نبشتانک:ائید ءُ گاریں مردُمانی کھول
نبشتہ کار:طیبہ بلوچ
دی بلوچستان پوسٹ
بنی آدم چوناھیگا وشیانی تلبگار اِنت ، آ ھر وھد ءَ لوٹ اِیت کہ آئرا وشی بہ رس اِیت ، چی ءَ کہ ھچ کس ءَ گم ءُ سکی دوست نہ بیت ۔ ھمے ھاتر ءَ چہ زند ءِ دزگٹّیاں در آیگ ءُ وشیانی ھاتر ءَ راجی ءُ نیکراھی وشیانی روچاں برجم دار اَنت ۔ ھمے داب ءَ ھِندو ھولی ، اِیسائی کرسمس ءُ مسلمان ائید ءِ پیمیں وشیانی روچ ءَ جم دار اَنت۔
پہ مسلمان ءُ اسلام ءِ نیکراہ ءِ ھاتر ءَ ائید ھما وشیں روچ اِنت کہ ھر مسلمان آئی ودار ءَ سرجمیں سال ءَ کنت ، ھمُک کسان ءُ مزن ، پیر ءُ ورنا گوں بے تاھِیری ءَ ائید ءِ وشیانی لوٹوک بَہ اَنت ۔
بلے! اے دگنیا ءِ تہ ءَ زمینی ٹُکرے ھست کہ بلوچستان ءِ نام ءَ زانگ بیت ، اگاں ما بِہ چار ایں اُود ءَ نِندوکیں مردُم گیشتر مسلمان ءُ آیانی نیکراہ (دین) اسلام انت۔
چوش کہ پہ اِیشاں ائید ءُ دگہ وشیانی روچ دیری رپتگ اَنت ، بلکیں بلوچانی وشیانی اِستال ھپتاد سال پیسر سستگ۔ اِد ءَ نِندوکیں مردُمانی بھت ءَ اَبید ودار ءُ ارسگیں چمّاں دِگہ ھچ نیست ، ھمُک لوگ ءِ رُوکیں چراگ زندان ءِ تھاریں کُوٹیانی باھوٹ اِنت ۔ آیانی پُشت ءَ آیانی مات ءُ پِت ، گْوھار ءُ تِپلیں زھگانی بھت ءَ ابید تْرونگلیں ارس ءِ گْوارگ ءَ دِگہ ھچ پشت نہ کپتگ۔ اِد ءَ کماشیں پِت وتی ورنائیں بچّاں گوں وتی دستاں مانِش ءِ باھوٹ کن اَنت ، اِد ءَ ماتانی رُوکیں چراگ ، گْوھارانی اُوست ءُ زالانی مَھرمیں ھمراہ نہ کتگیں گناھانی گناہ ءَ گار بَہ اَنت پد ءَ زندگی آسر بیت ، بلے ودار آسر نہ بیت ۔
اے زمین ءَ ھمے آسر نہ بوتگیں ودار ءِ کِسّہ انت کہ مِھلب ءُ اَلی ھیدر ءِ پیمیں کسان ءُ تِپلیں گْونڈو رُد اَنت لائک بَہ اَنت ، بلے اے ودار آسر بُوَگ ءِ نام ءَ نہ زانت ۔ اگاں اِد ءَ زھگانی کُودِکی پِت ءِ مھرانی ساھگ ءَ چہ دُور گْوز اِیت ، ھمے داب ءَ ماتانی پیری پہ وتی بچّانی شوھاز ءَ گْوز اِیت۔
اِد ءَ ھِچّ پہ ھِچّ ءَ پشت نہ کپتگ ، اِد ءَ چُک وتی پِت ءَ اکسانی تہ ءَ پجّا کار اَنت ، اِد ءَ زالانی مھرانی گُڈّی چیدگ تھنا یاتانی تہ ءَ پشت کپتگ اَنت۔ پِتانی پیری ءِ اسا ھم گار اَنت۔۔۔۔۔۔
وشی! ھو وشی ءِ ھرکس لوٹوک اِنت ، بلے ائید پہ گاریں مردُمانی کَھول ءُ وارِساں سک پدرد ءُ نہ وشیں روچے ۔اے روچ ءَ ھم کَھول گوں اکس ءُ دردانی ھمراھی ءَ پریس کلب ءُ دگانی سر ءَ ھمے اُوست ءَ زھرشانی کنان ءَ آسر کناں کہ بلکیں آیوکیں روچاں وشی مئے بھت ءَ بہ بیت ، بلے ھِچّ پہ ھِچّ۔
بلوچستان ءِ گاریں پُسّگانی کَھولانی وشی ، زند ءِ تاھِیر ءُ بچکند ھما بیگواھیں ھستیانی ھمراھی ءَ گار اَنت ، بس مردُمانی نسیب ءَ درد ، بزگی ءُ بے وسی ، ودار ءُ ارسانی ھار ءَ ابید دِگہ ھِچّ نہ منتگ۔۔۔۔
اے زمین ءِ گاریں مردُمانی کِسّہ چون اِنت ، کس ھِچ نہ زانت ۔ مکھیں ماتانی زند پہ ودار آسر بَہ اَنت ، بلے ودار آسر بُوَگ نہ زانت ؟
کسانیں زھگ پہ پِت ءِ دیدار ءِ اُمیت ءَ مزن بیت باریں اے اُمر ءَ دیدار نسیب بیت یا اِنّا ، نوک سوریں کاڑانی بھت ءَ جنوزامی لِکّ اِتگ یا آ ھمے اُمیت ءَ زندگی ءَ آسر کن کہ من جنوزام نہ آں ، منی مھرانی گُڈّی چیدگ الم کَیت ۔
باریں اے دردانی شپ آسر بیت یا نا ، آ بس تھنا ھمے اُمیت ءَ زندگ اِنت کہ الم یکروچے کَیت وشی منی در ءَ دست ٹُکّ اِیت۔۔۔۔۔۔۔۔
اے درد ءِ کِسہ آسر بیت یا نا ، بلے اے کِسّہ ءِ جِند بیگواہ اِنت ، دُرس بیگواہ اَنت ، ائید بیگواہ ، وشی ءُ بچکند بیگواہ ، پشت کپتگ بس کھریں ودار۔۔۔۔۔۔۔۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔