بلوچ نودربرانی سر ءَ اُرش
ٹی بی پی شونگال
وائس فار بلوچ مسنگ پرسنز ءِ کمک کار مستر ماما کدیر بلوچ ءَ پانزدہ مئی ءِ روچ ءَ بیگواھیں بلوچانی درگت ءَ نوکیں لَڑ رسانکدر ءَ داتگ اَنت ۔
یک ٹوئٹے تھءَ آئی ءَ گُشتگ کہ گوستگیں بیست ءُ چار ساھتانی نیام ءَ بلوچستان ءِ جتا جتائیں دمگاں چہ کم چہ کم یازدہ مردم دزگیر کنگ ءُ بیگواہ کنگ بیتگ اَنت۔ آئی ءَ زوریں بیگواھی ءِ بھتام پاکستان ءِ زوراکتریں چیریں ترامگیج انٹر سروس انٹیلینجس ( آئی ایس آئی ) ءِ سر ءَ جتگ ۔
ماما کدیر ءِ شنگ کتگیں لَڑ ءَ پد ٹی بی پی ءَ داں آدینگ ءِ روچ ءَ دگہ یازدہ مردمانی زوریں بیگواھی ءِ اھوال شنگ کُتگ۔
چہ ایشی ءَ سرجمیں کساس تھنا ھمے یکیں ھپتگ ءِ تھ ءَ بیمناکیں ھدی ءَ ود اتگ ءُ بیست ءُ دو مردم ءَ سر بیتگ ۔ گوستگیں ھپتگ ءَ بلوچستان ءَ چہ ھمک روچ ءِ ھساب ءَ سَے مردم دزگیر کنگ ءَ پد بیگواہ کنگ بیتگ۔
اے زوریں بیگواھیانی درپشوکیں یک پیم ءَ اے دراھیں مردمانی سند اِنت، اے درستیں ورنا نودربر اَنت ءُ ایشی ءَ گیشتر جیڑگی گپ اِیش اِنت کہ بیگواھانی تھ ءَ کم چہ کم سَے مزن شھدربرجاہ ءِ بیچلر ءُ ایم فل ءِ نودربر اَنت ۔
دوازدہ مئی ءَ بھاؤالدین ذکریا مزن شھدربرجاہ ملتان ءِ نودربر ناسر بلوچ ءُ لوامز مزن شھدربرجاہ اوتھل ءِ نودربر جھانزیب بلوچ چہ آیانی بُنکی دمگ کیچ ءَ چہ بوت کنت کہ کانودانی پاسداری کنوکیں استانی ترامگیجاں بیگواہ کُتگ اَنت۔
یک روچے ءَ پد علامہ اقبال اوپن شھدربرجاہ اسلام آباد ءِ ایم فل ءِ نودربر سنا بلوچ سلاہ بندیں مردماں سلاہ ءِ زور ءَ بیگواہ کُتگ ءُ گوں وت بُرتگ۔ آئی ءِ کھول مردماں بیگواھی ءِ بھتام پاکستانی لشکر ءِ سر ءَ جتگ۔
سنا بلوچ ءِ زوریں بیگواھی ءَ پد آئی ءِ سیاد ءُ وارس ، بلوچ نودربر ءُ بلوچستان ءِ ادبی تک ءَ مزنیں زھر ءُ بژن ءِ گندگ ءَ کیت۔ سنا بلوچ وتی بُنکی ھنکین ھاران ءَ یک لبزانکی گلے پاگواجہ بیتگ۔ “نسیر کبدانی لبزانکی دیوان” ءِ نام ءَ زانگ بیوکیں لبزانکی گل بلوچی زبان ءِ دیمروی ءِ ھاتر ءَ جوانیں رنگ ءَ کار بیتگ۔
آئی ءِ زوریں بیگواھی ءِ بیگ ءَ بلوچ نودربرانی بژن ءُ زھر گندگ بیتگ اَنت کہ وتی زھرشانی ءِ درشان ءَ چاگردی رسانکدر ءِ تند جاہ ٹوئٹر ءَ کنگ ءَ بیتگ اَنت، آئی ءِ تھ ءَ بلوچ نودربرانی ھلاپ ءَ استان ءِ زوراکی ءِ سر ءَ ایراد گرگ بیتگ۔
پاکستان ءَ داں شپ ءِ نیم ءَ #SaveSanaBaloch ءِ نام ءَ ھیشٹیگ بُرز تر ءَ ٹرینڈگ کنگ ءَ بیتگ۔
سرجمیں بلوچستان ءَ بلوچستان نودربرانی بیگواھی ءِ تھ ءَ گیشی ءِ سر ءَ انسانی ھکانی گلانی یک شلیں ھاموشی، آیانی گیر زمہ واری ءُ بے وسی ءِ درشان اِنت۔ یک ھپتگے ءِ تھ ءَ بیست ءُ دو مردم بیگواہ بیتگ، بلے داں انگت نا دمگی ءُ نا جھانی گل ءِ نیمگ ءَ ایر جنگ ھم نہ بیتگ۔