بیست ءُ چار ھزار لبز ءَ بُرز لبز اے لبز بلد ءَ ھوار اَنت ءُ انگت گیشتر ھوار گیجگ بیت۔
دی بلوچستان پوسٹ
ٹی بی پی ھال پتر ءَ سر بیتگیں اھوالانی رد ءَ دی بلوچی ڈاٹ کام تند جاہ ءِ نام ءَ یک آنلائن بلوچی لبز بلد ءِ اڈ کنگ بیتگ کہ اِشی ءِ تہ ءَ بلوچ کواس ڈاکٹر نصیر دشتی ءِ لبز بلد ءِ آنلائن دروشم ھوار اِنت۔
بلوچی ڈکشنری آنلائن دروشم ءَ کار کنت ءُ مردماں بلوچی انگلش ءُ انگلش بلوچی گالانی درگیجگ ءَ ھوار زبان ءِ دگہ بازیں پڑانی باروا ھم کمک کنت۔ ڈکشنری ءِ تہ ءَ ھواریں ھاسیں بھرانی تہ ءَ Part of Speech گال تَھر، Origin of Words لبزانی بنزہ ، Vowel کشّاب ءُ Consonant جواناب ھوار اَنت۔
بلوچ زبان گوگل ٹرانسلیشن تندجاہ ءَ نہ بوگ ءِ سوب ءَ باز رند ءَ چاگردی رسانکدرانی تندجاہ گندگ بیتگ اَنت کہ بلوچ ادبی جھدکار ءُ ورنائیں نودربرانی ھمے واھگ بیتگ کہ بلوچی زبان گوگل ٹرانسلیشن ءِ تہ ءَ ھوار بہ بیت۔
ھالانی رد ءَ بازیں مردماں اے تندجاہ ءَ یک جوانیں بندات ءِ پہ دراجیں پند ءَ نامینگ ءَ اَنت۔ مردمانی رد ءَ اگاں چُشیں آنلائن لبز بلد ءُ ایندگہ وانگی مواد آنلائن ایر بنت ءُ وانوکانی جوانیں کساسے ھم بیت گُڑا آ روچ دور نہ اِنت کہ بلوچی زبان گوگل سرچ انجن ءِ بھر بیت ۔