بلیدہ ءَ منشیات ءِ ھلاپ ءَ زھرشانی

بلیدہ ءَ منشیات ءِ ھلاپ ءَ زھرشانی

دی بلوچستان پوسٹ

سر بیتگیں ھالانی رد ءَ کیچ ءِ ھنکین بلیدہ ءُ زامران ءِ جتائیں جاھاں آدینگ ءِ نماز ءَ پد منشیات ءِ ھلاپ ءَ زھرشانی کنگ بیتگ –

زھرشانی میناز، سلو، الندور ءَ ھوار چیئرمین عبدلرھمان بازار ءَ ورنایاں منشیات ءِ ھلاپ ءَ روانک کَش اِتگ ءُ زھرشانی کرتگ –

زھرشانی کنوکاں سرکاری واکداراں چَہ لوٹ کرتگ ءُ گْوشتگ کہ سرکار بلیدہ ءِ کَش ءُ گوراں منشیات بھا کنوکانی ھلاپ ءَ گامگیج بہ زور اِیت-

آیاں گْوشت کہ زھرآماچیں منشیات ءَ بلوچ ورنایانی زندگی زورال کرتگ ءُ کہ وریانی بازیں کَچے منشیات ءِ دیم ءَ سر جھل اَنت –

زھرشانی کنوکاں گْوشت کہ منشیات باپار کنوکانی کمکی ءَ مزنیں مردمانی دست چیر اِنت چرے سوب ءَ منشیات بھا کنوک دمگاں شیکر اَنت ءُ لس وردنی سامانانی پیم ءَ منشیات بھا کنگ ءَ اَنت کہ کَسے جست ءُ پرس اِش ھم نہ کنت-

آیاں گْوشت کہ ما وھدےکہ دمگدارانی گور ءَ روئیں منشیات ءِ گر ءُ دار کنگ ءَ دمگدار زُکگ نہ کن اَنت ءُ پد ءَ مئے گپ ءَ دومی گوش ءَ گوازین اَنت ءُ گپ ءُ ھلاس کن اَنت چرے سوب ءَ کہ منشیات باپاریانی دست دور ءُ دراج سک اَنت –

زانگ بہ بیت گوستگیں یک ھپتگے ءَ چَہ بلیدہ الندور ءَ منشیات ءِ ھلاپ ءَ دمگی چاگردی ءُ راجداریں مردمانی نیمگ ءَ زھرشانی کنگ بیگ ءَ اِنت بلے سرکار ءِ ترندیں گام تنی وھدی گِندگ نہ بیتگ اَنت –