ھاران ءَ سلاہ بندانی اُرش، تیرگواری ءُ تراک، بلوچستان آیوکیں بیست ءُ چار ساھتاں ناگیگی جاورانی گمان

بلوچستان ءِ دمگ ھاران ءَ سَے شمبے ءِ شپ ءَ جتا جتائیں جاھاں سلاہ بندیں مردمانی نیمگ ءَ پٹ ءُ پول ءُ تراک ءُ تیرگواریانی اھوال دیم ءَ اتکگ انت-

دمگی مردمانی رد ءَ سلاہ بندیں مردماں بازیں جاھاں ناکہ بندی کتگ ءُ گاڑی پٹ ءُ پول کتگ انت- ءُ شھر ءِ بازیں جاھاں تیرگواری ءُ تراکانی توار ھم اشکنگ بیتگ انت-

دمگی مردمانی رد ءَ سلاہ بندیں مردماں انسپکٹر جنرل پولیس ( آئی جی پی) ءِ جھمنندی جاہ ءِ سر ءَ اوشتوکیں پولیس کارندہ نشانگ کتگ انت – اُرش ءِ وھد ءَ کارندھاں وتی گاڑی یل داتگ ءُ تکگ انت- چریشی ءَ پد اُرشکاراں گاڑی مانداشتگ –

دمگی مردمانی رد ءَ سلاہ بندیں مردماں سَے پولیس کارندہ ھم دزگیر کتگ ءُ گون وت برتگ انت-

دومی نیمگ ءَ بلوچستان ءِ واکداراں آیوکیں بیست ءُ چار ساھت سکا ناگیگی گوشتگ انت – بلوچستان ءِ سرکار ءَ پھزداری ترند کتگ ءُ بازیں جاھاں راہ ءُ در بند کتگ انت-

ھاران ءِ وئیل ھنچیں وھدے ءَ پیش اتکگ کہ 26 اگست بلوچ رھشون نواب اکبر خان بگٹی ءِ کوش ءِ 20 می سالروچ انت –

ھمے روچ ءَ گوستگیں سال ءَ بلوچ لبریشن آرمی ءِ نیمگ ءَ“ آپریشن ھیروپ اول ” ءِ بندات کنگ بیتگ ات کہ اود ءَ یکیں وھد ءَ سرجمیں بلوچستان ءَ ھترناکیں اُرش کنگ بیتگ ات انت-