نوشکی، مستونگ، کیچ پوج ءِ سر ءَ اُرش، آپریشن

بلوچستان ءِ جتا جتائیں دمگاں پوج ءِ سر ءَ اُرش، ءُ پوجی آپریشن-

بلوچستان ءِ دمگ نوشکی ءَ پاکستانی فوج ءِ یک پوسٹے ءِ اد ءَ سلاہ بندیں مردمانی نشانگ جوڑ کنگ بوتگ ایشی ءِ آسر ءَ پاکستانی فورسز ءِ کارندھانی جانی تاوان ءِ ھال دیم ءَ اتکگ انت-

دمگی مردمانی رد ءَ اے اُرش نوشکی ءِ دمگ غریب آباد ءَ یک پوسٹے ءِ سر ءَ بوتگ کہ اود ءَ اُرش ءِ وھد ءَ مزنیں تیر گواری ءُ بازیں تراکانی توار بوتگ انت۔

بنداتی ھالانی رد ءَ اے اُرش ءَ سئے کارندہ بیران ءُ دو ٹپی بوتگ انت۔ البت سرکاری تک ءَ اے گپ ءِ پدرائی ءُ رد نہ بوتگ۔

مردمانی رد ءَ اُرش ءَ پد یک فوجی کاروانے کہ پہ فورسز ءِ کمک ءَ روان دیگ بوتگ اے ھم نشانگ جوڑ کنگ بوتگ۔ اے وئیل ءَ پد پوج ءَ نوشکی ءِ بازار بند کتگ ۔

انگت ءَ کس ءَ اے اُرش ءِ زمہ واری نہ زرتگ۔ بلوچ آجوئی لوٹوکیں گل اے دمگ ءَ پرکار انت۔ پاکستانی لشکر ءَ گوستگیں وھداں ھم نوشکی ءُ کش ءُ گوری دمگاں سلاہ بندیں اُرشانی دیمپانی بوتگ۔

ھمے وڑ ءَ مستونگ ءِ دمگ دشت ڈگاری ءَ چہ گوستگیں بیگاہ ءَ پاکستانی لشکر ءِ نیمگ ءَ آپریشن برجاہ انت ءُ بازیں کچے ءَ لشکر پیشگامی کنگ ءَ انت-

دمگی مردمانی رد ءَ مروچی سھب ءَ دشت ڈگاری ءُ کش ءُ گوری دمگاں پاکستانی پوج ءُ سلاہ بندانی میان ءَ جنگ ءُ چوپ ھم بوتگ-

ھمے وڑ ءَ کیچ ءِ دمگ کلاتک ءُ گیبن ءُ کش ءُ گوری دمگاں چہ گوستگیں بیگاہ ءَ پاکستانی لشکر بازیں کچے ءَ مُچ بوتگ دمگ ءِ چار ءُ گزاری ءَ کواڈ کاپٹر یکشل ءَ بال انت ءُ بازیں جاھاں سرچ آپریشن برجاہ انت-

ھمے وھد ءَ سلاہ بنداں بازیں کچے ءَ دگ بندی کتگ ءُ گوزوکیں گاڑی چِک ءُ تان کتگ انت ءُ دمگ ءَ پوج ءِ سر ءَ ھم اُرش بوتگ-

اھوالانی رد ءَ کلاتک ءَ مزن شھدگ ءِ سر ءَ ناکہ بندی ءِ وھد ءَ سلاہ بندیں مردماں شش در جھمنندیں مردم چہ گاڑی ءَ ایر گپتگ ءُ برتگ انت-

پولیس بنشون ءِ رد ءَ سورگ ءِ ھند ءَ برگ بیتگیں یک مردمے ءِ لاش دزکپتگ کہ آ تیر جنگ ءُ کُشگ بوتگ-

دمگی مردمانی رد ءَ تیرگواری ءِ آسر ءَ یک دمگی رھگوزی ءِ بیران بوتگ-