نبشتانک: شھید ھیات مِرزا ءِ ھونیگیں ند
نبشتہ کار: سرباز وپاؔ
دی بلوچستان پوسٹ
اِلم بنی آدم ءِ سیمی چم اِنت ، اِلم بنی آدم ءَ یک شرّیں زانت ءُ زانگے بکشائیت ، اِلم بنی آدم ءَ شرّ ءُ ھراب ءِ پرکّ ءَ کشّ اِیت ءُ پیشداریت ۔ ھمے اِلم اِنت کہ بنی آدم ءَ ھِلار ءُ ھرام ءِ زانتے داتگ ۔ ھمے اِلم اِنت کہ گوں راج ءُ وتن ءَ مھر پرمائیت ۔ ھمے اِلم اِنت کہ بنی آدم ءِ زندمان ءَ آسودگی ءَ سر کنت ۔ ھمے اِلم اِنت کہ بنی آدم ءَ را چہ واجہ ھُدا ءِ آدگہ مھلوک جتا ءُ گِستا کرتگ ئِے ، اگاں بنی آدم ءَ را اِلم ءُ زانت نہ بوت گڑا آ چہ واجہ ھُدا ءِ آدگہ مھلوک بزاں گوں مال ءُ دلوت ءَ یک رنگ ءَ زانگ بوتگ اَت ۔
ھمے اِلم اِنت بنی آدم ءَ را چاگردی ءُ راجی کوتاھیاں نشان دنت ، ھمے اِلم اِنت بنی آدم ءَ پہ راجی چاگردی جیڑھانی گیش ءُ گیوار کنگ ءِ سکین ءَ دنت ، ھمے اِلم اِنت بنی آدم ءَ پہ راجی وشھالیں باندات ءَ جُنزگ ءُ جُھد کنگ پرمائیت ۔ ہر راجے کہ بہ بیت آئی ءِ ورنایانی سر ءَ اے پرز بیت پہ وتی وشھالیں آکبت ءِ ھاتر ءَ اِلم ءُ زانت ءَ در بہ بِہ بر اَنت ، چیا کہ نودربر راج ءِ باندات ءِ رُژنائیں چراگ اَنت ۔ وتی راج ءِ باندات ءِ رھشون اَنت ۔ ھما اِنت کہ پاکستان ءَ بلوچ وتن ءِ سر ءَ کْوزہ کُتگ ، ھما اِنت بلوچ راج ءِ ورنایاں چہ اِلم ءُ زانت ءَ دُور دارگ ءِ جھُد ءَ کنگ ءَ اِنت ۔
اے یک پدّریں گپّے کہ ما گندگ ءَ اِیں بلوچستان ءِ کُجام ھند ءُ دمگ بہ بیت، ناشرکاریں پاکستان ءَ بلوچ ءِ نودربرانی وانگجاھاناں وتی پوجی بُنجل جوڑ کرتگ ، آئی ءَ پمیشکا وانگجاھاناں وتی پوجی بُنجل جوڑ کتُگ اَنت آئی ءِ جُھد ءُ لوٹ ھمیش اِنت بلوچ راج ءِ ورنا ءُ نوردبر چہ وانگ ءُ زانگ ءَ دور بِہ بَہ اَنت ، بلوچ راج چہ منی گُلامی ءَ وتی آجوئی ءِ درگت ءَ سرپد مہ بیت ۔ وتی زند ءِ روچاں گوں کھرمانیں گُلامی ءَ بہ گْوازین اِیت ۔ آ اے گپ ءَ شرّی ءَ زانت ءُ پھم اِیت پہ راجی دیمروئی ءُ وشھالی ءِ درگت ءَ نودربرانی یک بلائیں کردارے ، پمیشکا پاکستان بلوچ نودربرانی وانگ ءِ دارگ ءَ الّم ءَ وڑ ءِ نہ وڑے ءَ جُھد ءَ کنت ۔
اِیشی ءِ مِسال شھید شھداد بلوچ ءُ شھید اھسان بلوچ اَنت کہ مھمد الی جناھ شھدربر جاہ ءِ نودربر بَہ اَنت ، آ اے گپ ءَ سرپد بَہ اَنت مارا پاکستان اِلم ءُ زانت ءِ دربرگ نیل اِیت۔ آ چہ پاکستان ءِ زوراکیاں وتی وانگ ءَ یلہ کن اَنت ءُ ماں آئی ءِ ھلاپ ءَ تُپنگ چست کن اَت گوں پاکستان ءَ جنگ کن اَنت ۔ چہ شھید شھداد جان ءُ شھید اھسان بلوچ ءَ اَبید بلوچ ءِ نودربر ءُ رھدربر ھزارانی ھساب ءَ پاکستان ءِ تھاریں کوٹیانی باھوٹ اَنت یا کہ آ دُژمنیں پاکستان ءِ دست ءَ شھید کنگ بوتگ اَنت ۔
چوناھا نودربر ( طالب علم ) مانا اِلم ءُ زانت ءِ لوٹوک ۔ یک نودربرے چاردہ پانزدہ سال ءِ کساس ءَ جھُد کنت وتی زند ءِ ھمُک واھگ ءَ گُٹگیر کنت ۔ پہ وتی زندمان ءَ ءُ پہ چاگردی ءُ راجی وشھالی ءِ ھاتر ءَ ہر ماس ءُ پس ءِ واھگ ھمیش بیت منی زھگ شرّیں اِلم ءُ زانتے در بہ بارت وتی راجی ھزمت ءَ بِہ کنت۔ وتی راج ءِ تہ ءَ وژنام بہ بیت ءُ مارا وژنام بِہ کنت ۔ آ سیر ءُ آسودگیں مردم بہ بَہ اَنت یا گریب ءُ بزگ بہ بَہ اَنت ۔ وھدے ما بلوچ نودربرانی وانگ ءَ گند اِیں مئے بلوچ ءِ کماش پہ بڈّ مزوری کنت ءُ بزّگیں ماس پہ گُد دوچی وتی زھگانی وانینگ ءِ جھُد ءَ کنگ ءَ اَنت ۔
وھدے کہ مردُم شھید ھیات مِرزا ءِ شھیدی ءِ ھاتر ءَ بہ جیڑ اِیت مردُم ءَ را سک ءَ کُھتیگ کنت ۔ آئی ءِ کماشیں پس ءَ پہ بازیں واری ءُ بزگی ءَ وتی زھگ رودینتگ ءُ وانینتگ ۔ آ وتی کماش ءَ گوں روت ماں مچکدگ ءَ وتی پس ءِ کمک کنگ ءَ 13 ساچان 2020 ءَ اے سکیں بژنی گپّے کہ پاکستان رستریں پوج آئی ءِ ماس ءِ سر ءِ سریگ ءَ زوریت ءُ آئی ءِ دست ءُ پاداں بند اِیت ءُ چمانی دیم ءَ بلوچ راج ءِ باندات ءِ چراگ ءَ ءُ آئی ءِ تاسُپیں بچ ءَ شِلسریں تیرانی دیمپان کنت ۔
شھیدھیات مرزا ءِ ند ھما ھونانی باھوٹ بیت ۔ اے ھونیگیں کارِست ھمے پدّر کنت کہ بلوچ ءِ دُژمن ءَ پْروش وارتگ ۔ شھید ھیات مرزا ءِ ھونیگیں ند بلوچ راج ءَ ھمے کلوہ ءَ دنت کہ سرجمیں راج یکمُشت ءُ تپاک بہ بیت ، داں تپاک ءُ ھوار نہ بوتگ بلوچ راج ءِ باندات ءِ چراگ مدام ھمے رسترانی دست ءَ تیرانی دیمپان بَہ اَنت ۔چہ پاکستان ءِ رستریں پوج ءِ زوراکی ءَ ھچ وڑ ءَ رکّ اِت نہ کنت ۔ آئی ءِ ھونیگیں ند پاکستان ءِ پوج ءِ رستریاں پدّر کنت ءُ گْوش اِیت اے چہ انسانی رھنبد ءَ در اَنت ، نہ ایشاناں دین ءُ ایمان ھست نہ گیرت ءُ مارِشت ۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔