شال پی ٹی ایم ءِ رھشون دزگیر

پشتون تحفظ موومنٹ ءِ رھشون ءُ راجی پتر ءِ باسک محسن داوڑ شال ءِ بالی پٹ ءَ چہ دزگیر کنگ بیتگ –

دی بلوچستان پوسٹ

ٹی بی پی ھال پتر ءَ سر بیتگیں ھالانی رد ءَ بلوچستان ءِ بنجاھی شھر شال ءَ پشتون تحفظ موومنٹ ءِ رھشون ءُ راجی پتر ءِ باسک محسنداوڑ شال ءِ بالی پٹ ءَ دزگیر کنگ بیتگ –

ھمے درگت ءَ چریشی ءَ پیسر محسن داوڑ ءَ چاگردی رسانکجاہ ٹویٹر ءَ ٹویٹ کرتگ ءُ گوشتگ کہ من ءَ گوں منی ھمراھانی ھواری ءَ شالءِ پٹ ءَ داشتگ اِش ، چریشی ءَ پد محسن داوڑ سیکورٹی کارمنداں محسن داوڑ دزگیر کرتگ ءُ گوں وت برتگ-

زانگ بہ بیت پی ٹی ایم ءِ بنجاھی رھشون منظور پشتین ھم بلوچستان ءِ آیگ ءَ دارگ بیتگ ءُ بلوچستان ءِ سرکار ءَ پی ٹی ایم ءِرھشون محسن داوڑ نود روچ ءِ واستا ءَ بلوچستان ءِ آیگ ءِ بندش جتگ –

محسن داوڑ ءِ رد ءَ آئی ءِ نود روچی جتگیں بندش ھلاس بیتگ اَنت پرے ھاتر ءَ آ بلوچستان ءَ آیگ ءَ سرگپتگ –

اُستانی تھی کارانی گِر ءُ دار کنوک ءُ ٹکی سرکماشانی رد ءَ پی ٹی ایم ءِ ھردوکیں رھشوناں بلوچستان ءِ دراھیں دمگانی آیگ ءِ بندش جنگبیتگ –

ھمے درگت ءَ وائس فار بلوچ مسنگ پرسنز ءِ کسان کمک سرکماش ماما قدیر بلوچ ءَ وتی چاگردی رسانکجاہ ٹویٹر ءَ شنگ کرتگیں یکتامربندے ءَ محسن داوڑ ءِ دزگیر کنگ ایر جتگ ءُ گوشتگ کہ آئی ءَ سر ءَ بندش جنگ یک بژنیگیں ھالے کہ راجی پتر ءِ باسک بیگ ءَ ابیدھم آ دارگ بیگ ءَ اِنت –

ماما قدیر بلوچ ءِ گوشگ اِنت کہ محسن داوڑ بلوچستان ءَ گار ءُ بیگواھیں مردمانی واستا جتگیں بنجل ءَ آیگی بیتگ کہ آئی ءَ گْوشتگ کہ بنجل ءِتر ءُ تاب ءَ کن آں ءُ بیگواھیں بلوچانی کھولاں گوں پدردی درشان کن آں –

ماما قدیر بلوچ ءَ گْوشت کہ چریشی ءَ پیسر پی ٹی ایم ءِ رھشون منظور پشتین ھم بلوچستان ءِ آیگ ءَ دارگ بیتگ ءُ چریشی ءَ چہ زانگبیت سرکار ترسگ ءَ اِنت یا کہ یک انسانے ءَ دومی ءِ انسانی درداں ھوار بیگ ءَ ھم نیلگ ءَ اِنت –

ماما قدیر بلوچستان ءِ جاورھالانی سر ءَ جھانی ھکانی پانکجناں چہ لوٹ کرتگ ءُ گْوشتگ کہ آ بلوچستان ءِ جاورھالاں وت گندگ ءَ اَنتءُ آ باید اے نیمگ ءَ جوانی ءَ دلگوش بہ کن اَنت –