ھزدار ءِ دمگ کرخ ءَ سلاہ بندیں مردماں لیویز تھانہ نشانگ جوڑ کتگ، تراک ءَ گیٹ تباہ بوتگ۔
گوستگیں روچ ءَ کرخ لیویز تھانہ ءِ سر ءَ سلاہ بندیں مردماں اُرش کتگ کہ اود ءَ تاں سھب ءَ لشکر ءُ سلاہ بندیں مردمانی نیام ءَ ترندیں جنگ ءُ چوپ برجاہ بوتگ۔ ھمے وھد ءَ اُرش کنوکاں تھانہ ءِ مستریں دروازگ ءَ تراکناکیں شورواں گوں تباہ کتگ۔
دمگی مردمانی رد ءَ تھانہ ءَ سی ٹی ڈی ءُ اے ٹی ایف ءِ کارندہ ھم ھوار بوتگ اَنت وھدے کہ لشکر ءَ ھم دمگ ءَ دیم ءَ روگ ءِ کوشست کتگ۔
ھالانی رد ءَ جنگ ءُ چوپ ءَ لشکر ءَ جانی تاوان رس اتگ بلے انگت ءَ واکداراں اے اُرش ءُ تاوان ءِ بابت ءَ ھچ وڑیں ھال ءُ اھوال شنگ نہ کتگ۔
دومی نیمگ ءَ کرخ ءِ دمگ ءَ شال ءُ کراچی ءِ راہ ءِ سر ءَ یک مزنیں پُھلے سلاہ بندیں مردماں گوں مزنیں مشینری ءَ تباہ کتگ ءُ ایشی ءَ پد راہ ءِ سر ءَ ٹریفک انگت ءَ سانمند اِنت۔