زورانسری بیگواھیانی میان اُستمانی روچ ءَ شال ءَ زھرشانی، بیگواھین مردمانی یل کنگ ءِ لوٹ

زورانسری بیگواھیانی سانمندین کھولاں میان اُستمانی روچ ءِ درگت ءَ وائس فار بلوچ مسنگ پرسنز ءِ چیردستی ءَ شال پریس کلب ءِ دیم ءَ زھرشانی کنگ بیتگ- چریشی ءَ بیگواھین مردمانی کھولاں ھوار جتا جتائیں تک ءُ پھناتاں سیادی داروکیں مردماں بھر زرتگ-

زھرشانی ءَ وائس فار بلوچ مسنگ پرسنز ءِ چیئرمین نسر اللہ بلوچ، بیگواھیں جھانزیب محمد حسنی، سدیس لانگو، بیبرگ کمبرانی، محمود علی لانگو، نعمت اللہ بلوچ، محمد ریاض ساتکزئی، علہ اصغر ءُ مٹھا خان مری ءِ کھول، کمیونسٹ پاٹی ءِ رھشون کریم پرھاد ءَ تران کتگ-

زھرشانی کنوکاں گوشتگ زھرشانی ءِ مول ءُ مراد زورانسری بیگواھیانی سانمند ءُ آیانی کھولانی دردناکی ءَ ھاکم ءُ انساپ ءِ واستا ھستیں ادارھانی دیم ءَ پدر کنگ انت – دانکہ آیاں اے انسانی دردناکی ءِ سما بہ بیت ءُ زورانسری بیگواھیانی دارگ ءِ واستا جوانیں کرد پیلو بہ کن انت-

وی بی ایم پی ءِ رھشون نسر اللہ بلوچ ءَ گوشتگ وائس فار بلوچ مسنگ پرسنز گوستگیں 17 سالاں زورانسری بیگواھی ءُ درکانودی کوشانی ھلاسی ءُ زورانسری بیگواہ کتگینانی یل کنگ ءُ پُر امن ءُ جمھوری پتر ءَ جد ءُ جھد کنگ ءَ انت- اے وھداں گل ءَ جتا جتائیں سرکار ءُ انساپ ءِ واستا جوڑینتگیں ادارھانی دیم ءَ وتی لیکہ پیش کتگ انت-

آئی ءَ گوشتگ گل ءَ بازیں براں زورانسری بیگواھیانی ھلاسی ءُ زورانسری بیگواہ کتگیں مردمانی یل کنگ ءِ سدکی کنائینتگ انت بلے اے کول ءُ کرار داں انگت ءَ ھچ رنگ ءَ سرجم کنگ نہ بیتگ انت-

نسر اللہ بلوچ ءَ گوشتگ ڈیھ ءِ سلامتی ءِ نام ءَ زورانسعی بیگواھیانی وئیل ھمک روچ گیش بوان انت- ھمک روچ بیگواھیانی نوکیں کیس دیم ءَ آیگ ءَ انت ءُ بازیں بیگواھیں مردم درکانودی کشگ بوگ ءَ انت- جاورھال اے جاہ ءَ سر بیتگ انت کہ زالبول ءُ زھگ ھم بیگواھی ءِ آماچ کنگ بوگ ءَ انت –

آئی ءَ گوشتگ سرکار ءَ 2025 ءَ زورانسری بیگواھیانی درگت ءَ کانون سازی کنگ ءِ جار جتگ کہ دو فروری ءَ زورانسری بیگواھیانی ھلاسی کنگ بیت انت- کجام ھم مردم ءَ دزگیر کنگ ءَ آ بیست ءُ چار ساھت ءَ مجسٹریٹ ءِ دیم ءَ پیش کنگ بیت انت- ھمے وڑ دزگیریں مردم کانونی رنگ ءَ دزگیری جاہ ءَ کنگ بیت انت بلے زمین ءِ راستی دگر انت ءُ آیانی ٹاھانی چپ انت-

آئی ءَ گوشتگ مروچی ھم مھلوک ءَ آوار جن انت زورانسری بیگواہ کنگ ءَ انت- ایشانی توک ءَ لھتے مردمانی دزگیری بنجل ءَ جاڑیگ بوگ ءِ ھال ھست انت بلے گیشتر نا کجام ھم مجسٹریٹ ءِ دیم ءَ پیش کنگ بیتگ ناکہ آ دزگیری بنجلاں کنگ بیتگ انت ءُ ناکہ آیانی کھولاں آیانی بارو ءَ سرپدی دیگ بوگ ءَ انت- اے جاورھال کانون ءِ ھاکمی، بنیادی انسانی ھک ءُ انساپ ءِ رھبندانی لپاشگ انت-

زھرشانی کنوکاں چہ سرکار ءَ لوٹ کتگ کہ بلوچستان ءَ زورانسری بیگواھی ءِ درچ بند کنگ بہ بیت دراھیں بیگواھیں مردم گچینی بلوچ زالبولانی یل دیگ ءَ ستکی بہ کنت- بندیگیں مردمانی درکانودی کوشاں بہ دار ایت- دراھیں مردماں دیم ءَ بیار ایت ءُ آمیدگساں پیش بہ کنت-

زھرشانی کنوکاں گوشتگ دراھیں دزگیریں مردماں کانود ءِ درچ ءَ ھک دیگ بہ بیت آیانی کھولاں آیانی بارو ءَ سرپدی دیگ بہ بیت زورانسری بیگواھی ءِ جیڑہ ءَ الکاپیں رنگے ءَ ڈیھ ءِ راستیں کانون ءِ تک ءَ سرجم بہ کنت ءُ جوانیں گامگیج زیرگ بہ بیت-