بلوچستان ءِ جتاجتائیں دمگاں چہ ھپت مردم زورانسری آوار جنی ءِ نشانگ کنگ بیتگ اَنت وھدے یکے دو سال ءَ پد یل کنگ بیتگ-
آوار جنگ بیتگیں مردمانی تہ ءَ سرتاج، محمد ابراھیم، اسفند، محدالدین، دانیال، نور محمد ءُ طارق ھوار اَنت کہ جتاجتائیں وھداں زورانسری آوار جنی ءِ نشانگ کنگ بیتگ اَنت-
گیشیں ھالانی رِد ءَ گوادر ءِ جھمنندیں سرتاج خیربخش 03 ستمبر ءَ چہ پسنی گریڈ اسٹیشن ءَ بیگواہ کنگ بیتگ- ھمے وڑ چک نوشکی ءِ دمگ کلی شریف ءِ جھمنندیں محمد ابراھیم ء گل محمد 11 نومبر ءَ صاحبزادہ دگ نوشکی ءَ بیگواہ کنگ بیتگ-
ھمے وڑ گائیخان چوک ءِ جھمنندیں دو مردم ، اسفند ء علی محمد شاھوانی ءُ محدالدین ء علی محمد شاھوانی، 24 اکتوبر ءَ بیگواہ کنگ بیتگ اَنت- دوئیں مردمانی کھول ءَ تنی وھدے آیانی درگت ءَ ھچ وڑیں دز نہ کپتگ-
شال ءِ جھمنندیں دانیال ء امان اللہ ھم 15 نومبر ءَ بیگواہ کنگ بیتگ- دومی نیمگ ءَ پنجگور ءِ دمگ چہ پروم ءَ نور محمد ء ایوب 12 نومبر ءَ بیگواہ کنگ بیتگ- ھالانی رِد ءَ نور محمد اشی ءَ ساری ھم یکرندے بیگواہ کنگ بیتگ ءُ اے اشی ءِ دومی رند اِنت کہ بیگواہ کنگ بیگ ءَ اِنت-
ھمے وڑ پروم پنجگور ءِ دمگ شکاری بازار ءِ جھمنندیں طارق ء آدم 09 نومبر ءَ بیگواہ کنگ بیتگ اَنت-
دومی نیمگ ءَ بھزاد دلاوری ءِ یل بیگ ءِ ھال دیم ءَ اتکگ- دزکپتگیں ھالانی رِد ءَ بھزاد دلاوری کساس دو سال ءَ ساری بیگواہ کنگ بیتگ ءُ گوستگیں روچ ء یل کنگ بیتگ-
















































