راشد انگت بیگواہ اِنت – شھزاد شاہ

نبشتانک: راشد انگت بیگواہ اِنت

نبشتہ کار: شھزاد شاہ

دی بلوچستان پوسٹ

اگاں مروچی وت ءَ کسے بلوچ قوم پرستے گْوش اِیت گڑا قوم پرستے نہ اِنت پرچا کہ مروچی ما کمو بچار اِیں مئے چینچُک برات گار ءُ بیگواہ اِنت بلے اود ءَ مئے قوم پرست ءُ قوم دوست کُج اَنت کہ وتی آواز ءَ چِست بہ کن اَنت ؟
مروچی چو برمش ءِ وڑ ءَ کلیں علاقہ ءُ بازاراں اَنچو آواز چِست کنگ بوتین اَت گڑا ما وتارا قوم پرست ءُ قوم دوست بہ گْوشتین اَت

دسمبر ءَ 2018/26/ راشد حسین چہ عراب امارات ءَ چِست کنگ بیت داں روچے مروچی ھچ وڑیں ھالے نیست کہ کسے بہ زانت کہ پاکستان ءَ چون کُتگ ، گڑا ما پرچا ھاموش اِیں ؟
وتئی آواز ءَ چِست نہ کناں راشد ھم یک بلوچ زھگے راشد جان ءِ مات ءَ ما کل گندگ ءَ اِیں کہ کوئٹہ پریس کلب ءِ دیم ءَ نشتگ ءُ وتی زھگ ءِ واستا وتی آواز ءَ ماں آزمان ءَ سر کنگ ءَ اِنت.. اود ءَ منی ءُ تئی انسانیت کُجا اِنت کہ من تو ھم وتئی آواز ءَ چِست بہ کناں …….
مروچی کوئٹہ ءَ ماما قدیر ءِ کِر ءَ چینکا مات ءُ گھار نشتگ پہ وتی زھگ ءُ براتانی واستا اود ءَ بلوچ قوم پرچا ھاموش اِنت مرچی بلوچ قوم وت ءَ پرچا گڑا پیش نہ دار اِیت کہ من انصاف لوٹاں ھزاراں ماتانی بچ گار ءُ بیگواہ اَنت گڑا ما وت ءَ بلوچ گُشاں بلوچی اے نہ اِنت کہ پہ نام بلوچ بہ باں نام ءِ بلوچ سک باز اِنت بس مارا جتگ نہ تپاکی ءَ بلوچ قوم انگت واب اِنت ………
راشد انگت تھاریں کوٹیاں بند اِنت راشد ءِ کر ءَ کس نیست کہ پہ وتی مکھیں مات ءُ گھارانی واستا یک کلوھے دیم بہ دنت کہ من تھنا ءُ منی کر ءَ کس نیست من بلکیں وتی مات ءِ آواز ءَ اِشکنگ ءَ آں بلے منی مات منی آواز ءَ ھچ اِش نہ کنگ ءَ اِنت بس چمّاں پچ کنت ھچ گندگ ءَ نہ اِنت بس لھتیں مردمانی کوکار ءُ زار ءِ توار اَنت بلے من نہ زان آں کہ چونیں مردم اَنت بس ھمے زان آں کہ بازیں بلوچ پُسگے بندیگ اِنت ءُ بازیں مردمے ھمے تھاریں کوٹیانی توکا بندیگ اِنت بلے ھچ دست رس اِش نیست کہ وت ءَ بہ رکین اَنت …..
منی مات پمن کس نیست کہ منی آواز ءَ چِست بہ کن اَنت بس توئے ءُ اللہ پاک اِنت دگہ کس نیست منی مات ھما بلوچ قوم کجا اِنت کہ وت ءَ بلوچ گُش اَنت مرچی پرچا گندگ نہ بنت منی مات زاناں من جُرمے کُتگ کہ من انگت بندیگ آں منی آواز ءَ اللہ ھم گوش نہ دار اِیت بلکیں اللہ منی آواز ءَ گوشدار اِیت من زان آں کہ اللہ چو بَندہ ءِ وڑ ءَ تنگ نزر نہ اِنت اللہ مالکے یک نہ یک روچے منی دستاں گیت من ءَ آجو کنت بلے پہ بلوچ قوم ءَ بژنیگ بیت ،
پہ وتئی برات ءَ ھم آواز ءُ ھم دست بوگ لوٹ اِیت مارا ، ما وت ءَ بلوچ گْوش اِیں گڑا کُلیں بلوچ قوم ءَ را ھم دست بوگی اِنت کلیں بلوچ قوم ءِ درد زانگی اِنت پہ کلیں قوم ءَ انساپ ءِ گپ کنگی اِنت۔۔
اللہ ترا راشد جان آجو بہ کنت گوں کلیں بندیگاں ھوار آمین …….

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔