بلوچستان لبریشن فرنٹ ءِ جارکش میجر گْوھرام بلوچ ءَ وتی شنگ کتگیں درشان ءَ گوشتگ کہ بی ایل ایف ءِ سرمچاراں 22 اگست 2026 ءَ آواران ءِ ھند کولواہ، گیشکور ءَ دگ ءِ پھازداریں پوج ءِ کارندھانی سر ءَ گوں مزنیں سلاھاں اُرش کتگ۔ اے کاروائی ءِ میان ءَ پوج ءِ پنچ کارندہ مرتگ انت ءُ سے ٹپی بیتگ انت۔ اے اُرش ءِ میان ءَ سرمچاراں دگ ءِ کارکنوکیں گاڑی نشانگ کتگ اَنت۔ اُرش ءَ پد زوت چہ گیشکور ءِ بنجل ءَ زورگریں پوج ءِ کمک ءَ ھیلی کاپٹر ھم سر بیتگ، سرمچاراں ھیلی کاپٹر ءِ سر ءَ گوں ایل ایم جی ءَ اُرش کتگ، ایشی ءِ آسر ءَ زورگریں پوج پہ پدکنزگ ءَ لاچار بیتگ۔
جارکش ءَ گوشتگ کہ ھمے روچ ءَ بی ایل ایف ءِ سرمچاراں جھاؤ ءِ ھند شرین ءُ پرھاد ءَ پولیس ءِ چوکی ءِ سر ءَ اُرش کتگ۔ سرمچاراں چوکی ءَ ساڑی ئیں درستیں کارندہ دزگیر کتگ اَنت ءُ اود ءَ ایریں کلاشنکوپ ءُ آدگہ پوجی سامان زرتگ اَنت، پولیس ءِ دو گاڑی ءُ دو موٹر سائیکل مانداشتگ انت۔ پولیس ءِ کارندہ رند ءَ یل داتگ اَنت۔
جارکش ءَ گوشتگ کہ ھمے میان ءَ سرمچاراں بیلہ جھاؤ دگ ءَ ریاستی کارندھانی سپر کنگ ءِ ھال رسگ ءَ داں دو اداراں دگ بندی کتگ، ھمے میان ءَ ڈیتھ اسکواڈ ءِ دو کارندہ محمد ء نور محمد ءُ آئی ءِ چُک ظفر ء محمد کہ واجہ ءِ باگ ءِ جھمنند اَنت آ سر بوتگ اَنت۔ آیاں سرمچاران ءَ دیستگ تچک ءِ کوشش کتگ، سرمچاراں زوت کاروائی کتگ ءُ دوئیں کشتگ اَنت۔ آیانی یک کلاشنکوپ ءُ یک پستولے گوں میگزین ءَ دستیگ کتگ انت، آیانی موٹر سائیکل مانداشتگ۔
میجر گوھرام بلوچ ءَ گوشتگ کہ ڈیتھ اسکواڈ ءِ کارندہ ظفر ء محمد سردار علی حیدر ءِ سروکی ءَ مردمانی آوار جنی ءَ ھوار آدگہ چاگردی سلکاریاں ھوار بیتگ ءُ زورگریں پوج ءِ گوں ھواری ءَ سرمچارانی بگیری ءَ بازیں لشکر کشیاں تچک ءَ ھوار بوتگ۔ انوں آ جھاؤ ءِ جتاجتائیں ھنداں لس مھلوک ءُ لس بلوچانی نشانگ کنگ ءُ زرگرگ ءَ ھوار بوتگ۔
جارکش ءَ گوشتگ کہ ظفر ء محمد یک سالے پیش پہ سپاھی ءَ گل ءِ نیمگ ءَ کلوہ کتگ، پد ءَ ھم آئی ءَ گپ مان نیارتگ ءُ گل ءِ آمیدگس ءَ پیش نہ بوتگ، بلکیں پوج ءِ ھمراھی ءَ گیشتر کار کنگ بندات کتگ۔ ایشی ءَ یک بلوچ ڈرائیورے درمان ء رحیم بخش ءَ پہ زورگریں پوج ءِ دیم ءَ پیش بوگ ءَ لوٹاھینتگ ءُ واتری ءَ راہ ءَ کشتگ ءُ آئی ءِ لاش جنگل ءَ چگل داتگ، پد ءَ پندل سازی کتگ ءُ آئی ءَ گل ءِ مردم پیش کتگ۔
جارکش ءَ گوشتگ کہ اگست 2025 ءَ بی ایل ایف ءِ سرمچار حاصل پنام ءِ ساربان ءِ شھیدی ءَ ظفر تچک ءَ ھوار بوتگ۔ جھاؤ ءِ ھند کورک ءَ یک شپانکے حمزہ بلوچ آوار جتگ ءُ جھاؤ کوھڑو بنجل ءَ برتگ ءُ دو روچ ءَ پد آئی ءِ لاش چگل داتگ۔ اے وئیلانی پژدر ءَ ظفر گل ءِ نشانگی لڑ ءَ ھوار بوتگ، سرمچاراں کاروائی کتگ ءُ گڈی آسر ءَ سر کتگ۔
جارکش ءَ گوشتگ کہ دگہ یک کاروائی یے ءَ 22 اگست ءَ بی ایل ایف ءِ سرمچاراں شال ءِ ھند ڈگاری ءَ دگ بندی کتگ ءُ گاڑی پٹ ءُ پول کتگ اَنت۔ اے دگ بندی ءِ مول ھند ءِ دارگ بوتگ ءُ زورگریں پوج ءِ تر ءُ گردانی سر ءَ چم سک دیگ بوتگ اَنت۔ دگ بندی ءِ میان ءَ سرمچاراں تیرگواری کتگ ءُ مڈی بروکیں گاڑیانی ٹائر تراکینتگ اَنت۔
آئی ءَ گوشتگ کہ دگہ یک کاروائی یے ءَ سرمچاراں 15 اگست 2026 ءَ کلات ءِ ھند رودینجو ءَ زورگریں پوج ءِ کاروان ءَ ھواریں یک گاڑی یے گوں چیر کتگیں شورواں تباہ کتگ۔ اے کاروائی ءِ آسر ءَ گاڑی ءَ سواریں سے کارندہ جاہ پہ جاہ ءَ مرتگ ءُ دو ٹپی بیتگ انت۔
جارکش ءَ گوشتگ کہ 15 اگست ءَ دگہ یک کاروائی یے ءِ میان ءَ سرمچاراں چاگی یکمچ ءَ زورگریں پوج ءُ دگ ءَ کارکنوکیں شوربندیانی ھواریں سے بلڈوزر گاڑیانی سر ءَ تیرگواری کتگ ءُ تاوان داتگ انت۔
آئی ءَ گوشتگ کہ 13 اگست 2026 ءَ بی ایل ایف ءِ سرمچارانی سوراب ءَ یک کاروائی یے ءِ میان ءَ سنگر گپتگ ءُ زورگریں پوج ءِ کاروان ءِ سر ءَ گوں وتکاریں سلاھاں اُرش کتگ، ایشی ءِ آسر ءَ زورگریں پوج ءِ سے کارندہ مرتگ ءُ دو ٹپی بیتگ انت۔
جارکش ءَ گوشتگ کہ 4 اگست 2026 ءَ پروم ءِ میتگ جاھین ءَ برجاھیں پولیس انگر کتگ ءُ اُرش کتگ۔ سرمچاراں تھانہ سرجم ءَ دستیگ کنگ ءَ پد درستیں کارندہ دزگیر کتگ انت۔ چہ ایشی ءَ پد تھانہ ءَ دو موٹرسائیکل، یک پستولے دو دوربین ءُ آدگہ پوجی سامان دستیگ کتگ انت ءُ سرجمیں مانداشتگ۔ رند ءَ درستیں پولیس کارندہ گوں ترندی ءَ بیھار داتگ اَنت ءُ گل ءِ راھبند ءُ انسانی ھمدردی ءِ رد ءَ یل داتگ اَنت۔
میجر گوھرام بلوچ ءَ درشان ءِ گڈی ءَ گوشتگ بلوچستان لبریشن فرنٹ اے درستیں اُرشانی زمہ واریاں من ایت ءُ داں بلوچستان ءِ آجوئی ءَ اے دابیں اُرش برجاہ بنت –