بلوچستان ءِ ضلع نوشکی ءِ میتگ کلی جمالدینی ءَ پاکستانی لشکر ءُ ڈیتھ اسکواڈ ءِ کارمنداں لوگے ءِ سر ءَ اُرش کتگ ءُ زالبول لٹ ءُ کُٹ کتگ انت ءُ لوگ مانداشتگ۔
دمگی مردمانی رد ءَ گوستگیں روچ ءَ سرکار ءِ پلامرزیں ٹولی ءِ تیرگواری ءَ چہ بیران بیتگیں التاپ جمالدینی نامیں مردمے ءِ لوگ ءِ سر ءَ مرچی سھب ءَ پاکستانی لشکر ءُ ڈیتھ اسکواڈ ءِ کارمنداں ھما وھد ءَ بیڑ برتگ کہ پُرس ءِ پتر پچ بیتگ۔
چم دیستیں مردمانی رد ءَ اُود ءَ ساڑی ئیں مردم بیم آماچ کنگ ءِ ھواری ءَ لٹ ءُ کُٹ کنگ بیتگ انت، زھگ ءُ زالبول لٹ ءُ کُٹ کنگ ءَ پد لوگانی تہ ءَ بند کنگ بیتگ انت ءُ آ دگہ لوگ ءُ تمبو مانداشتگ انت۔
وئیل ءَ پد ھندی مردماں زھر ءِ درشان کتگ ءُ گشتگ کہ پولیس مردمانی پھازگ ءَ ابید میاربار ءُ سلکاری کنوکیں مردماں گوں ھمکار انت ءُ اے وڑیں وئیلانی دارگ ءَ بے سوب گندگ بیت۔