کیچ ءَ پوجی لشکر کشی برجاہ

دی بلوچستان پوسٹ

سر بیتگیں ھالانی رد ءَ کیچ ءَ پوجی لشکر کشی برجاہ ءُ راہ در پوج ءَ بستگ اَنت –

اھوالکار ءِ کیچ ءِ دمگ دشت مزنبند ءِ کوھی دمگ گوستگیں چار روچاں پاکستانی پوج ءِ لشکر کشی برجاہ اِنت ءُ پوج ءَ راہ ءُ در بستگ اَنت-

اھوالکار ءِ رد ءَ زمینی پوج ءِ کمک ءَ برزی بالگرد ھم گون اَنت ءُ بازیں جاھاں تیرگواری اش ھم کرتگ –

زانگ بہ بیت بیست ءُ نُھ ستمبر ءِ بیگاہ ءَ پوج ءَ مزنبند ءِ کوھی لشکر کشی کنان ءَ جنگ ءُ چوپ بیتگ کہ چریشی ءَ دو سرمچار جنگ ءَ جنگ بیتگ اِت اَنت –

دومی نیمگ ءَ بلوچستان لبریشن فرنٹ ءِ جارکش میجر گوھرام بلوچ ءَ وتی شنگ کرتگیں درشان ءِ تہ ءَ گوشتگ اَت کہ گوستگیں روچ ءَ دشت مزنبند ءِ کوھی دمگاں پاکستانی پوج ءُ گل ءِ سرمچارانی میان ءَ جنگ ءُ چوپ بیتگ کہ چریشی ءَ گل ءِ دو سرمچار کپٹن عرفان جھمنند کنشکلات ءُ سکینڈ لیفٹینٹ نورخان جنگ ءِ میان ءَ شھید بیتگ اَنت ءُ اے جنگ ءَ پوج ءِ پانزدہ کارندہ ءَ گیش کُشتگ بیتگ اَنت –

اھوالکار ءِ رد ءَ گوستگیں روچ ءَ دشت ءُ تمپ ءِ میانی دمگ مزنبند ءَ جنگ ءَ نمیران بیتگیں سرمچارانی لاش پوج ءَ دست گپتگ ءُ تمپ ءَ پوجی بنجل ءَ برتگ اَنت –

اھوالکار ءِ گوشگ اِنت کہ گوستگیں روچ ءَ ھم نمیرانیں سرمچارانی کھول لاشانی رند ءَ شتگ اَنت بلے پاکستانی پوج ءَ نداتگ اَنت –

مروچی ھم نمیرانیں سرمچارانی کھول شتگ اَنت بلے تنی وھدی پوج ءَ لاش نہ داتگ اَنت –

اھوالکار ءِ رد ءَ نمیران بیتگیں سرمچارانی کھولانی گوشگ اِنت اگاں پوج ءَ لاش نہ دات اَنت گڑا زھرشانی کنگ ءَ لاچار بہ ایں-