بلوچستان ءِ جتاجتائیں دمگ پاکستان ءِ لشکر ءِ آپریشن ءِ زد ءَ اَنت۔ اے دمگانی تہ ءَ دشت، تربت، مستونگ، خضدار، ہرنائی ہوار انت۔ گن شپ ہیلی کاپٹر، کواڈ کاپٹر ءُ بکتر بندیں گاڑی ءُ توپ خانہ آپریشن ءِ بھر انت۔
تربت ءِ دمگ ناصر آباد ءُ کش ءُ گوراں ءَ پاکستانی لشکر ءَ مروچی سھب ءَ آپریشن بندات کتگ ءُ آبادی ءُ جنگل آپریشن ءِ زد ءَ اَنت۔ دمگی وسیلگ ءِ رد ءَ سلاہ بندیں گلانی باسک بزاں ڈیتھ اسکواڈ ھم اے آپریشن ءِ بھر اَنت۔
دومی نیمگ ءَ تمپ ءِ ھوت اباد، کوہاڈ، کلاہو ءُ کش ءُ گوری دمگاں گوستگیں روچ ءَ چہ آپریشن برجاہ اِنت۔ مرچی دومی روچ اِنت کہ دمگ ءَ مزنیں کساسے ءَ فورسز آپریشن ءَ گوں بندوک اَنت۔
دومی نیمگ ءَ کیچ ءِ دشت ، چیر کنچتی ءِ دمگاں پاکستانی لشکر ءِ آپریشن ءَ سلاہ بندیں مردمانی نشانگ جوڑ کتگ انت کہ ایشی ءِ آسر ءَ پنچ کارندہ بیران بوگ ءِ ھال انت بلے انگت ءَ اے گپ ءِ پدرائی چہ واکداراں نہ بوتگ ۔
ایشی ءَ ابید مستونگ ءِ دمگ دشت ءُ پنگو ءَ پاکستانی اُرد ءِ سداں کارندہ آپریشن ءَ گوں دزبند اَنت، بکتربندیں گاڑی ءُ کواڈ کاپٹر آپریشن ءِ بھر اَنت۔
رپورٹانی ردا کلیں آبادی چہ لشکر ءِ انگیر ءَ انت۔
دومی نیمگ ءَ پاکستانی فوج ءِ گن شپ ھیلی کاپٹراں خضدار ءِ دمگ پیر عمر ءُ کش ءُ گوراں جتا جتائیں جاھاں ترندیں تیرگواری کتگ بلے تاوان ءِ بابت ءَ انگت ءَ ھچ وڑیں ھال ءُ اھوال سر نہ بوتگ۔
ہرنائی ءِ شاھرگ ءُ کش ءُ گوری دمگاں پاکستانی لشکر ءِ سداں کارندہ ھم پیادگ ءُ گاڑیانی تہ ءَ دیم ءَ روگ ءَ گندگ بیتگ اَنت۔بکتربندیں گاڑی ءُ توپ خانہ ھم فورسز ءِ ھمراھی ءَ آپریشن ءِ بھر اَنت۔
دومی نیمگ ءَ قلات ءِ منگچر ءِ دمگ سورو ءَ روڈ کلیئرنس ءَ گوں بندوکیں فورسز ءِ کارندہ گمانی اسنائپر اُرش ءَ نشانگ جوڑ کنگ بوتگ اَنت کہ ایشی ءِ تہ ءَ یک کارندہ ءِ بیرانی ءِ ھال بوتگ۔
مستونگ ءِ دمگ گرگینہ ءُ کش ءُ گوری دمگاں پاکستانی فوج ءِ کاروان ءِ تہ ءَ ہواریں کارندہ ہم سلاہ بندیں اُرش ءِ تہ ءَ نشانگ جوڑ کنگ بوتگ انت۔
گوستگیں روچ ءَ قلعہ عبداللہ ءِ دمگ گلستان ءَ پنکی ءَ تراک ءِ تہ ءَ ناشناسیں مردماں لشکر ءِ یک ھالیگیں چوکی یے تباہ کتگ۔ وسیلگ ءِ رد ءَ اے چوکی ءَ چہ فورسز ءَ جتا جتائیں کارانی واستا کارمرز کنگ بوھگ ءَ ات۔
پاکستانی واکداراں انگت ءَ سرجمیں بلوچستان ءَ جنگی آپریشن ءِ بابت ءَ ھچ وڑیں ھال ءُ اھوال نہ داتگ ءُ ھچ وڑیں اُرشانی زمہ واری ھچ گل ءَ نہ زرتگ انت۔