بلوچستان ءِ جتائیں جاھاں پنچ مردم لشکری بندیگ جاھاں یل کنگ یکے ءِ جاور نگیگ، یک مردمے بیگواہ

سر بیتگیں ھالانی رد ءَ گوستگیں روچاں مند ءِ دمگ بلوچ آباد ءَ آوار جنگ بیتگیں ماجد ء ھسین، ھسن ء ھامد ءُ جاوید ءِ گوھرام گوستگیں شپ ءَ مند سورو ءَ ایپ سی ءِ بنجل ءَ یلہ کنگ بیتگ اَنت –

یلہ کنگ بیتگیں جاوید ء گوھرام پاکستانی لشکر ءَ زنداناں لٹ شاپ کرتگ ءُ آئی ءِ جاور نگیگ اَنت –

دمگی مردماں ٹی نی پی ءَ گوں گپ کنان ءَ گْوشتگ کہ لشکر ءَ ھرسئیں مردم یلہ کرتگ اَنت بلئے جاوید بے کساس لٹ شاپ کنگ بیتگ ءُ آئی ءِ جاور ھَنچش نگیگ اَنت ءُ آ ٹپانی درمان کنگ ءَ تربت ءَ برگ بیتگ –

دمگی مردماں گْوشت کہ تربت ءِ ڈاکٹرانی گوشگ اِنت کہ جاوید بے کساس جنگ ءُ کرنٹ جنگ بیتگ ایشی ءِ جاندراھی مئے گون ءَ نہ بیت ءُ ایشی ءَ مارا چَہ مستریں نادراہ جاھے ءَ برت کہ ایشی ءِ زندمان ءَ رکگ ءِ باز مُشکل اِنت –

ھمے وڑ ءَ گوستگیں روچ ءَ کیچ ناسر آباد ءَ بیڑی ءِ وھد ءَ آوار جنگ بیتگیں میراج کریم ءُ امران کریم کہ ھردوک برات اَنت مروچی ھم لشکری زنداناں چَہ یلہ کنگ بیتگ اَنت –

ھمے وڑ ءَ تمپ سرنکن ءَ لشکر ءِ دست ءَ گوستگیں روچاں آوار جنگ بیتگیں الی ھیدر ھم مروچی لشکری زنداناں چَہ چُٹ اِتگ ءُ وتی لوگ ءَ سر بیتگ –

دومی نیمگ ءَ ھاران ءِ دمگ گواش ءَ پاکستانی لشکر ءَ سمی اُلا ء سنا اُلا کبدانی آوار جتگ ءُ برتگ-

زانگ بہ بیت بلوچستان ءِ جتائیں جاھاں پاکستانی لشکر ءِ زوراکیانی تہ ءَ گیشی اتکگ ءُ ھمک وھد ءَ اے ھال سربیگ ءَ اَنت کہ مردم آوار جنگ ءُ یلہ بیگ ءَ پد نیم زندی جاورانی آماچ اَنت –

دومی نیمگ ءنیمگ ءَ نیمگ ءَ نیشنل پاٹی ءِ بنجاھی جار ءَ گوشگ بیتگ کہ بیگواھیں مردمانی واستا مروچی ءَ داں اَئید ءِ شپ ءَ چاگردی رسانکجاھاں ساھت نھ ءَ داں یک ءَ کیمپئنے ءِ بندات کنت ءَ آئی ءِ رد ءَ ھمک روچ دَہ ٹویٹ ءُ سَے ءَ پنچ پیس بکی پوسٹ کنت –

جار ءَ گوشگ بیتگ کہ چاگردی رسانکجاہ کمپئن ءِ گڈی ءِ سرجمیں ھالاں بنجاھی پتر ءَ یکجاہ کنت –

جار ءَ گوشگ بیتگ کہ سرجمیں مھلوک ءُ انسان دوستیں مردم اے کمپئن ءَ داں ائید ءِ شپ ءَ بھر بہ زور اَنت