بلوچستان ءِ جتاجتائیں دمگاں ھپت مردم آوار جنگ ءُ سَے یل کنگ بیتگ اَنت-
گیشیں ھالانی رِد ءَ یک نومبر ءَ بلوچستان ءِ تیاب دپی شھر پسنی ءِ ھند شادی کور ءَ پاکستانی پوج ءَ کھدا گنج ء دلداد ءُ بیگمان ء دلدار آوار جنگ ءَ پد ءَ ناشناسیں جاھے ءَ برتگ، چریشی ءَ پد دوئیں بیگواہ اَنت ءُ دوئیں وت ماں وت براتاں-
دومی نیمگ ءَ 27 اکتوبر 2026 ءَ شال ءِ دمگ کلی قمبرانی، قمبرانی دگ ءَ چہ 15 سالی ئیں نودربر یحییٰ بلوچ ء پیر محمد شپ ءِ سے ءَ آیانی لوگ ءَ چہ آوار جتگ- دزکپتگیں سرپدیانی رِد ءَ اے وئیل ءَ آئی ایس آئی، ایم آئی ءُ سی ٹی ڈی ءِ کارندہ ھوار گوشگ بیگ ءَ اِنت-
ھمے وڑ پنجگور ءِ دمگ چہ پروم ءَ ُپنچ اکتوبر ءَ 18 سالی ئیں ڈرائیور زبیر بلوچ ء سید بلوچ چہ جیراک سیمسر ءَ نیمروچ ءَ دوازدہ ءَ آوار جتگ ءُ بیگواہ کتگ-
اے وئیل ءَ ایف سی کارندہ ھمگرنچی ءِ بھتام جنگ بیگ ءَ اِنت-
ھمے وڑ چہ شال ءِ دمگ ائیرپورٹ دگ سر ءَ الائیڈ اسکول ءِ نزیک ءَ 20 اگست 2026 ءَ 25 سالی ئیں محمد اعظم ء خدا داد شپ ءِ یک ءَ آوار جتگ ءُ زورانسری بیگواہ کتگ- آئی ءِ سیادی چہ منوجان دگ، شال ءَ اِنت ءُ آئی ءَ یک ریڈھی ءِ سر ءَ کار ءَ بیتگ-
ھمے گوشگ بیگ ءَ اِنت کہ آئی ایس آئی ءُ سی ٹی ڈی کارندھاں آوار جتگ-
ھمے وڑ 16 اکتوبر 2026 ءَ شال ءِ دمگ کرانی دگ ءَ 28 سالی ئیں دکاندار ظفر بلوچ ء حاجی غلام محمد سھب ءِ سے ءَ ایم آئی ءُ سی ٹی ڈی کارندھاں آوار جتگ ءُ بیگواہ کتگ-
دومی نیمگ ءَ بلوچستان ءِ جتاجتائیں دمگاں آوار جنگ بیتگیں چار بیگواھیں مردم یل کنگ بیتگ اَنت کہ آیانی تہ ءَ تربت ءِ دمگ آپسر ءَ سیادی داروکیں دو برات طیّب ناصر ء حاجی ناصر ءُ پزیر ناصر ء حاجی ناصر 17 اکتوبر 2026 ءَ آوارجتگ ءُ بیگواہ کتگ 25 اکتوبر چہ تربت ءَ یل بیتگ اَنت-
وھدے کہ کیچ ءِ دمگ چہ عمری کھن سامی ءَ سیادی داروکیں غلام جان بلوچ ء صالح محمد 27 مئی 2025 ءَ آوار جتگ ءُ بیگواہ کتگ کہ کس اس17 ماہ ءَ پد 27 اکتوبر 2026 ءَ چہ تربت ءَ یل بیتگ-
ھالانی رِد ءَ غلام جان بلوچ یل بیگ ءَ پد آ پولیس دست ءَ دیگ بیتگ-