زھری ءَ یک لیوز کارندے ءِ کوش ءُ دو زدگ کنگ ئے زمہ واری بی ایل اے ءَ منّ اِتگ اَنت

زھری ءَ یک لیوز کارندے ءِ کوش ءُ دو زدگ کنگ ئے زمہ واری بی ایل اے ءَ منّ اِتگ اَنت

دی بلوچستان پوسٹ

بلوچ لبریشن آرمی ءِ جارکش جیئند بلوچ ءَ ناشناسیں جاھے ءَ رسانکدراں شنگ کرتگیں بیان ءِ تہءَ گْوشتگ اَت کہ ھزدار ءِ دمگ زھری ءَ بیتگیں اُرش ءِ زمہ واری منّ اِتگ ءُ گْوشتگ کہ سرمچاراں ھزدار زھری نورگامہ بازار ءِ ھند ءَ تیرگواری کرتگ ءُ چیریں ادارھانی واستا کارکنوکیں لیویز ءِ یک کارمندے کُشتگ ءُ دو زدگ کرتگ اَنت –

جارکش ءَ گْوشت کہ سرمچاراں تیرگواری ءَ بیران بیتگیں سلمان ءُ زدگ بیتگیں ریاز ءُ شبیر بازیں وھدے ءَ چَہ بلوچ لبریشن آرمی ءِ “ھٹ لسٹ ” چم ءِ چیر ءَ بیتگ اَنت – جتگیں مردمانی تہ ءَ گیشتر ریاز پاکستانی لشکر ءِ گوشگ ءَ بلوچ راجی جنز ءِ ھلاپ ءَ ترامگام بیتگ – جتگیں مردم لیویز لشکر ءَ زھری ءُ کش ءُ گوری دمگاں بلوچ آجوئی لوٹوکیں مردمانی چاری گری ءَ بیتگ اَنت -اے زرمبشت دشمن بگیریاں آیاں نا ایوک ءَ پاکستانی چیریں ادارھانی بلکیں دمگی نام گپتیں میر ءُ سردار ءُ نیکراھی ناشریں ٹولیانی سروکی ءَ کنگ ءَ بیتگ اَنت –

آئی ءَ گْوشت کہ زرمبشت ءِ بگیری ءَ داشتگیں لیویز کارمندانی اے ٹولی ءِ سروکی ءَ زدگ بیتگین ریاز کنگ ءَ بیتگ -اے ٹولی نا ایوک ءَ بلوچ زرمبشت ءِ بگیری ءِ ترامگامیاں دزمانجن بیتگ اَنت بلیں اے منشیات پروشی، ملامگری، دُزی ءُ ڈنگیاں ھوار دمگ ءَ چاگردی بدکاریاں ھوار بیتگ اَنت ءُ بلوچ مھلوک ءِ زندمان اِش بیزار کرتگ اِت –

جیئند بلوچ ءَ گْوشت بلوچ لبریشن آرمی ءَ گوستگیں سال ءِ بیست ءُ ھشت جون دوھزار ءُ نوزدہ ءَ زھری لیویز ءِ لائن آپسر عطاء اللہ زھری نشانگ کنگ ءَ پد راج سرپد کرتگ دشمن لیویز لشکر ءَ بلوچ آجوئی لوٹوکیں مردمانی بگیری ءَ تچک تچک کاربندگ اِنت ءُ لیویز لشکر ءَ را گل ءَ گڈی بر ءَ سرپدی کرتگ کہ دشمن ءِ کجام ھم لشکری اداراھے ءِ تہ ءَ اِت گیشتر پولیس ءُ لیویز بلوچ دشمنی ءِ سر ءَ مانگیجگ بنت، بلے پولیس ءُ لیویز گیشتر بلوچ ءِ بوھگے سر ءَ ھمے مانزمانی ءَ یلہ کنگ بیتگ اَنت اشانی سر ءَ مپت ءَ اُرش کنگ نہ بیت ءُ آ ھرچ چیز ءَ وت ءَ جتا بہ کن اَنت “

بلے بلوچ لبریشن آرمی ءِ اے سرپدی ءَ ابید بازیں لیویز کارمند جتا لیکہ دارگ ءَ ابید سرجم ءَ دشمنیں لشکر ءِ چیر ءَ پُتریتگ ءَ بلوچ جنز ءِ ھلاپ ءَ اوشتوک اَنت -مروچی بی ایل اے اے وڑیں کارمندانی شناسی ءَ کنت ءُ آیانی سر ءَ اُرش کرتگ -اے اُرش ءَ زدگ بیتگیں ءُ رکیتگیں لیویز کارمند انگت ءَ بی ایل اے ءِ چم ءِ چیر ءَ اَنت زوت آ وتی کردماناں رسینگ بنت –

جارکش ءَ گْوشت کہ بی ایل اے ءَ انگت ءَ پولیس ءُ لیویز ءِ کارمندانی سر ءَ مپت ءَ اُرش کنگ ءَ وتی پابندیانی سر ءَ اُشتوک اِنت، بلے اگاں اے ادارھانی نیمگ ءَ بلوچ دشمنی ترامگامیانی تہ ءَ گیشی اتک گڑا ما ھم وتی شَوراں مَٹینت کُت کن ایں –