شال: پولیس ءِ تیرگواری، رھگوزی ءِ زدگ

دی بلوچستان پوسٹ

بلوچستان ءِ بنجاھی شھر شال ءَ پولیس کارمندے ءِ تیرگواری ءَ پرپٹ ءَ سواریں رھگوزی ءِ زدگ بیتگ –

ٹی بی پی ءِ اھوالکار ءِ رد ءَ وئیل شال ءِ دمگ زرغون دگ ءَ فلائی اوور ءِ نزیک ءَ پیش اتکگ کہ اود ءَ پٹ ءُ پولی بنجل ءَ جاڑیگیں سپاھیگ ءَ تیرگواری کرتگ – تیرگواری ءِ آسر ءَ سرکی دگ ءِ جھمنندیں مردمے زدگ بیتگ –

ریسکیو کارمندانی رد ءَ زدگ بیتگیں مرد ءِ سرین ءَ تیر لگ اِتگ ءُ پد ءَ ٹراما سینٹر ءَ برگ بیتگ –

پولیس ءَ ٹاہ داتگ ءُ گوشتگ پَٹ ءُ پولی بنجل ءَ کارمند ءَ جتگیں مردم ءِ جَلگ ءِ پرمان کرتگ بلے پَرپٹ سواریں مردم نہ اُشتاتگ تیرگواری کنگ بیتگ –

ھمے سال ءِ فروری ءَ ھمے وڑیں تیرگواری ءِ وئیلے ءَ شال ءَ پرنس دگ ءَ یک مسیتے ءَ پیش اتکگ –

بیتگیں وئیل ءَ پولیس ءِ کارمند ءِ تیرگواری ءِ آسر ءَ شال ءِ جھمنندیں بیست ءُ پنچ سالی ئیں سردار ولی بیران بیتگ اَت -وئیل ءَ پد تیرگواری کنوکیں کانسٹیبل مھدی دزگیر کنگ بیتگ کہ آئی ءِ سر ءَ کیس کنگ بیتگ بلے لوگ ءِ سرپرست سردار ولی ءِ کھول سرکار ءَ کمک ءِ دزبندی کنگ ءَ اَنت –