آزمانک: ھمراہ
آزمانکار: ھیرجان کدیر
دی بلوچستان پوسٹ
ماہ سک ڈولدار اَت من ماہ ءِ دیم ءَ نشت آں ماہ ءَ چارگ ءَ اِت آں ، منی گْوانکو ءَ استاد منھاج ءِ سوتے پِر اَت ءُ ویرُک منی گوش ءَ اِتاں ، من ءُ ماہ ھم نیاد ءُ ھم دیوان اِت اِیں پرچا کہ ھمک ماھکانیں شپاں من الم ماہ ءِ دیم ءَ ننداں ءُ آئی ءَ دل ءِ سیر ءَ چاراں ، ماہ ءِ زیبائی ءَ دل ءَ جاگہ کتگ۔ نہ زاناں اے چونیں ھاترے ءُ کئی دروشم ءَ جنت ۔
اے شپ ءَ من ءُ ماہ ءُ استاد منھاج سوت ھم دیوان اِتیں کہ داں گش ئے ماہ ءَ چہ روژناتریں نورے منی دیم ءَ اتک آئی ءَ گُش ئے شپ ءَ را وتی کُت ،ماھکانی آئی ءِ دیم ءَ ھما کندیل ءِ پیم ءَ بوت کہ آسے گندئے مِرمِرانکو بہ بیت ، اے روژنائی ءَ شپ ءَ را چو شِیر ءَ کُت گوں وتی نور ءَ آ اتک ءُ منی کَش ءَ نِشت ءُ منی گْوانکو ءِ سوت ئِے بند کُت من ھیرانی ءَ گون آئی ءَ چارگ ءَ اِتاں گش ئے کہ منی جان ءَ زِکِت مان نیست کہ من کمو بہ کنزاں چہ آئی ءَ ، ھمے دمان ءَ منی دست ئِے زُرت ءُ وتی دل ءِ سر ءَ ایر ئِے کُرت ءُ گُشت ئِے : اے دل ءِ دْریکّگانی ساز ءَ سما کن منی دست آئی ءِ دلبند ءِ سر ءَ ایر اَت ءُ من وتی چم نزّ کُت اَنت داں آئی ءِ دل گش ئے سک دْریکّگ ءَ اَت ءُ من ءَ انچو گُمان بوت کہ چہ ایشی ءَ وشتِریں زیمر من وتی زند ءَ سما نہ کُت ءَ ، من ءَ انچیں سُرورے بکشگ ءَ اَت –
مروچی من انچو مارگ ءَ اِتاں کہ دل ھم پہ یکے ءَ ساز جنت ۔ دل ءِ ساز گوشاں اِش کنگ نہ بیت بلکیں چہ دل ءَ مارگ بیت ۔من چم پچ کُرت اَنت آ منی دیم ءَ نشتگ اَت ءُ ماہ ءَ چارگ ءَ اَت ، گپ نہ کُت ما ھر دوئیناں ، من ھم آئی ءِ ھوری ءَ گوں ماہ ءِ چارگ ءَ لگّ اِت آں ، منی دست انگت آئی ءِ دلبند ءِ سر ءَ اَت ءُ داں اچانک ءَ آئی دپ ءَ دراتک ۔ماہ تئی چھرگ ءَ جنت ۔
اے گپ ءِ اِش کنگ ءَ من وتی چم جھل کت اَنت گش ئے من ءَ لج کنگ ءَ اَت من وتی سر جھل کتگ۔ آئی ءِ شیرکِنیں توار ءَ اِش کنگ ءَ اِتاں ، آئی ءَ پد ءَ گُشت ماہ ءَ مدام گون وتی دل ءِ چم ءَ بہ چار ھمے کہ ایوک بہ ئے بیا ماہ ءِ دیم ءَ بہ نند گپ بہ جن وتی دل ءِ دْرستاں کشَ ، ما تئی وتی جند اِنت ، وت دوست دار من ءَ چونائی ءَ تو چو ساہ ءَ دوست ئے ۔۔۔ ھاموشی ءَ مان شانت۔ داں دیر ءَ ھچ ئِے نہ گُشت ، من سر چست کُت داں منی کش ءَ کس نیست اَت ۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔