شھید سباہ دشتیاری کندیل بلوچ – زھیر بلوچ

نبشتانک: شهید سباه دشتیاری کندیل بلوچ

نبشتہ کار :زهیر بلوچ

دی بلوچستان پوسٹ

همُک چاگرد ءِ دیمروی ءِ واستا وانگ ءُ زانگ اژدری ءُ بُن هیشت انت.
دُگنیا ءِ تہ ءَ کوم ءُ راجاں دیمروی کُتگ کہ آهاں وانگ ءُ زانگ ءَ کیشتر ارزشت داتگ. وانگ ءُ زانگ ءِ پِڑ ءَ مستریں اُستاد ءُ رهشونانی انت. اُستاد ءُ رهبر وتی کوم ءِ ورنا ءُ نودربراں وتی راجی راجدپتر ءُ راجی آجوئی ءَ هوار چاگردی ءُ دگنیائی آشنائی ءُ سرپدی دے اَنت.
پمیشکس مرچی بلوچ راج ءِ ھستیں بدواه پہ زانت بلوچ راج ءِ اُستاد ءُ رهشون ، ادیباں، زانتکاراں، نبشتہ کاراں شهید کنت یا بیگواه کنت ءُ زندانیگ کنت.
شهید سباه دشتیاری هما اُستاد ، ادیب ءُ زانتکاراں چہ یکے کہ وتی کومی ءُ راجی گلامی ءِ مار اتگ ءُ جیڑ اتگ. شهید ءَ وتی راج ءِ ورنا ءُ نودربراں وتی راجی آجوئی ءِ هاتر ءَ زانشتی سِنچ ءُ بود بکشاتگ ءُ آشنائی ئِے داتگ. شهید سباه یک نہ تُرسیں ءُ راست گُشیں اُستادے ات شهید ءَ روچ ءُ شپ وتی راجی آجوئی ءَ پہ جھد کُت داں گُڈی ساه ءَ گلامی ءِ سوچنیں درداں شهید ءِ بالاد سُمبیتگ.
شهید یک پروپیسرے ءَ هوار شاه زانت ءُ ادیب ءُ شائرے ات.
شهید ءَ شھدربر ءُ مزن شھدربراں هوار لبزانک ءِ پِڑ ءَ اوں وتی ورنا ءُ نودربراناں پہ بلوچ ءِ وت واجھی ءَ سِکین داتگ. وتی راج ءِ دِرتہ پُچی ، بزگی ، بیوسی ، لگتمالی ءُ گلامی ءِ مارشت داتگ ءُ پہ بلوچ ءَ رُژنائیں باندات ءِ واب ءُ شهور بکشاتگ.
شهید سباه دشتیاری یک تچکیں ، ایمانداریں ءُ سِتکہ دلیں جھدکارے ءُ اُستادے ات پہ بلوچ راج ءِ اُکبالانی واستا دائم چو کوه ءَ مِک ات.
شهید ءَ زانتگ ات کہ بدواه آئی ءَ تاوان دنت آئی ساه ءُ جان ءَ تاوان دنت بلے پد ءَ اوں وتئی کومی آجوئی ءَ چہ پَد نہ کِنز ات.
اے گپ راست انت کہ مزن شانیں رهشون وش بهتیں راجانی تہ ءَ ودی بنت منی دل ءَ بلوچ راج اوں وش بهتے کہ چُشیں ازیمیں رهشون ءُ رهبریں استاد بلوچ راج ءِ تہ ءَ ودی بوتگ.
بدواه ءَ زانتگ کہ سهید سباه ءِ پکر ءُ زانت پہ آئی ءَ تاوان انت پمیشکا بدواه ءَ زوت بلوچ راج ءِ تھاریں شپانی کندیل جسمانی دروشم ءَ چہ بلوچ راج ءَ پُل ات.
شهید سباه بلوچ راج ءِ رژناهیں کندیل انت نوں اے ناسرپدیں بدواه ءَ کَے سرپد بکنت کہ سِنچ ءُ بود هجبر شهید کنگ ءَ هلاس نہ بنت.
اے کندیل داں ابد مان انت
اے همیں شهیدانی رتکگیں هونانی مُز انت کہ بلوچ راج وتی راجی وتواجھی ءُ وتی گلامی ءِ هلاپ ءَ جھد ءَ انت ءُ وتی مرادانی منزل ءَ جنزان انت. شهید سباه دشتیاری همک ورنا ءُ نودربرے ءِ تہ ءَ داں ابد زندگ انت ، شهید ءِ زانت پکر داں ابد مئے راج ءِ ورنایانی رهشونی ءُ رهبری ءَ کنت.
مرچی همک سَکی ءُ سوریاں ابید بلوچ راج وتئی راجی آجوئی ءَ پہ سوبمندی جُنزان انت اے همیں کندیلانی رُژن انت کہ بلوچ ورنا ءُ نودربرانی تھاریں شپاں همبراه انت ءُ روچ کنان انت.
شهید سباه دستیاری کندیل بلوچ نمیران انت . بلوچستان آجو بات بلوچ راج وتواجہ بات.

سَتم نہ انت کہ بہ بیت گُرک مئے پسانی میار
بلے کہ رهزنی هر رنگ ءَ رهشون کن انت
شهید سباه کندیل بلوچ

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔