30 اگست ءَ زورانسری بیگواھیانی میان اُستمانی روچ ءِ درگت ءَ چہ بلوچستان ءَ زورانسری آوار جنی ءِ آماچیں مردمانی کھولاں وتی بندیگانی یل کنگ ءِ لوٹ کتگ -آیانی درگت ءَ سرپدی ءُ آیاں آمیدگس ءَ پیش کنگ ءِ لوٹ کتگ-
سانمندیں کھولانی رد ءَ سالانی سال آ پہ وداراں دردناکی، بے ستکی ءُ مشکلانی آماچ انت، بلے انگت ءَ ھم وتی دوستیگیں مردمانی ودار ءَ نشتگ ایں-
سعید احمد ءِ مات ءَ وتی زھگ ءِ سیزدہ سال ءِ بیگواھی ءِ سرجم بوگ ءَ گشتگ یک ماتے ءِ ودار مروچی ھم ھلاس نہ انت – آئی ءِ رد ءَ آ گوستگیں سیزدہ سالاں ودار ءَ نشتگ کجام نا کجام روچ ءَ کئیت یا گپے رس ایت بلت مروچی ءَ داں کھول ءَ گوشگ نہ بیتگ آ کجا انت-
مھر گل مری ءِ گوھار ءَ گوشتگ وتی برات ءِ یازدہ سال ءِ زورانسری بیگواھی ءِ درگت ءَ درشان کنان ءَ گوشتگ مھر گل مری گریڈ 18 ءِ سرکاری آپسر ءُ ڈیوٹی ڈائریکٹرے بیتگ- آئی ءِ رد ءَ 2015 ءِ شپ ءِ ساھت سَے بج ءَ سرکاری ادارھانی کارندھاں آیانی لوگ ءِ سر ءَ بیڑ برتگ ءُ مھر گل مری کھول ءِ دیم ءَ آوار جتگ ءُ برتگ چریشی ءَ پد کھول ءَ ھچ وڑیں سرپدی ءُ ھال دیگ نہ بیتگ-
داد شاہ بلوچ ءِ مات ءَ وتی زھگ ءِ بیگواھی ءِ سر ءَ پدردی درشان کنان ءَ گوشتگ منی زھگ ءِ بیگواھی ءَ پنچ ماہ سرجم انت ءُ اے دومی بر انت کہ آ اے دردناکی ءَ گوزگ ءَ انت آئی ءَ 30 اگست ءِ درگت ءَ دزبندی کتگ داد شاہ ءَ ھوار سرجمیں بیگواھیں مردمانی واستا توار چِست بہ کن ات-
سانمندیں کھولاں گوشتگ اگاں کجام ھم مردم ءِ سر ءَ جرمے ھست گڑا آ کانون ءِ رد ءَ آمیدگس ءَ پیش کنگ بہ بیت ءُ بے گناھیں مردم یل کنگ بہ بنت- آئی ءِ لوٹ انت کہ سرجمیں بیگواھیں مردمانی بارو ءَ کھولاں سرپدی دیگ بہ بیت ءُ یل کنگ ءِ واستا املی گامگیج زیرگ بہ بیت-