بلوچ لبریشن آرمی ءِ سروک بشیر زیب ءَ چاگردی رسانکدر ءِ تندجاہ ٹوئیٹر ءَ نبشتگیں بیانے ءَ گُشتگ کہ یک نیمگے پاکستان ءُ آئی ءِ بدنام زمانگ ءِ چیریں ترامگیج آئی ایس آئی ءَ اوگانستان یک کشگ جاھے ءِ تھ ءَ مٹ کُتگ ءُ اوگان اُلس ءِ ھوناں گوں لیب کنگ ءَ اِنت، دومی نیمگ ءَ امریکہ ءُ یورپی ڈیھ پاکستان ءَ زور اوگانستان ءِ تھ ءَ وت ساچیں ایمنی ءِ جھد ءِ مستریں کارست پیشدارگ ءِ لانک بستگ اِش۔
آئی ءَ گیشتر گُشتگ اے مسکرائی دپتر ءِ تھ ءَ مھذبیں راجانی کرِد ءِ سر ءَ یک سیاھیں چیدگے ءِ وڑ ءَ یات کنگ بیت ۔
یات بہ بیت اوگانستان ءَ گوستگیں روچاں دو مزنیں تراک بیتگ کہ ایشانی تھ ءَ بازیں لس مردمے مرتگ، اولی تراک زھگانی نادراہ جاہ ءَ بیتگ ءُ دومی ننگرھار ءَ جنازہ ءِ نماز سر ءَ بیتگ.
اے تراکاں پد اوگانستان ءِ سروک اشرپ گنی ءَ وتی درشان ءِ تھ ءَ گوشتگ کہ تالبان وتی گُشتانی سر ءَ نہ اوشتاتگ ءُ انگت ھم لس مردم ءُ اوگان ءِ لشکر ءِ سر ءَ اُرش برجاہ داشتگ ۔ آئی ءَ دیمتر ءَ گوشتگ کہ نوں اوگان لشکر وتی پھزگی جنگ ءَ ابید تالبانانی جَنَگ ءِ ھاتر ءَ اُرش کنت۔