تژن – خوشحال خان خٹک – میجر مجید

تژن

افغانیانی نامداریں راجی ءُ آشوبی شاعر خوشحال خان خٹک ءِ ھیالے ءِ آزاتیں رجانک

میجر مجید

دی بلوچستان پوسٹ

تو وتا میر گُشئے
تو وتا شہمیر گُشئے
تو وتا سردار گُشئے
تو وتا تَمندار گُشئے
تو وتا چاکر ءِ اولاد گُشئے
تو وتا گْوہرام ءِ پدریچ گُشئے
تو وتا نوری ءِ فرزند گُشئے
تو وتا شال ءِ ھُدابُند گُشئے
تو وتا دُزّاپ ءِ گِر ءُ بند گُشئے
تو وتا ہلمند ءِ گُلیں ننگ گُشئے
تو وتا گوہریں گالانی رد ءُ بند گُشئے
پازُل ءُ قاسم ءُ جام ءُ روانبد گُشئے
شکّل ءُ شہدیں زبانے دارئے

برے اردو، برے فارسی ءُ سندھی ہم گُشئے
انگت دری ڈُنگانی گُلام ئے پرچا؟؟
وتی جند ءِ عنبریں ھاک ءِ سرا
وتی جند ءِ بہشتیں ڈیھ ءَ
یک درملکی لگورے تئی دستاں بندیت
جنت شہمات سر ءُ گوشاں تئی
گوں زاہ ءُ زہیراں ترا پربندیت

کید ءُ زمزیل ئے چیا؟؟
گار ءُ بیگْواہ ئے چیا؟؟

ہند ءُ ہنکین وتی، ملک وتی
نیل بومیں زِر ءُ زِربار وتی
کوہ ءُ دَمگ، کوچگ ءُ دشت وتی
دلکشیں چاغی ءِ ریگزار وتی
ریکاں بار گپتگیں ماہ گُل ءِ بازار وتی

دشت ءُ نہنگ، کاجو ءُ کیچکور وتی
انگت تئی دست شہار انت
ماں دری درگاہاں
لوٹئے پنڈگ چرا پنڈوکاں
کہ تو اشاں وت پنڈگ داتگ

ھیر لوٹئے چہ اِشاں
تئی ھَیرانی تَمن بندیگ انت
باہوٹ وتی باہڑیں باسکانی بہ بی
ہمکوپگ وتی تنگویں بْراتانی بہ بی

تُرک ءُ منگول ءُ پَرنگ، گولانی
سکندر زالم ءُ یونانی
بلھڑیں تاتار ءُ ساسانی

توئے اولاد زمین جُمبانی
ہمراہ بہ بی آجوی ءِ رُمبانی
تئی آریپ ءُ یلیں بامرداں
چست کرتگ سلاہ جنگانی
بوتکگ سرمہار زہمانی
پروش دات لشکر اِش ڈُنگانی
گوں تیگ ءُ اسپر ءُ سی کارچاں
چہ زوراکاں پُلئت آجوئی

وصیّت گوں وتی دوستان اِنت
منی مانش منی عنبریں ھاک ءَ بیت
ہمودا کہ ھاک منی آجو اِنت
ہمودا کہ ھاک منی آجو اِنت