آزمانک /نہ شُناسیں بیم – کندیل مھر

نبشتانک: آزمانک /نہ شُناسیں بیم

نبشتہ کار: کندیل مھر

دی بلوچستان پوسٹ

تھاری ءَ شپ وتی امبازاں زُرتگ اَت۔ واب ءَ من ءَ پھک یل کتگ اَت، گوں من انچوش گِلگ دار اَت کہ ھچبر واتر مہ بیت۔
کساس ماهے ءَ منی چماں واب مان نیست اَت۔ دل ءَ باتن ءِ ندارگ دم بُرتگ اَت۔ گم ءِ دَریگ پہ من کوھنیں بانے ءِ زنگیں دَریگے ءَ یک ھساب ءَ پچ اَت ءُ گوات گماں مانروپگ ءَ اَت، زند ءِ پچیں کتاب ءِ تاکے ءِ سر ءَ اجب گونگیں، ملوریں ءُ بے چاڑیں کسھے نبشتہ اَت۔ وشی ءِ مُرگ ءَ پہ دائم ءَ بال کتگ اَت۔ گم ءِ جمبر سیاه ءُ تهار اَت۔
من ھمے میان ءَ دل ءَ جیڑ اِت کہ زند ءِ سپر کجام کشک ءَ اِنت, داں کدی ھمے ڈول بیت، نہ دل ھمرہ اِنت نہ باتن ھمسپر اِنت۔ بانزُل کسے ءَ سستگ ءُ مانبُریتگ اِت اَنت۔
من کہ چم شانک دات ءُ چارت، اُمیت ءِ بندیک بارگ تر بوان اَت۔
من اے اُمیت ءِ سپر بندات‌ کتگ باریں روچے منزل ءَ سر باں کہ ناں، منی سستگیں بانزُل دوبر رُد اَنت یا ناں، باریں منزل ءَ سر باں یا ناں۔؟
ھمک شپ ءِ وڑ ءَ من ءَ یک کاپی یے ءُ کلمے گون اَت گوں لبزاں سر ءُ چیر اِتاں، اناگہ من مار اِت کسے من ءَ دور ءَ چہ توار دیان ءُ پیداک اِنت۔
دیر نہ بوت اتک ءُ سر بوت۔
آئی ءِ کد نہ برز اَت نہ پٹک۔
آ نہ لاگر اَت نہ زنڈ-
آ انسان ءِ داب ءَ نہ اَت۔
من ءَ پجّا کار ئے؟ آئی ءَ جلّیں توارے ءَ جست کُت۔
من ترا دُرست نکناں، من پسّہ دات۔
آئی ءَ ٹھک دیان ءَ گشت، من ءَ بزان، تی کوھنیں ھمسپر ءُ ھمراہ آں۔
تو زان ئے تی وشّی ءِ مُرگ کَے ءَ بال داتگ اَنت؟
تی ھوش کَے ءَ بُرتگ؟
تئی دل ءَ کے ءَ کتگ اَنت؟ تئی دشمن ءَ کتگ اَنت؟
تئی باتن کَے ءَ ملور کتگ؟
تئی چمّانی پٹّی ‎کے ءَ بستگ؟
تئی بُود کَے ءَ پچ گپتگ؟
من ءَ پجّا بیار هاهاهاهاهاهاها۔
ھمے جُستاں گوں آ ٹھک دیان ءَ گوات ءَ گوں رپت گار بوت۔
من ءَ ترسے چیر کپت۔ ھِیداں منی بالاد سرجم ءَ شُشت۔ من پہ ترس ءُ لارز پاد اتکاں چم شُشت ءُ وتی سھڑینگ ءِ جھد کت، سارتیں گینے کش اِت ءُ جیڑ اِت۔
اے چے بلاھے اَت؟
منی مات ءَ گشتگ کہ من کسانی ءَ بال کتگ دور ماں مُرگانی رمّاں ھوار بوتگ آں۔
بیدے سواری ءَ دور دوریں پند جتگ۔
مستیں گْورماں ھوژناگ کتگ۔
دل گوات ءِ باھوٹ کتگ۔
بلے ھچبر بیم ءِ ارجان نہ بوتگاں۔
گڑا مرچی اے چونیں بیمے منی باتن ءَ ایر اتک؟ –

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔