شال ءَ ائید ءِ روچ ءَ بیگواھیں مردمانی واستا زھرشانی

شال ءَ ائید ءِ روچ ءَ بیگواھیں مردمانی واستا زھرشانی

دی بلوچستان پوسٹ

بلوچستان ءَ زورانسری بیگواھیانی کَچ دو دھک ءَ چَہ برجاہ اِنت -نواب اکبر ھان بگٹی ءِ شھیدی ءَ پد زورانسری مردمانی بیگواہ کنگ ءُ چریشی ءَ پد آیانی لَٹ شاپ کرتگیں جونانی دزکپگ بندات بیتگ –

وائس فار بلوچ مسنگ پرسنز یک دھکے ءَ چَہ گیش زورانسری بیگواہ کرتگیں مردمانی واستا زھرشانی کنگ اِنت -گل ءِ نیمگ ءَ شال ءُ کراچی ءِ پریس کلبانی دیم ءَ ھمک وھد ءَ زھرشانی بیگ اِنت وھدیکہ شال داں کراچی داں اسلام آباد ءَ گل ءِ مردماں پندی روان بُریتگ –

بنجاھی شھر شال ءَ مروچی کسانوکیں ائید ءِ روچ ءَ ھم وی بی ایم پی ءَ پریس کلب ءِ دیم ءَ زھرشانی کرتگ – ایشی ءِ ھمراھی ءَ بیگواھیں مردمانی زھرشانی بنجل ءَ 3ھزار9سد ءُ شست ءُ ھشت روچ سرجم بیتگ –

زھرشانی ءَ بلوچستان ءَ چَہ جتائیں دمگاں سیادی کنوکیں بیگواھیں مردمانی کھولاں بھر زرتگ – زھرشانی ءِ سروکی وائس فار بلوچ مسنگ پرسنز ءِ کسان کمک سرکماش ماما قدیر بلوچ ءَ کرتگ وھدیکہ ہیومین رائٹس کونسل آف بلوچستان ءِ بی بی گل بلوچ ءُ بلوچستان نیشنل پاٹی ءِ شمائلہ اسمائیل ءُ دگہ مردماں بھر زرتگ –

وائس فار بلوچ مسنگ پرسنز ءِ رھشون ماما قدیر بلوچ ءَ گْوشت کہ ھمک سالانی وڑ ءَ اے سال ءَ ھم بیگواھیں مردمانی کھول وتی دوستیگیں مردمانی یلہ کنائینگ ءَ زھرشانی کنگ ءَ اَنت پرچاکہ دوستیگیں مردمانی دوری ءَ ھچ کسے ءِ ائید ءِ وشی سرجم بیت نہ کن آں –

آئی ءَ گْوشت کہ اے ائید ءِ وھد ءَ بیگواھیں مردمانی یل کنگ ءَ ابید گیشی گندگ پیداک اِنت -ھزارانی بیگواھیں مردمانی واستا جوانیں گام گندگ بیگ ءَ نہ اِنت -میان اُستمانی ادارہ اے درگت ءَ وھد پہ وھد ءَ گپ کنگ ءَ اَنت بلے آیاں جوان ءُ مھکمیں رنگے ءَ گامگیج زورگی اِنت –

ماما قدیر ءَ گْوشت کہ میان اُستمانی ادارہ پاکستان ءَ زری کمک ءَ ابید ایشی ءِ سر ءَ کڈن کنگی اِنت انسانی ھکانی لگتمالی ءِ سر ءَ بندش جنگی اِنت –

شال ءِ پریس کلب ءِ دیم ءَ کھولانی دست ءَ وتی دوستیگیں بیگواھیں مردمانی اکس بیتگ ءُ بیگواھیں مردمانی یلہ کنائینگ ءِ اوگام جتگ –

بی این پی ءِ شمائلہ اسمائیل ءَ ھمے وھد ءَ گْوشت کہ مارا گوشگ بہ بیت کہ اے مردمانی چی کسور بیتگ کہ بیگواہ کنگ بیتگ اَنت ءُ اے مردماں چی ءَ آمدگساں پیش کنگ ءَ نہ اِنت –

شمائلہ اسمائیل ءَ گْوشت کہ مارا وتی دوستیگیں مردمانی مانشجاھانی باور ءَ سرپدی نیست بلے ما اے زھرشانی ءِ بارو ءَ سرپدی داریں ھمے سوب اِنت کہ ما زالبول کائیں اِد ءَ وتی رنج ءُ گماں تالان کن ایں تانکہ ما وتی توار ءَ میان اُستمان ءَ سر بہ کن ایں –

چریشی ءَ پد نوکیں کاھان ءَ ماما قدیر بلوچ ءِ سروکی ءَ مانشجاھانی سر ءَ روگ ءُ اود ءَ شھیدانی ابدمانی ءِ وش دروھتی ءَ دوا کنگ بیتگ –

ھمے وھد ءَ ماما قدیر بلوچ ءَ گْوشت کہ اے ھما شھید اَنت کہ چیریں ادارھانی مردماں برتگ اَنت ءُ لَٹ شاپ کرتگیِ جون دور داتگ ءُ لھتے ھنچیں شھید اے مانشانی تہ ءَ واب اِنت کہ آیانی جون بے کساس ءَ لٹ دیگ ءُ دور دیگ بیتگ اَنت ءُ چریشی ءِ سوب ءَ پجار ھم نہ بیتگ اَنت –

آئی ءَ گْوشت کہ من انسانی ھکانی ادارھاں دلگوش کنگ لوٹ آں کہ بلوچ شھیدانی مانشانی شَت ھم دور دیگ بیگ ءَ اَنت ءُ ریاستی ادارھانء نیمگ ءَ مانشانی کمشرپی بیگ ءَ اِنت –