نبشانک: ماں چاگِرد ءَ راجی جُنز ءِ آگاھی ءُ سرپدی ءِ ارزِشت
نبشتہ کار: ماھروش بلوچ
دی بلوچستان پوسٹ
اگاں ما دگنیا ءِ ھر وڑیں راجی جُنز ءُ آشوباں کسانیں چمشانکے بِہ دے ایں گُڑا ما چیزے زان ایں کہ دگنیا ءِ ھر وڑیں راجی آشوب ءُ جُھدانی بُنکی آسراتی لس مھلوک ءَ را راجی جُھد ءِ بابت ءَ آگاھی ءُ سرپدی اَت کہ راج ءِ کسان ءُ مزنیں مھلوک ءَ سما بِہ بیت کہ من چے کسے آں! ما زیردست ایں یا وتی ڈیھ ءِ وتواجہ ایں!! ماں یک ملٹی نیشنل اِستانے ءَ منی چونیں بستارے، منی راجی پجّار مھکم انت یا منی راجی ھستی ءُ گار کنگ بیگ ءَ انت! پمیشکا باید انت ما اے گپ ءَ تچک بِہ زان ایں کہ داں وھدیکہ زیردستیں راج ءِ لس مھلوک وتی راجی مارشت ءُ وتی راجی پجّار ءَ مہ زان ایت ءُ ڈیھ ءِ ھمُک کُنڈ ءُ پھمنات ءِ بزاں راجی جُنز ءِ دمگی جھگیر ءُ کارمستر وتی لس مھلوک ءَ راجی جُھد ءِ بارو ءَ سرپدی مہ دے اَنت راجی جُھد ھچبر دیمروی نہ کنت۔
چوناھیگا مرچیگیں دامگ بزاں تندجاہ ءُ چاگِردی رسانکدر ءِ زمانگ ءَ زانتکار ءُ وانندھیں بلوچ سرپد انت کہ راج ءِ تہ ءَ راجی جُھد ءِ سرپدی ءُ آگاھی راجی جُنز ءَ چونیں بستار دار ایت بس کمیں ساھتے ءَ چَہ دامگ ءَ شوھاز بہ کن گُڑا امریکہ، کیوبا، پرینچ، ھندوستان ءُ زرباری آپریکہ بزاں بازیں راجانی جُنز تئی چَمّانی دیم ءَ کاینت کہ ایشانی سوب ماں چاگِرد ءُ راجی آگاھی ءَ ھمگرنچ اَت ءُ بلے نی شُما اے کْوھنیں آشوباں بِل اِت لھتیں نوکیں درور من وت شُمئے دیم ءَ کار آں۔
اول ما بزان ایں کہ راجی آگاھی ءُ سرپدی ءَ ھر کس بزاں ھر راج وتی داب ءُ وتی راجی سیت ءِ رِد ءَ درشان کنت چمیشکا توری ھر وڑیں آگاھی یے بِہ بیت آ دو رنگ ءَ زانگ بیت۔ یکے ءَ را ردیں آگاھی گْوش انت کہ آئی ءَ را ما بلوچی ءَ پوتاری ءُ انگریزی پرپاگینڈا گْوش ایں اگاں دو راج وت ماں وت جنگ ءُ جدل ءَ ھونیگ بِہ بنت گُڑا ھر راج ءِ راجداری(سرکار) وتی سیت ءُ پائدگ ءِ رِد ءَ وتی لس مھلوک ءِ چاگِردی ءَ آگاھی یے کار ایت بِل ئِے کہ آ دْروگے یا راستے بلے ھمے آگاھی آئی ءِ راجداری ءَ پائدگ دیگ انت پمیشکا توری دْروگ بِہ بیت بلے پہ آئی ءَ یک آگاھی زانگ بیت البت ھمے رد دیگ دیمتر ءَ راجداری ءُ ھمیشی ءِ راج ءَ بے کساس تاون دنت۔
انچوشکہ من ءَ چیزے روچ بیتگ کہ من پنجاب ءِ بُنجاھی شھر لاھور ءَ یک گُد ءِ کارجاہ نودربری(انٹرنشپ) کنگ ءَ آں اگاں تو پنجابیاں گپ بِہ کن ئے کہ کسانیں ھند ھُشکنات ءِ بَھر ءُ ونڈ راست اَت یا رد؟ گُڑا ھر پنجابی یے گْوش ایت کہ راست بلے اے وَ نہ زان انت کہ مُلانا ابوکلام چے گْوش ایت؟ ھندوستان ءِ نیمگی مسلمان چی گْوش انت؟ اے بَھر ءُ ونڈ ءَ ھندوستان ءِ تیوگیں مسلمان نزور کتگ انت بلکیں پنجابی وت ونڈ ءُ چُنڈ بیتگ انت نیمے اش ھندوستان ءَ انت ءُ نیمے اش پاکستان ءَ انت۔ ھما کہ پاکستان جوڑ کت پد ءَ آ وت پشل ءُ لجّی بیتگ اَنت کہ ما پاکستان ءِ ٹھینگ ءَ بلاھیں رَدی کتگ۔ بزاں ما ھبکّہ ءُ ھیران بَہ ایں کہ سرجمیں گیدی ءَ، تیوگیں جھان ءَ پنجابی ھما اولی بدبھتیں راج انت کہ وتی ڈیھ ءِ ونڈ ونڈ کنگ ءَ وت شات ءُ گل انت!!
دومی اے گپ ءَ جنگی سوھوئیں مردم زان انت یک ھر جنگ ءُ ملیٹری آپریشن ءِ یک مول ءُ مُرادے انچوشکہ انگریزی ءَ ملیٹر آبجیکٹؤ ئِے گْوش انت اگاں تو چہ پنجابیاں جُست بِہ کن ئے کہ چَہ ھندوستان پاکستان ءِ 1965 جنگ ءَ کَے ءَ باج بُرتگ ءُ کجام ملک ءَ وتی ملیٹری آبجیکٹؤ بزان جنگی مول ءُ مُراد پیلو کتگ انت گُڑا آ ھچ نہ زان انت بس ھمے یکیں گپ گْوش انت” ما باج بُرتگ!” بلے آپریشن جبرالٹر ءِ بارو ءَ ھچ وڑی سرپدی اش نیست کہ بے مُراد ئِے بیتگ ھمے وڑ ءَ توری 1971 جنگ بِہ بیت یا توری 1998 ءَ کارگل ءِ جنگ بِہ بیت جنگی مول ءُ مُرادانی بابت ءَ ھچ وڑ سرپدی ءُ آگاھی اش نیست۔
نی اے پوتاری پاکستان ءِ لس مھلوک ءُ راجداری ءِ بیگری انت چی ءَ کہ چَہ اے ردیں پوتاری ءَ استان ءِ لشکر ءَ بے کساس پائدگ رستگ ءُ رسگ ءَ انت بلے آئی ءِ لس مھلوک دائم ءَ کور ءُ بے سما انت لس مھلوک ءَ ھچ وڑیں سرپدی نیست انت کہ پاکستان ءِ لشکر ھچبر ھندوستان ءِ بیگری ءَ جنگ نہ کنت بلکیں وتی لس مھلوک ءُ راجداری ءَ بیھار ءُ تُرس دنت ءُ بجٹ وارت ءُ کاروبار کنت پمیشکا جنگی بودی وَ نیست انت ئِے بزاں اے ھُشک ءُ دْروگیں زرمبش کہ “کشمیر بنے گا پاکستان”، “کشمیر ھمارا شھرگ ھے”، ” ھم آیٹمی کوت ھیں” اے چونیں چونیں دروگ بس وتی راج ءِ رَد دیگ ءُ گسر کنگ ءَ ابید ھچ نہ اَنت گُڈسری چَہ ایشی ءَ یک تبکے ءَ پائدگ رسگ ءَ انت ءُ دومی ءَ را زیانی ءُ بزگی دگہ ھچ نا!
ھمے وڑ ءَ بلوچ راج ءِ پدریچ توری روایرشُتی بِہ بیت یا توری رودرآتکی بِہ بیت ماں وانگجاھاں دْروگ ءُ پوتاری ءِ وانگ ءَ بے وس انت انچوشکہ مئے دیم ءَ انت کہ بلوچ راج ءِ زھگ چَہ کسانی ءَ پاکستان ءِ ٹھینتگیں دْروگیں راجدپتر، دْروگیں درونت، مھمد اَلی جِناہ، لیاکت اَلی ھان ءُ الاما اکبال، آیزیز بھٹی ءُ کرنل شیر ھان ءِ دْروگیں کسھاں وان ایت کہ مارا آیاں گوں ھچ وڑیں سْیادی یے نیست بژن انت کہ وتی راجی ھستیانی بارو ءَ ھچ گالِردے ونت کت نہ کنت۔ اگاں تو اے پوتاری ءَ بِہ گِند ئے گُڑا پاکستان ایشی ءَ وتی راجی آگاھی پوہ بیت بلے بلوچ گْوش ایت کہ اے یک پوتاری یے بلکیں پہ بلوج راجی ھستی ءِ بیگواہ ءُ گار کنگ ءَ اے یک ساز کتگیں بلاھیں پندلے
نی ما وتی بلوچ راجی جُنز ءِ آگاھی ءُ سرپدی ءِ سر ءَ کا این ءُ گپ کن ایں کہ بلوچ چاگِردی ءِ تہ ءَ بزاں بلوچ لس مھلوک ءَ وتی راجی جُنز ءِ بابت ءَ چنکس سما، سرپدی ءُ آگاھی ھست۔ انچوچکہ کہ دژمن ءِ وڑ ءَ پہ پوتاری ءَ یا گْوش ئے راج ءِ تہ ءَ راجی جُنز ءِ راستیں آگاھی یے ودی کنگ ءَ بلوچ راج ءَ گور وتگُش، گِندگُش ءُ روتاک وڑیں آسراتی ھچ وھد ءَ نہ بوتگ انچوشکہ اگاں ما بلوچ راجدپتر بِہ گند ایں وھدیکہ پاکستان ءَ مولمان 1948 ءَ بلوچ ڈیھ بلوچستان ءِ زیردست کنگ ءَ اُرُش کت گُڑا دژمن ءِ بیگری ءَ اولی سلاھبندیں آشوب ھان آپ کلات ءِ کستریں برات نمیرانیں شھزادگ واجہ کریم ھان بلوچ ءَ چہ سوچکان 1948 ءَ بُنگیج کُت گُڑا اے جُنز ءَ ابید کلات ءُ مستونگ ءِ بلوچاں، دگریں دِیر ءُ نزیکیں بلوچ لس مھلوک ءَ راجی جُنز ءِ بابت ءَ ھچ وڑیں سُدّ ءُ سما ءُ نیست اَت پمیشکا راج ءِ اولی آشوب بے سوب بوتگ دریگتیں بلوچ راج پہ وتی راجی آجوئی ءِ ھاتر ءَ یکمُشت ءُ ھمکوپگ بِہ بوتیں ءُ راج ءِ بامردیں ورنا ھمے جنگ ءَ ھوار بوتین انت البت شھزادگ کریم بلوچ ءِ سرکماشی ئیں جُنز ءَ راج ءِ تہ ءَ یک کسانیں سرپدی یے داتگ کہ تو زیردست ءُ گلام بوت ئے ءُ ایشی ءِ مارشت دیمتر ءَ پدر بنت بزاں شھزادگ ءِ سرکماشی ءَ اولی راجی جُھد پہ بلوچ راج ءَ یک بُنگیجی کلوھے اَت۔
ھمے وڑ ءَ بلوچ راجی جُنز ءِ دومی سلاھبندیں جُھد بلوچ راج ءِ بابو ءُ کماشیں رھشون نمیران بابو نوروز ھان زھری ءَ 1959 ءَ راج ءِ دیم ءَ آؤرتگ ءُ گوں دژمن ءَ جنگ کنان ءُ وتی ورنائیں زھگانی سر ندر کت انت۔ چہ اے جُھد ءِ برورد ءَ راجی جُھد ءَ پد ءَ یک نوکیں ھاٹیگے رستگ البت اے وھد ءَ ھم تھنا کلات ءُ آئی ءِ کِر ءُ کش ءِ دمگ ءِ مردماں بلوچ راجی آجوئی ءِ جُنز ءَ بھر زورتگ۔ اگاں من رَد مہ بَہ آں منی زانتکاری ءِ رِد ءَ چاگی، نوشکی، زَبُل، زھدان، چھبار، جیکب آباد، کشمور، ڈیرہ گازی ھان، ڈیرہ بگٹی، کوھلو ،کاھان پنجگور، تربت ءُ گْوادر ءِ بلوچ لس مھلوک ھمے 1959 ءِ جُھد ءَ ھوار نہ اِت اَنت چی ءَ کہ راج ءِ تہ ءَ آگاھی نیست اَت کہ تو یک گلامے ئے۔ دومی اد ءَ من بلوچ راج ءِ بزگیں لس مھلوک ءَ ھم میار نہ دیاں بلکیں من دمگی نواب ءُ سرداراں میار ءُ تُھمت کن آں کہ آیاں وتی نیمگی بلوچ راج پہ سرکار ءِ کاسگ چٹّی ءَ وتی پادانی چیر ءَ گلام داشتگ ءُ وت دژمن ءِ کاسگ چٹّ جوڑ بیتگ اِت انت پمیشکا راج وتی راجی جُھد ءِ بابت ءَ بے سُد ءُ بے سما اَت باید انت ءُ دریگتیں ھمے کاسگ چٹّیں سردار ءُ نواباں کاسگ چٹّی مہ کُتیں بلکیں راج ءَ سرپدی ءُ آگاھی بہ داتیں کہ تئی یک جُتائیں پجّار ءُ ھستی یے تو وت چہ کرناں وتواجہ ءُ آجوئیں ڈیھے ءِ واھند ءَ ئے بلے نی تو گلامے ئے اگاں ھر نواب ءُ سرداراں وتی راج ءِ تہ گلامی ءِ مارشتے ودی کتیں گُڑا بابو نوروز ھان ءِ زھگ دژمناں پاھو نہ داتگ اِت انت بلکیں جنگ دیم شُت ءُ باج ءَ سربیتیں۔ البت بلوچ راجی جُھد ناں کہ اوشت ءِ آماچ بوتگ ءُ نیکہ پُشت ءَ شت بلکیں مُدام رودوم ئِے گیپت ءُ تب ھر وھد ءِ ھساب ءَ دیمروی کت۔ بلوچ ورنائیں نودربر ءُ راج ءِ شائر، سرپدیں رھشون ءُ شاھسسائیں زانتکاراں مُدام راج ءِ لوگ لوگ ءَ راجی آجوئی ءِ کلوہ سر کُت
ھمے ڈول ءَ 70 دھک ءَ بلوچ راج ءِ سیمی مستریں راجی سِلاھبندیں جُھد ءَ بلوچ راج ءَ گیشتر آگاھی ءُ سرپدی یے داتگ۔ بلوچ راج ءِ ھستی ءُ نیمرانیں جُھدکار واجہ ھیر بکش مری، اتا الہ مینگل ءُ میر گونس بکش بزنجو ءِ رھشونی 1973-88 ءِ آشوب ءَ بلوچ راج گیشتر سرپد کت کہ بلوچ ءَ گوں پاکستان ءَ ھچ وڑیں سْیادی یے نیست۔ پاکستان چہ ھندوستان ءِ بَھر ءُ ونڈ ءَ ودی بوتگ بلے بلوچستان ھچبر ھندوستان ءِ بھرے نہ بوتگ بلکیں یک وتواجھیں استانے اَت۔ 70 دھک ءِ راجی سِلاھبندیں جُھد سَک دیم ءَ شُتگ بِہ گِر داں ڈیرہ گازی ھان، مستونگ، کلات ھُزدار داں مکُران، روایرشُتی بلوچستان دمگاں بلوچ راج ءَ اے جُھد ءَ بَھر زورتگ البت لھتیں کاسگ چٹّیں سردار ءُ نواب انگت ءَ گوں دژمن ءَ ھوار اِت انت ءُ وتی ٹکر ءِ بلوچاں راجی جُھد ءِ بارو ءَ ھچ سرپدی ءُ آگاھی ودی اش نہ کتگ۔
بلوچ نودربر ءِ گل ءَ ھما مجگی گلام ءُ مجگی نادْراھیں ورناھیں بلوچ ھم راستیں دگاں سر کنائینتگ انت ھما چہ پاکستانی وانگجاھاں پاکسٹڈی ءَ چہ سد ءَ سد لمبر زورتگ۔ بلوچ نودربر گل ءَ شھدربرجاہ ءُ مزن شھدربرجاھاں شپ داں روج بلوچی ورناھاں راجی سرپدی داتگ ءُ بلوچ دمگ ءُ شھراں راج ءِ لس مھلوک ءِ تہ ءِ راجی جُھد ءِ بابت ءَ آگاھی ءُ سرپدی دات کہ ما زیردستیں راجے ایں ءُ گلامی ءِ جان ھلاسی گوں سِلاھبندیں جُھد ءَ ھمگرنچ انت۔
چَہ 2000 ءَ بُنگیجیں ھستیں وھد ءِ بلوچ راجی سِلاھبندیں جُھد ءَ بے کساس دیمروی کتگ انچوشکہ ھستیں وھد ءِ راجی جُھد ءَ ورنائیں بلوچ راھشون دیم ءَ آتکگ انت ءُ مرچیگیں راجی سِلاھبندیں جُھد ءَ بلوچستان ءِ ھر دمگ ءُ شھر ءِ بلوچ راج ءِ ورنائیں سرمچار ھوار انت چمیشکا ما جزم ایں کہ اے راجی جُھد باج بارت ءُ راج وتی ڈیھ وتواجہ بیت۔
چریشی ءَ مرچی بلوچ راج ءِ پیر ءُ ورنا، برات ءُ دزگْوھار ءُ کسان ءُ مزن تیوگیں راج ءَ سرپدی ھست کہ بلوچ وتی راجی جُھد ءَ دزگٹّ انت ءُ بلوچ یک زیردستیں راجے ءُ بلوچ راج ءِ راجی جُھد روچ پہ روچ دیمروی کنان انت۔
سرپدی ءُ آگاھی ھر راجی جُھد ءِ بُنکی آسراتی انت کہ راج ءِ چاگِردی وتی راجی جُنز ءِ بابت ءَ آگاہ ءُ سرپد بِہ بیت، گلامی ءِ مارشت راج ءِ تہ مُدام بِہ بنت کہ دژمن گوں راج ءَ چے کنگ ءَ انت ءُ راج ءِ سرمچار چے کنگ ءَ انت۔ اگاں راج ءِ تہ ءَ آگاھی بِہ بیت گُڑا راج ءِ سر ءَ بیتگیں زُلم راج ءِ جّھدکاراں گیشتری ءَ بز کنت۔ ڈُنک وھیل ءَ شھید ملکناز ءُ برمش ءِ ٹپی بیگ ءَ راج ءَ گیشتر سرپد بیتگ کہ بلوچ راج ءِ سر ءَ زُلم ءُ زوراکی ءَ کَی دست مان انت اے وھیل ءِ ھلاپ ءَ زھرشانی ءُ روانک ءَ راج ءِ تہ ءَ گیشتر آگاھی آؤرتگ ءُ ھمے داب ءَ بلوچ راج یکشل ءَ آگاہ کنگ لوٹ ایت داں بلوچ وتی آجوئیں ڈیھ ءِ وتواجہ مہ بیت۔
راج شالا آجو بات، بلوچستان زندگ بات ءُ کاسگ چٹّ ءُ گلامی ءَ شالا مُدام پِٹ بات۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت