نبشتانک: من جیڑ اِت
نبشتہ کار: فضل شیر بلوچ
دی بلوچستان پوسٹ
رسول ھمزہ وتی کتاب میرا داغستان ءِ تہ ءَ جاگھے ءَ گْوش ایت، “وتی ھیال ءُ جیڑگاں مہ ڈبّ اِت چیر مہ دے اِت، اگاں شما اے پئیم کت گڑا بیھیال بہ بہ اِت کہ اے کجا ایر کتگ انت-
پد ءَ اوں گْوش ایت کہ وتی ھیال ءُ جیڑگاں دگر ءِ دست ءَ مہ دے ات، چکان ءَ پہ لئیب ءُ گوازی ءَ لئیبوک ءِ جاگہ ءَ وتی گرانبھائیں ءُ نازرکیں چیز دیگ نہ لوٹ اِیت، چک آئی ءَ باھین ایت، پروشیت، یا وتی جند ءَ زدگ ءُ ٹپیگ کنت-
من یک برے جیڑ اِت، دل ءُ دیدگاں گْوشت کہ اے توامیں شنگ ءُ شانگیں ھیال ءُ جیڑگاں نزّآر یک گُلدانے بکن آں، پد ءَ جیڑ اِت، گلدان ءِ ھواری ءَ یک آسیں ساوڑے بکنان اش داں وانوک ءُ پھموک وشبوھانی ھمراھی ءَ آسیں ساوڑ ءَ اوژناگ کت بکن انت-
من جیڑ اِت کہ منی ماتیں گلزمین ءِ ھشیمیں ماتکوھانی باتن ءَ رأستگیں ھمک میزریں کاہ ءُ بوچ ءَ وت ءَ لھم کتگ ءُ منی پادانی دیم ء وت ءَ چیر گیتکگ اِت اَنت، ھمک ھجگیں گواڈگ ءَ اچ کرومگ ءَ سرکش اتگ منی وش اتک ءَ وتی مھلبیں بوہ ءَ شنگ ءُ تالان کنگ ءَ اَنت، مسکیں ھاک ءَ منا وتی کراربکشیں امبازاں زرتگ ات، ھمک درچک ءُ دار شیشار، تلنمب ءُ کرود، ڈوک ءُ ڈالبار ءَ وتی نودشنزیں ساھگ دستانی دل ءَ کتگ ات منی گامانی دیم ءَ ساھیل ات، مھلبیں سرگوات گوں وتی بانزلاں منی دیم ءَ نرم نرم ءَ گوات کنان ات، شھدشنزیں ھوٹگانی زم زمیں آپ ءِ پنژاراں منی اندر ءِ ھوشام پروشتگ اَت ءُ من ءَ ابدی سیرآپ کتگ ات، کبگ ءُ سیسیگاں پہ منی وشنودی ءَ کوھسراں شادھانی زیمر ساز کتگ ات انت، سید ءُ آھوگ منی راھچار ات اَنت، شانتل ءُ کپوتاں کوکوآنی بے آسریں درچے بندات کتگ ات، ژیمبیں گر ءُ رگ لیٹیں کنڈگاں تلاھیں پترے تالان کتگ ات، ھمک ساہ دیوک ءُ مزارباھندیں ھمبل منی راستیں باسک ات اَنت، وت ءَ دیمھونی کناں ءُ من ءَ رکیناں ات اَنت، چی ءَ کہ من پہ ایردستیں ءُ زدگیں راج ءَ پند جنگ ءَ ات اَنت، منی زند ءُ مرگ گوں ھاک ءَ بندوک ات، منی الماسیں پگر ءَ من ءَ اچ ایدگہ لس مھلوک ءَ یک جتائیں نام ءُ پجارے داتگ اَت، من ء راج ءِ تُپک بڈا ات، ھما توپک کہ آئی ءِ نَل ءَ چے دراتکگیں ھمک گونڈلیں تیر ءِ توار منی راج ءَ یک رژنائیں بانداتے ءِ مستاگ ءَ دیگ ءَ ات، ھما تُپک کہ آئی ءں میگزین ءَ ساھگریں تیر ءُ ھجگیں پل ھوار ات انت، بلے مروچی من ھما ھمک ءَ چے دور یک تھنائیں کوٹی ءَ نشتگاں ءُ سگریٹ ئِے روک کناں ءُ سگریٹ ئِے کُش آں، وتی جند ءَ جیڑگایاں، وتی باتن ءِ ژند ءُ پندیں مردم ءَ جست گرگ ءَ آں، دائم جُتک ءَ بندیگیں سگار (زھم) ءِ آپ نہ مانیت، ءُ دائم بوپ ءُ بکملاں وپسوکیں شھسوار وتی چست ءُ چالاکی، زھم جنی ءِ رپک ءُ رھبنداں چے شمشکار بیت-
من نوں اچ وتی جند ءَ چے سر آیگ ءَ نہ آں، وت ءَ گوں انچو مانگیشتگ آں، من ھمینچو وت گیشینگ ءِ جھد ءُ کوششت ءَ بکن آں گیشتر ماں گیش آں، من ترا گْوش آں تئی ڈوڈک ءِ شیر ترپش انت، تو من ءَ گوش ئے تئی ھینزک ءِ شیر ترپش انت، چش نہ بیت، کسہ مان اَنت، کسہ کنوک مان انت، راستی ھچبر ریدگیں ریزاں بندیگ کنگ نہ بیت، چی ءَ کہ ماتیں گلزمین ءِ ھشیمیں ماتبند کہ منی النگیں سنگر اَنت، منی کوھیں کلات انت، جناوریں دژمن ءِ ھمک رنگیں بمب ءُ ٹوپ وتی ڈوبر ءَ سارت کت انت من ءَ گوں تمردیں ھمراھاں رکینت، من مرچی چہ آئی ءِ ابدی تاھیربکشیں زانسراں دور یک ویرانیں کوٹی ءَ کپتگ ءُ وتی زات ءَ گوں بند ءُ گلائیش آں، کول ءُ مسام ھمے کتگ ات کہ سرجمیں راج ءِ ڈبہ ءَ زوراں، منی زرد ءِ دریھکگ راج ءِ امانت انت، ھمک درتگ پچ ءُ پادشپاد ءِ سر ءِ سارتیں ساھگ باں، ھمک گیمرتگیں کاہ ءُ بوچانی تہ ءَ پروشیں گم ءُ اندوہ ءَ وتی کن آں، داں گڈی ساہ ءَ اچ وتی کول ءُ مساماں پدکنز نہ باں، بلے مرچی من وتی ماتیں گلزمین ءِ مھروانیں مات بنداں چے دور نشتگ ءُ وتی جند ءِ ٹک ءُ بولکاں چِنگ ءُ دپ ءَ دیگ ءَ آں، انچو آرام پسند بوتگ آں کہ ھما زھم جنیں ھمراھاں کہ وت ءَ دیمھون کتگ ءُ من ءَ رکینتگ اش، آھانی چک ءُ چوریگانی گژنگیں لاپ ءُ ھورکیں شکم ءِ سیاہ ماری پیچ ءُ تاب، انارکاں چے سوالیگیں آبلیں ارسانی نھنگیں ھار منی چماں گندگ نہ بنت، مات بنداں نشتگیں راجی مزن زھرگیں بامرداں چے شمشکاراں، بزاں من اچ وتی باتن ءَ مرتگاں، منی جیڑگ رمیزاں گپتگ ءُ کواپگ انت، انچو گْوش اَنت کہ پہ آشوبی ءُ جنگولیں بامرد ءَ گیشیں نندگ ءُ ایمنی آئی ءِ مرگ انت، من وت ءَ ھروچ تسلہ دے آں ءُ ریپین آں کہ چش نہ انت، بلے اگاں راستی ءَ سگگ ءِ ھاٹیگ بہ بیت انچش انت –
شاھین کاہ دیگ ءُ ھر گوشت دیگ گوں من نہ بیت، راست ءَ راست ءُ دروگ ءَ دروگ گشت کن آں –
دگہ جاگھے رسول ھمزہ گْوش ایت، “من یک آوار شائرے آں، منی دل ءِ بند ءُ ریشگاں (جھلانک) ءَ شھری زمہ واریانی مارشت کہ ھست انت آیانی ھد ءُ سیمسر تھنا داں آوارستان ءَ نہ انت، ءُ نا تھنا داں داغستان ءُ ناکہ داں سرجمیں ملک ءَ انت، من وت ءَ سرجمیں دگنیا ءِ دیم ء پسہ دیوک سرپد باں، اے بیستمی کرن انت، اے مارشت ءُ جیڑگاں ابید کس زندگ بوت نہ کنت-
ما فضل چو منزل ءَ بھ سر نہ بیں
چہ وتی راج ءَ کہ دیم ءَ زات بیت
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔