بلوچستان ءَ ڈنک ویل ءِ ھلاپ ءَ زھرشانی برجاہ

تربت ءَ ناوشیں ویل ءِ ھلاپ ءَ سرجمیں بلوچستان ءَ زھرشانیانی درچ برجاہ اَنت – برمش یکجھتی کمیٹی ءِ نیمگ ءَ مروچی کلات، نوشکی ءُ نال ءَ زھرشانی کنگ بیتگ –

سَے شمبے ءِ روچ ءَ نال بوائز ھائی اسکول ءَ یک زھرشانی روانکے دراتکگ کہ بازار ءِ جتائیں جاھاں گوزان بیتگ ءُ بنجاھی چار راھے سر ءَ مُچ بیتگ ءُ زھرشانی کنوکاں ویل ایر جتگ ءُ سرکار ءِ سر ءَ ترندی ءَ ایراد گپتگ –

زھرشانی کنوکاں ڈنک ویل ءِ مجرمانی سزا دیگ ءِ ھمراھی ءَ سرجمیں بلوچستان ءَ ڈیتھ اسکواڈ ءِ ھلاسی ءِ لوٹ کرتگ –

برمش یکجھتی کمیٹی ءِ نیمگ ءَ کلات ءَ ویل ءِ ھلاپ ءَ زھرشانی بیتگ – زھرشانی ءَ نودربر ءُ چاگردی مھلوک ءَ بھر زرتگ –

سرجمیں بلوچستان ءَ گوستگیں دو ھپتگانی تہ ءَ مھلوک ءِ نیمگ ءَ زھرشانی درچ یکشل ءَ برجاہ اَنت – برمش یکجھتی کمیٹی ءِ نیمگ ءَ یورپی ڈیھاں ویل ءِ ھلاپ ءَ ھم زھرشانیانی جار پرینگ بیتگ اَنت –

ویل ءِ ھلاپ ءَ نوشکی ءَ برمش یکجھتی کمیٹی ءِ نیمگ ءَ یک زھرشانی روانکے کشگ بیتگ کہ پریس کلب ءِ دیم ءَ مُچ بیتگ –

نوشکی ءَ زھرشانی کنوکاں بلوچستان ءُ سرکار ءُ بنجاھی سرکار ءَ چَہ دزبندی کرت ءُ گْوشتگ کہ برمش بلوچ ءَ موزگیری دیگ بہ بیت –

آیاں گْوشت کہ پیسر ءَ بلوچ ورناہ بیگواہ کنگ ءُ پد ءَ لاشانی دزکپگ چریشاں پد شھرانی تہ ءَ تیرانی آماچی ءَ مھلوک نشانگ ءُ نی لوگانی تہ ءَ مانریچگ ءُ زالبول ءُ چُکاں نشانگ کنگ ءَ اَنت –

چریشاں ہد بلوچستان نیشنل پاٹی ءِ نیمگ ءَ ویل ءِ ھلاپ ءَ بنجاھی جار ءِ پد ءَ میر گل ھان نسیر ءِ چار راہ ءَ نندانک جنگ بیتگ –

بلوچستان ءِ دگہ ھند ءُ دمگاں ھم زھرشانی جار پِرینگ بیتگ اَنت –