جوڑی یے گُد
فرانز کافکا
انگریزی رجانک: ایڈون موئر ءُ ویلہ
بلوچی رجانک: اصغر بلوچ
وھدے منی چم انچیں جوڑی یے گُد ءَ کپ اَنت آئی ءِ تکَ شرمان جتگ انت، شر شُول اِتگ،گْور ءَ بَْراھدار انت،گڑا من جیڑاں کہ اے گُد ءَ ھم یک روچے کْوھن بوگی ات؛ پد ءَ اے پُژ بندیت،استری ھم بوت نہ کنت؛ دنز ءَ بار بیت، پد ءَ امینچو دوچ ءِ پِر ، بروُش کنگ ھم نہ بیت۔ پہ اشی ءِ واستا کَے وت ءَ دلآپ کنت۔ کس ھم انچو داب ءَ نہ انت کہ شپ روچ یکیں جوڑی ءَ گْور ءَ بکنت ءُ بہ بنّدیت۔
پد ءَ من انچیں جنکے ءِ دیستگ آ سک شررنگ انت، آئی ءِ شوکیں بالاد، باریگیں ڈیل، تچکیں ملگور ءُ چو آپی مار ءَ اَنت؛ بے کساس ڈولدار انت۔ ھر وھد ءَ بچار ئِے آدینک ءِ دیم اوشتوک انتءُ وتی دیم ءَ چرپ کنگ ءَ انت ءُ چارگ ءَ ات۔
پد ءَ بچار شپے ءِ نیم ءَ چہ دَاوتے ءَ چہ اتکگ، آدینک ءَ چاریت کہ آدینک لگوشتگ، دنز ءُ دُتاں گپتگ، باریں چنت مردم ءَ اد ءَ وت ءَ چاریتگ، نوں انچوش کْوھن انت کہ کارے ءِ در ءَ نئیت۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔