روکپتی بلوچستان ءَ ایرانی پولیس ءَ دوازدہ مردم دزگیر کرتگ

دی بلوچستان پوسٹ

سر بیتگیں ھالانی رد ءَ ایرانی پولیس ءَ روکپتی بلوچستان ءِ بنجاھی شھر زاھدان ءَ دوازدہ مردم دزگیر کرتگ ءُ ناشناسیں زنداناں برتگ اَنت –

اھوالکار ءِ رد ءَ بیست ءُ ھپت اگست ءَ زاھدان ءَ ایرانی پولیس ءَ حمید رضا کوھکن گوں یازدہ مردمانی ھمراھی ءَ آوار جتگ ءُ ناشناسیں زنداناں برتگ اَنت –

اھوالکار ءِ رد ءَ آوار جنگ بیتگیں مردمانی تہ ءَ ھپت مردم یلہ کنگ بیتگ ءُ حمید رضا کوھکن گوں دگہ چار مردمانی ھمراھی ءَ گار ءُ بیگواہ اِنت –

اھوالکار ءِ رد ءَ چیزے پیسر ھم کوھکن ءُ رئیسی ٹک ءِ لوگانی سر ءَ ھم پولیس ءَ بیڑ برتگ ءُ اود ءَ بازیں لوگانی دریگ ءُ دروازگ پُروشتگ اَنت ءُ جنین ءُ چُک کمشرپ کرتگ اَنت –

اھوالکار ءَ گْوشت کہ آوار جنوکیں مردم اسپیت پوشیں گُدانی تہ ءَ بیتگ اَنت ءُ لوگانی تہ ءَ دور اِش کرتگ ءُ حمید رضا کوھکن گوں ھمراھے یازدہ کس ءَ دزگیر کرتگ ءُ برتگ اَنت –

روکپتی بلوچستان ءَ انسانی ھکانی سر ءَ کار کنوکیں گل ءِ گوشگ اِنت کہ آ وار جنگ بیتگیں مردمانی تہ ءَ لھتے ھنچیں ھم ھوار اِنت کہ آیانی اُمر ھژدہ سال ءَ چہ کم اِنت ءُ تنی وھدی زانگ بیگ ءَ نہ اِنت کہ آوار جنگ بیتگیں مردم کجام زندان ءَ برگ ءُ بند کنگ بیتگ اَنت –

آیاں گوشت کہ اے مردماں دگہ سیاسی گلاں گوں ھچ سیادی نیست بلے دزگیر کنگ ءُ گار کنگ مردماں ابکہ کنت پولیس تنی وھدی ھچ گوشگ ءَ نہ اِنت –