شال ءَ نُھ روچ پیسر آوار جنگ بیتگیں جِنکو درگیجگ بیتگ، جرمکار دزگیر

دی بلوچستان پوسٹ

شال ءِ دمگ ریلوے کالونی ءَ چہ نُھ روچ پیسر آوار جنگ بیتگیں ھشت سالی ئیں لاریب یلہ کنگ بیتگ ءُ آوار جنوک دزگیر کنگ بیتگ –

ایڈیشنل آئی جی پولیس عبدالرزاق چمہ ءَ رسانکدراں گوں گپ کنان ءَ گْوشتگ کہ بیست ءُ چار اگست ءَ لاریب نامی ئیں جنکوے ناشناسیں پرپٹ سواراں لوگ ءِ نزیک ءَ آوار جتگ ءُ برتگ – ارزی نبشتہ کنگ بیتگ ءُ پَٹ ءُ پول بندات کرتگ پد ءَ سرپدی بیتگ کہ دمک ءَ بُٹ پالش کنوکیں مرد ءَ جنکو آوار جتگ –

آئی ءَ ٹاہ داتگ کہ سرپدی کنان ءَ اے مردے لوگ ءَ داں سر بیتگ اِنت ءُ شال ءِ دمگ ھزار گنجی ءِ نزیک ءَ دزگیر کرتگ، آوار جنوک ءَ جنکو یک دگہ لوگے ءَ چیر داتگ –

اے آئی جی پولیس ءَ گْوشت کہ جرمکار دوھزار ءُ پانزدہ ءَ ھمے وڑیں جرمے ءَ دزگیر بیتگ بلے وتی دہ سال ءِ سزایانی سرجم کنگ ءَ ابید پیسرا یلہ کنگ بیتگ –

جنکوے ءِ پت ءَ شال ءِ پریس کلب ءِ دیم ءَ زھرشانی کرتگ –