بلوچستان ءِ دمگ تمپ ءَ چہ پاکستانی پوج ءَ مزنیں کساس ءَ مردم دزگیر کُتگ ءُ ناشناسیں ھنداں بُرتگ اَنت۔
ھندی اھوالکاراں ٹی بی پی ءَ گوشتگ کہ کونشقلات ءُ کش ءُ کر ءِ دمگانی تھءَ پاکستانی فورسزاں مروچی سھب ءَ بیڑ بُرتگ ءُ لوگ پہ لوگ پٹگ بندات کُتگ۔ ھمے نیام ءَ بیست ءُ دو مردم ءَ گیش نپر دزگیر کنگ ءَ پد ناشناسیں جاھاں برگ بیتگ اَنت۔
فورسز انی دست ءَ دزگیر بیتگیں مردمانی تھءَ سکندر ء ابراہیم، فرید ء علی، عالم ء چاکر، ستار، ظریف، درجان، بہادر ءِ دو کسان سالیں بچ فراز بہادر، نور احمد بہادر، عبداللہ داد ءِ دو زھگ کامران عبداللہ، عماد عبداللہ، حسن ءُ حسین دو برات، مقصود حسن، جابر حسن، درجان حسن، ظریف درمحمد، مصدق عیسی، زوہیر عبداللہ، سکندر ملا محمد علی، فضل تاج محمد، ابراھیم حاجی محمد کریم، فرید علی ھوار اَنت۔
ھندی اھوالکارانی گوشگ اِنت کہ دزگیر بیتگیں مردمانی کساس گیشتر اِنت کہ آیانی درگت ءَ دنیگت گیشتر اھوال سر بیگی اِنت وھدے کہ دزگیر بیتگیں مردمانی تھءَ گیشتریں کساس ورناھانی اِنت۔
دمگی واکدارانی نیمگ ءَ چہ داں آنگ ھچ گوشگ نہ بیتگ۔
دومی نیمگ ءَ ٹی بی پی ءَ سر بیتگیں ھالانی رد ءَ دزگیری ءَ پد بیگواہ بیتگیں مردمانی تھءَ گیشتریں مرد یل کنگ بیتگ اَنت بلے سکندر ء ملا مھمد، مصدق ء عیسی ءُ الیپاز ء شمبے داں انگت بیگواہ اَنت۔
زانگ بہ بیت بلوچستان ءِ جتاھیں جتاھیں دمگاں چہ پوجی بیڑانی تھءَ مزنیں کساس ءَ مردمانی بیگواھی ءِ ھال مدام دیما کائنت کہ اے مردم لٹ شاپی ءَ پد یل کنگ بنت ءُ ایشاں بیھار دیگ بیت کہ بلوچ آجوئی لوٹوکیں جھدکار ءُ سرمچاراں چہ دور بہ بنت ءُ پہ پوج ءَ اے مردمانی چریکی ءَ بہ کن اَنت۔
اے درگت وی بی ایم پی رھشون ماما کدیر ءَ مدام وتی درشانانی تھءَ گوشتگ کہ استانی پوج لس مردمانی سرا وتی زوراکیانی برجم دارگ ءِ ھاترہ وتسریں بیڑانی تھءَ بے میاریں مردماں بیگواہ کنت ءُ لٹ شاپی کنت۔
وھدے کہ بی این ایم اے وڑیں گاماں یکجاھی سزا ءِ نام ءَ دنت کہ چہ ایشی ءَ سیاسی جھدکارانی کھول ءِ مردم ھم سزا دیگ بنت ءُ جھدکاراں چہ جھد ءَ دزکش کنگ ءِ ھاترءَ مجبور کنگ ءِ کوشست کنگ بیت ۔