نبشانک: بلوچ راج ءُ آئی ءِ راجی زبان
نبشتہ کار: ھارس اَلی بلوچ
دی بلوچستان پوسٹ
جھان ءِ دگریں راجانی وڑ ءَ بلوچ راج ءَ ھم یک پیلوئیں، بلکیں شاھگانیں زبانے ھست۔ پد ءَ گیدی ءِ دگریں زبانانی ڈول ءَ بلوچی زبان ءَ ھم یک راست، تچک ءُ پیلوئیں نبشتہ ءِ رھبندے بزاں سْیاھگے ھم ھست انت ئِے۔
ماتی زبان ءِ سْیاھگ ٹھینوک بلوچ راج ءِ راجی ربال ءُ ھستی نمیران ھُدامرزی واجہ سید زھور شاہ ھاشمی انت کہ بلوچ راج ءِ چاگردی ءِ تہ ءَ دْرپشوکیں استال ءِ نام ءَ زانگ بیت۔ واجہ زھور شاہ ءَ پہ ماتی زبان ءِ سْیاھگ ءَ بے کساس پٹ ءُ پول کت چمیشکا پہ بلوچ راج ءِ ماتی زبان ءَ یک پیلوئیں رھبندے بکش ءَ ات ئِے ءُ وت ءَ را ابدمان ئِے کت۔
چہ سید زھور شاہ ھاشمی ءِ شپ ءُ روچ زھمتکشی ءِ سوب ءَ بلوچ راج چہ دگنیا ءِ درستاں چہ راست تریں نبشتہ سْیاھگے ءِ واھند انت کہ زبان ءِ سْیاھگ ءَ ھچ وڑیں ردی مان نیست انت ئِے انچوشکہ یک زبانزانتے زان ایت کہ ھندی ءُ انگریزی ءِ سْیاھگ چہ رَدیاں سر ریچ انت بلے ھپ انت کہ بلوچی زبان یک زیردستیں راجے ءِ زبان انت چریشی ءَ آئی ءِ زبان ءَ را سرکاری درجگ نہ انت پمیشکا بلوچ راج ءِ پدریچ ءَ را ماں وانگجاھاں یک ناشناسیں زبانے بزاں پارسی، ھندی ءُ سندھی وانینگ بیگ انت چمیشکا بلوچ چاگردی پارسی ءُ ھندی ءَ بیڑ ترینت۔
بلوچ چہ پارسی ءُ ھندی ءِ گِندگُش، روتاک ءُ ماں کارجاہ ءُ کارگساں چہ درآمدیگی زباناں ءَ بے وس اِنت چریشی ءِ آسر ءَ بلوچ راج گوں وتی ماتی زبان ءَ ناشناس انت بزاں ماتی زبان ءِ نبیسّگ ءَ ھیل نہ انت ءُ شَری ءَ یک کسانیں گالرِدے نبشتہ کت نہ کنت۔
بلے بلوچی یک پیِلو ءُ شھگانیں زبانیں پمیشکا ناں کہ چہ ھندی ءَ نیکہ چہ پارسی، ھندی ءُ انگریزی ءَ وازمند بیت۔ چوناھا من پارسی، انگریزی، ھندی ءُ بلوچی وانگ ءُ نبیسّگ ءَ بلد آں بلے من لھتیں دگریں زبانانی بارو ءَ ھم تپاس ءُ شوھاز کت۔ پد ءَ من ءَ مار ات کہ چہ دگنیا ءِ درستاں ارزان ءُ راستیں سْیاھگ بلوچی ئیگ انت۔
دگریں زبانانی وڑ ءَ بلوچی زبان ھم ماں وانگجاھاں وانگ لوٹ ایت ءُ آئی ءِ ھم وانگی گوں درونت ءُ تبک ھست انت کہ نودربراں وانینگ بِہ بنت بلے بلوچ یک گلامے انچوشکہ کہ گلامیں راج چہ وتی راجی زباناں زبھر کنگ بنت ھمے وڑ ءَ بلوچ راج ھم چہ وتی ماتی ءُ راجی زبان ءِ وانگ ءَ زبھر انت۔
البت بلوچی بلوچ راج ءِ ماتی زبان انت پمیشکا ابرمی ءَ بلوچ بلوچی ءَ گپ ءُ دلگوش کت کنت چی ءَ کہ مات ءُ بلوچ چاگِردی ءَ ساری ءَ مارا بلوچی ءِ ھبر کنگ ءَ بلد ءُ زبر کنائینت، اگاں یک بلوچے پارسی، انگریزی ءُ ھندی ءِ وانگ ءَ ماں وانگجاھاں دزگٹّ بیت گُڑا آئی ءَ را کساس پنچ سال پہ ھمے زبانانی وانگ ءُ نبیسّگ ءِ ھیل کنگ ءَ لوٹ ایت، بلے پہ بلوچی وانگ ءُ نبیسگ ءَ بلوچ ءَ را چہ سَے روچ ءَ گیشتر مان نئیت چی ءَ کہ آ دگریں زبانے وَ وانگ ءَ نہ انت بلکیں وتی جند ءِ ماتی انامت بزاں بلوچی زبان ءِ وانگ ءُ نبیسّگ ءَ ھیل کنگ انت۔
بژن انت کہ توری روایرشُتی زیردستیں بلوچستان بِہ بیت توری رودرآتکی زیردستیں بلوچستان بِہ بیت بلوچ راج ءَ را وتی راجی زبان چہ دْراجیں وھدے ءَ ماں وانگجاھاں وانینگ نہ بوگ انت چمیشکا بلوچ لھم لھم ءَ چہ وتی ماتی زبان بلوچی دِیر ءُ گِستا بوان بوگ انت۔ باید انت بلوچ ورنا وتی ماتی زبان ءِ بستار ءُ ارزشت ءَ بِہ زان اَنت ءُ راجی زبان ءِ وانگ ءُ نبیسّگ ءَ ھیل بِہ کن انت انچوشکہ گیدی ءِ یک بلاھیں بتل انت کہ اگاں دژمن یک راجے ھلاس ءُ بیگواہ گنک لوٹ ایت گُڑا چہ درستاں پیش آئی ءِ زبان ءَ ھلاس کنت چی ءَ کہ زورآور زانت راجی زبان ءِ وانگ ءُ نبشتہ کنگ راج ءِ لس مھلوک ءَ راج دوست ءُ ڈیھ دوست کنت بزاں گلامی ءِ مارشتاں ودی کنت۔ ھپ انت کہ مرچاں گوں بلوچ راج ءَ ھمے وڑ ءَ بوگ انت بلے انگت بلوچ راج وتی تْرند وابی ءَ گار ءُ ملار انت ءُ زبان ءِ ھچ سُد ءُ سما نہ نیست انت ئِے۔
بیا ات برات ءُ گْوھاراں ماتی زبان ءِ وانگ ءُ نبیسّگ ءَ بندات کن ایں انچوش کہ بازیں بلوچ ورنائیں رھدربر ءُ زبان دوست ماں چاگردی رسانکدراں راجی زبان ءِ ھزمت گلائیش اَنت۔ آ پہ زبان ءِ دیمروی ءَ شمئے ھرچ وڑیں کُمک کنگ ءَ مُدام ساڑی انت پمیشکا باید انت پہ ماتی زبان ءِ دیمروی ءَ ما آیانی گَلاں ھوار بِہ بہ ایں، پیسر ءِ وت بلوچی وانگ ءَ بنا کن این ءُ بلوچی ءِ نبشتہ ءَ زان ایں پد ءَ ماتی زبان ءُ نبیسّگ ءَ ھیل کن این ءُ سْیاد ءُ وارساں بلوچی ءَ وانین ایں۔ وتی وٹس ایپی کلوہ ءُ پیگاماں ماں وتی ماتی زبان ءَ نبیس ایں ناں کہ ھندی ءُ انگریزی ءَ نبشتہ کن ایں۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔