بلوچستان ءِ جتاجتائیں دمگاں پاکستانی پوج ءِ سر ءَ بمب تراک ءُ سلاہ بندیں اُرش کنگ بیتگ

بلوچستان ءِ جتاجتائیں دمگاں پاکستانی پوج ءِ سر ءَ بمب تراک ءُ سلاہ بندیں اُرش کنگ بیتگ-

گیشیں ھالانی رِد ءَ ھاران ءِ دمگ البت ءَ گوستگیں شپ ءَ سلاہ بندیں مردماں پاکستانی پوج ءِ یک بُنجلے نشانگ کتگ- اُرش ءِ میان ءَ بُنجل تیرگواری ءِ نشانگ کتگ-

ھمے وڑ کیچ ءِ دمگ ھیرآباد ءَ سلاہ بندیں مردماں پاکستانی پوج ءِ کارمند ھما وھد ءَ نشانگ کتگ وھدے آ پیکٹ سکیورٹی دیگ ءِ ھاتر ءَ سنگر ءَ سر بیتگ- ھالانی رِد ءَ وئیل ءَ پد سلاہ بندیں مردماں پوج ءِ کاروان ھم نشانگ کتگ-

دومی نیمگ ءَ کیچ ھیر آباد ءَ بیتگیں اُرش ءِ سرکاری واکدار ءَ راست کتگ گوشتگ کہ وئیل سُھب ءِ وھد ءَ بیتگ وھدے ایف سی ءِ کارندہ دگ ءِ پٹ ءُ پول پھازداری ءِ پٹ ءُ پول ءَ دلگوش بیتگ اَنت- ھمے میان ءَ سے موٹر سائیکلوں سوار شش سلاہ بندیں مردماں پیسر ءَ دستی بم بے چگل داتگ ءُ پد ءَ تیرگواری کتگ-

ایف سی ءِ کارندھانی پسھی تیرگواری ءَ اُرشکار ھما جاھی تتکگ اَنت- ٹپی ئیں کارمند پہ الاج ھاتر ءَ دمگی نادُراھجاہ ءَ برتگ اَنت-

ھمے وڑ واشک ءِ دمگ ارماگئے ءَ ھم پاکستانی پوج ءِ سر ءَ سلاہ بندیں اُرش ءِ ھال اِنت- وئیل ءِ تُرندی ءُ اشی ءَ بیتگیں جانی ءُ مالی تاوانانی درگت ءَ ھچ وڑیں سرپدی نیتکگ-

دومی نیمگ ءَ زھری ءِ دمگ بلبل ءَ ھم پوج ءِ پیادگ کارمند تراک ءَ چہ نشانگ کتگ اَنت- ھالانی رِد ءَ تراک ھما وھد ءَ بیتگ وھدے پوج ءِ کارندہ ھالگیں سنگرے ءَ سر بیتگ اَنت-

تنی وھدے اے بیتگیں سرجمیں اُرشانی زمہ واری ھچ گل ءَ نہ زرتگ اَنت-