکرندے پد ءَ مکن کن ایں کہ آ جھد کارانی دیم ءَ اڑاند مہ بنت ۔ بیبگر بلوچ

دی بلوچستان پوسٹ

ٹی بی پی پتر ءَ سربوتگیں ھالانی رِد ءَ گوستگیں روچ ءَ ناشُناسیں سلاہ بندیں مردمان پنجگور ءِ دمگ ایساھی پیزک چار راھے سر برجاھیں پاکستانی پوج ءِ چوکی ءِ سر ءَ اُرش کُتگ، اُرش ءِ آسر ءَ پاکستانی پوج ءَ جانی ءُ مالی تاوان رس اِتگ – سلاہ بندیں مردم درآھگ ءُ رؤگ ءَ سوبین بوتگ انت –

دومی نیمگ ءَ بلوچ راجی آجوئی لوٹوکیں گل بلوچ ریپبلکن آرمی ءِ جارکش بیبگر بلوچ ءَ رسانکدراں وتی شنگ کرتگیں درشان ءِ تہ ءَ اے اُرشے زمّہ واری منّ اِتگ ءُ گوشتگ کہ مئے سرمچاراں زیکیں بیگاہ ءِ ادار ھپت ءَ پنجگور ءِ دمگ اِیسّاھی پیزُک چار راہ ءِ نزیک ءَ برجاھیں پاکستانی پوج ءِ چوکی ءِ سر ءَ ھما وھد ءَ اُرش کتگ وھدیکہ پوجی کارمند چہ چوکی ءَ ڈَنّ نندوک بوتگ اَنت۔ اے اُرش ءَ کسان ءُ مزنیں سِلاہ کارمرز کنگ بوتگ انت، اُرش ءِ آسر ءَ پوج ءں یک کارندھے مرتگ ءُ یکے زدگ بوتگ-

جارکش ءَ دیمتر ءَ گوشتگ کہ اُرش ءَ پد دمگی پولیس ءَ سرمچارانی رَندگیری کرتگ ءُ آھانی سربندی کنگ ءِ جھد کُرتگ پمیشکا مئے سرمچاراں پولیس ءِ سر ءَ تیر گواری کتگ- آئی ءَ گوشتگ کہ مئے اے پَسّوی تیرگواری ءِ مول ءُ مراد بس آھانی مکن کنگ بوتگ پہ ھمے ھاتر ءَ تاوان دیگ نہ بوتگ اَنت کہ بلوچ بوتگ انت –

جارکش بیبگر بلوچ ءَ گوشتگ کہ اگاں دمگی پولیس ءَ چوشیں رَدیں کاراں وتی دست نہ داشت اَنت ءُ سرمچارانی بگیری کت گڑاں ما لاچار بئیں کہ آھانی بگیری ءَ ترندیں گامگیج چِست بہ کن ایں-

گڈسر ءَ بی آر اے ءِ جارکش ءَ وتی درشان ءِ تہ ءَ گوشتگ کہ مئے چوشیں کار داں یک آجوئیں چاگردے جوڑ کنگ ءَ برجاہ مان انت –