چہ بلوچستان ءَ شنگ بیوکیں آن لائن رسانک نیٹورک کرنٹ بلوچستان ءَ دو شمبے ءِ روچ ءَ گوں دی بلوچستان پوسٹ ءِ شونکاری پتر ءَ گوں یک دیوانے ءَ پد ٹی بی پی ءِ لیکہ ءُ راھبند ءُ گوں ھمسنتی ءَ پد ابید ھچ وڑیں شرتاں گوں ٹی بی پی ءَ یکجاہ بیگ ءِ جار جتگ ءُ دیمترا چہ دی بلوچستان پوسٹ ءِ پلیٹ فارم ءَ چہ وتی اھوالکاری ءِ ڈبھانی پیلو کنگ ءِ پیسلہ کُتگ۔
کرنٹ بلوچستان سَے زباناں بلوچی، انگریزی ءُ عربی ءِ تھ ءَ شنگ بیوکیں یک آن لائن رسانک نیٹورکے۔ کہ جتائیں چاگردی رسانکدرانی تندجاھاں پلیٹ فارمانی ھساب ءَ کارمرز کنان ءَ وتی وانوکانی ھاتر ءَ گوستگیں دو سالاں چہ بلوچستان ءِ راستیں جاورھالاں دیم ءَ آرگ ءَ بیتگ۔
دو شمبے ءِ روچ ءَ بیوکیں دیوان ءِ تہ ءَ کرنٹ بلوچستان رسانک نیٹورک ءِ باسکاں اے جار جتگ کہ آ دی بلوچستان پوسٹ ءِ کار ءِ راھبند ءُ وڑ ءُ پیماں گوں دلجمیں رنگے ءَ تپاک دار ایت، کرنٹ بلوچستان ءَ ابید ءِ کجام ھم شرتاں گوں ٹی بی پی ءَ ھوار کنگ ءَ اِنت ءُ وتی پیسرگیں آن لائن تاک ءُ بلاگاں زیت ھلاس کن ایں۔
آیاں ھوار ھوار گوں کرنٹ بلوچستان ءِ وانوکاں دزبندی کُتگ کہ دیمترا پہ ھال، اھوال، گچینی ءُ نبشتانکانی ھاتر ءَ دی بلوچستان پوسٹ ءِ آفیشنل تندجاہ یا چاگردی رسانکدرانی تاکاں بہ چار اَنت۔
یات بہ بیت دی بلوچستان پوسٹ اے وھد ءَ چار جتائیں زباناں انگلش، اردو، بلوچی ءُ براھوئی ءِ تہ ءَ چار جتائیں تندجاھاں چہ شنگ بیت۔ اِشی ءَ ابید چاگردی رسانکدرانی تندجاہ فیسبوک، ٹوئیٹر، ٹیلی گرام، وٹساپ، انسٹا گرام ءَ ھم ٹی بی پی جوانیں رنگے ءَ گندگ بیت۔ ایشی ءَ ابید ٹی بی پی چاپ جاہ ءَ چہ داں انگت ءَ یک کتابے چاپ ءُ شنگ بیتگ ءُ دگہ سَے کتابانی شنگ کاری ءِ سر ءَ کار برجاہ اَنت۔