نبشتانک: ھوت آباد ءُ اِلم ءِ نہ بوگ
نبشتہ کار: بانک سادیہ ھوت
دی بلوچستان پوسٹ
ھوت آباد ءِ میتگ چہ کیچ تربت ءَ 40 مِیل دور اِنت، ھوت آباد ءِ آبادی 3 ھزار ءَ چہ 4 ھزار بیت۔ ھوت آباد چہ مزن شھر تربت ءَ نزیکیں یک میتگے آباد انت۔ ھوت آباد ءَ تھنا دو وانگجاہ ھست، یکے جِنِکانی پرائمری وانگجاھے ءُ دومی بَچکانی مڈل وانگ جاہ اِنت۔ جتائیں کساسانی رد ءَ انوں مڈل وانگجاہ ءَ دو دو سد نودربر روت پہ وانگ ءَ ءُ 120 نودربر پرائری وانگجاہ ءَ پہ وانگ ءَ روت۔ ناں پہ بچکاں پرائمری وانگجاھے ھست ءُ نیکہ پہ جِنِکاں سکنڈری وانگجاھے۔
لھتیں ماہ ساری من ھوت آباد ءَ جنکانی پرائمری وانگ ءَ سرے جت ءُ من ءَ سرپدی رس اِت کہ وانگجاہ ءِ تھنا پنچ کلاس روم اَنت،پنچیں کلاس رومانی تہ ءَ دو روم ءَ را کرسی ءُ میز نیست اَت،نیکہ یک کلاس رومے ءِ تہ ءَ چَٹائی ھست اَت۔ دوئیں کلاس رومانی دریگ ھم پرشتگ اِت انت۔ پرائمری وانگجاہ ءِ استاد تھنا یکے کہ جھد ءَ اِنت کہ دْراھیں کلاساں بوانین آں ۔
اے وڑئیں جاورانی تہ ءَ بلکیں نودربر اے گمان ءَ بہ کن اَنت کہ ما مزنیں وانگ ءُ زانگے در بہ بریں۔
آ نودربر چہ سائنس ءُ اِزم ءِ وڑیں سرنامگاں آشنا نہ انت۔ اے جاورانی تہ ءَ کسانیں چکانی باندات ءُ آیانی ھنر ءِ ھال دل ءَ سِند اَنت۔ اے نودربرانی بُنُکّی وانگ ءُ زانگ چہ انچیں وانگجاھے ءَ بوتگ کہ اود ءَ وانگ ءِ اسباب نیست کہ آیانی وانگ ءِ سپر ءَ آھاں دلجم کت بہ کن انت۔
اے وڑیں کوچگی میتگ کہ ھچبر کمار کنگ نہ بوتگ اَنت، باید اِنت ایشاں مزنیں وانگجاھانی وزیر ءُ گزیر دلگوش بہ دے اَنت ءُ اے گوں تْرندی ءِ گوم ءَ دیمروی دیگی اَنت،نودربراں ھما وانگی اسباب بہ رس اَنت کہ دومی شھرانی نودربراں رسگ ءَ اَنت۔
مروچیگیں دھر ءَ مالومداری ءِ ٹکنالوجی ءِ دیمروی ھژدری اِنت۔ بلوچستان ءِ تہ ءَ اے وڑیں بے آسراتی وَ الم ھست اِنت۔ اے میتگانی آبادی نوں شاھگان اِنت زَرّی کمک ءِ نہ بوگ ءِ سبب ءَ ماڈل وانگجاہ بے سوب اَنت۔
ھوت آباد ءُ بلوچستان ھمک میتگاں وانگ ءُ زانگ ءِ آسراتی ملک ءِ ایندگہ ءِ شھر ءُ دمگانی وڑ ءَ بہ رسین اَنت۔ اگاں روایتی کلاس ءُ استاد ماں ماڈل وانگجاہ ءَ بے سوب بوتگ اَنت اے بارو ءَ زمہ داراں گوں سنگینی ءَ جیڑگی اِنت کہ آیا آ بلوچستان ءِ نودربراں ھمے وڑ ءَ بے سوب کنان کن اَنت یا اے زُلم ءُ زوراکی ءَ دور کنگ ءِ واستا چیزے کرت کن اَنت؟
چَہ ایشی ءَ پیسر مئے میتگ ءِ ھزاراں نودربر ءِ باندات ھراب بوتگ باید اِنت سرکار ھمے نیمگ ءَ دلگوش بہ دنت.
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔