نبشتانک: گِلگ
نبشتہ کار: عتیقہ بلوچ
دی بلوچستان پوسٹ
اے دُگنیا چونیں اجبیں زیبائیاں گوں سمبهینتگ. ھرچ نیمگ ءَ کہ چماں شانک دے ئے ، تاھیر بکشیں ندارگ، ارواہ ءِ اوتاگاں سُرین انت ءُ انچو سما بیت کہ تئی بالاد ءُ رگانی تہ ءَ ساز گوں زیمل ءَ تچان بیت. ترا ھرچ وڑیں ھیالاں چہ آجو کنت ءُ یک انچیں جاھے سر کنت کہ تو بس ھمے تاھیر بکشاتگیں ساھتانی تہ ءَ اُژناک کنان بہ ئے.
روچ، ماہ، آزمان، گوات، درست واجہ ھدا ءِ داتگیں داد اَنت ءُ اے وتی تہ ءَ ھدا ءِ ھر رنگ، دروشم ءُ آئی ءِ ھستی ءَ پدر کن انت. ھدا وَ دُرستانی اِنت ءُ اے وشی ھم پہ درستانی واستا انت. گڑا یا ھدا منی زمین پہ اے وشی ءُ وشھالی ءَ چے ءَ چو تلوس ایت؟ اے وشی زاناں منی واست ءَ نہ انت؟؟
او ھدا من ءَ تئی جوڑ کُتگیں گوات ءَ گوں باز گِلگ ھست.
گوات ءِ تہ ءَ زند ھست کہ ساھداراں زندگی دنت. لھمیں ءُ مھلبیں گوات وشیانی مستاگ ءُ سوگات انت. وھدے گوات پُلاناں امباز کنت، آئی رنگ، زیبائی ءُ وشبواں ھرچ جاہ تالان کنت. گڑا پرچا ھمے گوات منی ھلک ءَ نہ کَش ایت؟ پرچا منی ھلک ءِ پُل چو بے جانیں کُنٹگ ءَ بدل کتگ انت؟؟؟ منی ھلک ءَ زمستان ءِ تھار ءُ لُنجیں شپاں ھم تبد ءُ لیواریں دروشم ءَ کش اِیت. ھمے گرم ءُ تبدیں گوات ءُ بے ریاھی ءَ همک لوگ سُتکگاں، ھمک لوگ ھاموش ءُ ویران کتگ اَنت ءُ وشی ءَ چہ زبھر…
زر ءُ گوات ءِ !… اجبیں سیادی یے ، گوات منی زر ءِ چولانی گماں لیب گوازی کنت، چولاناں چست ءُ ایر ءُ پد ءَ ھر چول ءَ آئی ءِ گُڈی منزل ءَ سر کنت. بلے انگت منی زر ءِ گماں چہ نہ آشنا ءُ بدگمان انت. وھدے منی زر نود بند اِیت ءُ ھمے زری نود پہ منی زمین ءِ دلبند ءَ شنزگ ءَ ساڑی بنت، بے وپائیں گوات اے نودانی وشیاں دگہ جاہ ءَ سر کنت ءُ منی زمین ءِ ھاک پہ پٹے آپ ءَ تلوس اِیت. منی زمین ءِ آپ وَ ھما بالی مرگانی ارسانی ھار انت کہ پہ وتی بانزلانی پیچ ءُ تاب ءُ بال کنگ ءِ ھاتر ءَ زوراکیں گوات ءِ دیم ءَ زنزر اِیت. ھمے ارس ءُ ھون منی زمین ءِ مھلبیں ھاک ءَ ھوار بنت، پُل رودی اَنت ءُ ھشکیں کُنٹگاں سبز کن انت.
گوات ھر زمانگ ءَ یک کاسدے درور ءَ پیش کنگ بوتگ. بلے پہ مئے واستا ھچ کاسدی نہ کتگ، نہ وشیں ھالیں، نہ کلوھے نہ مستاگے …
کُلوھے … پہ ھما مرادیگیں ماتانی واست ءَ کہ وتی بچانی دید ءَ تلوس اَنت.
کُلوھے… پہ ھما گھارانی واست ءَ کہ براتانی واتر بوگ ءِ ھاتر ءَ ارس شلی اَنت.
کلوھے … پہ ھما چُکانی واست ءَ کہ پہ وتی پت ءَ کرنیں ودار کتگ ءُ مزن بوتگ انت.
زالمیں ءُ زوراکیں گوات کد اے کلوھاں وتی منزل ءَ آسر کنت.
بلے من دل ءَ سدک آں کہ کیت روچے اے:
سبر ءُ اوپار…
گریوگ ءُ زار…
دردانی کتار…
ارسانی ھار…
تپتگیں دلانی پاھار…
ھونانی دیار….
ءُ کرنانی ودار……. آسر بنت ءُ بے ریاھیں گوات ءِ زوراکی ءِ اهد چو تھاریں شپ ءَ آسر بیت ءُ وشیانی کوش زیملیں سباه ءِ دامُن ءَ سوت الھان کنت ءُ گُلزمین ءَ نازین اِیت ءُ مرادانی زِر وتی چولانی امبازاں درد ءُ دوراں سھڑین اِیت.
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت