تربت : پاکستانی چیریں ادارہ ءُ ڈیتھ اسکواڈ ءَ ھسپتال ءَ بیڑبرتگ نادُراہ ءُ کارداراں چہ زر ءُ موباھل برتگ اَنت

ھالانی رِد ءَ ڈیتھ اسکواڈ ءَ چیریں ادارھانی سادھیں پوشاکانی تہ ءِ کارندھاں ھسپتال ءِ جتاجتائیں وارڈز ءَ پٹ ءُ پول کتگ ءُ نادُراہ جُست ءُ پُرس کتگ اَنت-

بلوچستان ءِ دمگ کیچ ءِ بُنجاھی شھر تربت ءَ یک پرائیوٹ ھسپتالے ءِ سر ءَ ڈیتھ اسکواڈ ءُ چیریں ادارھانی کارندھاں یکجاھی ءَ بیڑبرتگ کہ اے میان ءَ یک نادُراھے ءُ آئی ءِ ھیالداروک ءَ چہ ھشتاد ھزار کلدار ءُ موباھل فون ءِ برگ ھال اِنت-

اِھوالکار ءِ رِد ءَ لھتے روچ ءَ ساری شپ ءِ کساس چار ءَ یک پرائیوٹ گاڑی ءَ ھسپتال ءَ سر بیتگ اَنت ءُ جتاجتائیں واڈز ءَ نادُراھانی کمرھانی پٹ ءُ پول کتگ اَنت، اے میان ءَ دشت ءُ تمپ ءَ چہ سیادی داروکیں بازیں مردمانی درگت ءَ نادُراہ جست ءُ پُرس کتگ اَنت-

ھالانی رِد ءَ کارندہ یک کمرھے ءَ ساڑی نادُراہ ءُ آئی ءِ ھیالداروک ءَ چہ ھشتاد ھزار کلدار ءُ موباھل پچ گپتگ برتگ اَنت، وھدے کہ ھسپتال ءِ کاؤنٹر ءَ چہ ریکارڈ گم وتی ھمراھی ءَ برگ ھال اِنت-

اِھوالکار ءِ رِد ءَ اے شپ ءَ دشت ءِ دمگ کنچتی ءَ ایف سی سر ءَ اُرش بیتگ، چریشی ءَ بازیں کارندھے ءِ بیرانی ھال دیم ءَ اتکگ بیتگ-

گوشگ بیگ ءَ اِنت کہ چیریں ادارھاں گمان بیتگ کہ اُرش ءِ میان ءَ ٹپی بیتگیں سرمچارے نادُراھجاہ ءَ الاج ھاتر ءَ بیت کنت اتکگ، چریشی ءَ پد نادُراھجاہ پٹ ءُ پول ءُ جُست پُرس کتگ-

دومی نیمگ ءَ ھمے شپ ءَ دشت ءِ دمگ چیرکنچتی ءَ ایف سی ءِ سر ءَ اُرش ءَ پد ڈگارانی سر ءَ کارکنوکیں پشتونیں مزدورانی سر ءَ ڈرون اُرش ءِ نشانگ کنگ ھال دیم ءَ اَتکگ اَت چریشی ءِ آسر ءَ دو مزدور بیران وھدے کہ شش ٹپی بیتگ اَنت-