بلوچ لبریشن آرمی ءِ جارکش جیئند بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ بی ایل اے ءِ سرمچاراں 10 جولائی ءَ یک ٹوھیں آپریشن ءِ کتگ ءُ خضدار ءِ اسٹریٹجک دمگ زیدی سرجمی ءَ وتی کنٹرول ءَ کتگ ۔ سرمچاراں سھب ءِ ادار شش بج ءَ اے آپریشن بندات کتگ ءُ دمگی پولیس اسٹیشن ءَ ھوار درستیں ھاسیں سرکاری ماڑیانی سرا کنٹرول کتگ ، وھدیکہ یک اے میان پولیس کارمندے ءِ مئے سرا تپنگ کشگ ءَ آ زدگ بوتگ ۔ پولیس اسٹیشن ءِ سرجمی ءَ گرگ ءَ پد اودے دراھیں سلاہ، گولہ بارود ءُ دگہ جنگی مڈی دستیگ کتگ انت ءُ پد ءَ تراکناکیں شورواں گوں ماڑی سرجمی ءَ ھاکاں ھوار کتگ ۔
جارکش ءَ گوشتگ کہ دمگ ءِ کنٹرول کنگ ءَ پد سرمچارانی ایندگہ ٹولیاں بنجاھی شھدگ سرا سنگر گپتگ ءُ دگ بندی کتگ ۔ وھدیکہ سورگر ءِ پولیس ڈی ایس پی ءِ کاروان ءَ دیم ءَ آیگ ءِ جھد کتگ گڑا سرمچاراں سنگر گپتگ ءُ آ نشانگ کتگ ءُ دژمن پدکنزگ ءَ لاچار کتگ ۔ ایشی ءَ پد پاکستانی زورگیریں پوج ءَ گوں گن شپ ءِ بالگردانی کمک ءَ بکتر بندیں گاڑیانی مزنیں ٹولی یے دیم پہ دمگ ءَ دیم داتگ کہ اودا سرمچاراں آ انگر کتگ ءُ آیانی سرا اُرش کتگ ھمدا ترندیں میڑے بندات بوتگ ۔ اے ھونیگیں میڑ کہ سئے کلاک ءَ گیش برجاہ بوتگ، زورگیریں پوج ءِ 15 ءَ گیش کارمند مرتگ ءُ بازینے ٹپیگ بوتگ انت ءُ دژمن ءِ یک زرہ پوشیں گاڑی یے سرجم ءَ تباہ بوتگ۔ ھمے میڑ ءِ وھد ءَ سرمچاراں دژمن ءِ برزی کمک ءَ اتکگیں بالگرد ءِ سر ءَ گوں مزنیں سلاھاں ارش تیرگواری کتگ کہ چریشی ءِ آسر ءَ یک بالگردے ءَ سک باز تاوان رستگ۔
بی ایل اے ءِ جارکش ءَ گوشتگ کہ ھمے روچ ءِ بیگاہ ءَ سرمچارانی یک دگہ ٹولی ءَ ھمے شاہراہ ءِ سر ءَ دیم ءَ آوکیں زورگیریں پوج ءِ یک دگہ کاروانے ھم نشانگ کتگ کہ چریشی ءَ دژمن ءِ گاڑیانی تہ ءَ گاڑی ءِ ارش ءِ زدگ ءَ اتکگ ءُ دگہ 4 کارمند ھمے جاہ ءَ مرتگ اَنت ءُ بازینے زدگ بوتگ اَنت۔
جارکش جیئند بلوچ ءَ گوشتگ کہ ماتیں وطن ءِ پھازگ ءُ اے ٹوھیں میڑ ءِ سوبمند کنگ ءِ سپر ءَ بی ایل اے ءِ 6 سرمچار، سنگت قدوس قمبرانی پنام ءِ سکندر، سنگت محی الدین کرد پنام ءِ مرید، سنگت کرک، سنگت صالح محمد پنام ءِ گھرام خان، سنگت جمعہ خان پنام ءِ بورجان، سنگت فھیم احمد پنام ءِ نزر جان ءَ دلیری ءِ راجدپتر نوک کتگ ءُ نمیران بوتگ انت ۔ بلوچ لبریشن آرمی اے دلیریں سرمچارانی گرانبھائیں دیمھونی ءَ دروت ندر کنت ءُ ھمے کول ءَ کنت کہ نمیرانیں سرانی رتکگیں بلوچستان ءِ آجوئی ءُ بلوچ راجی زرمبشت ءَ مھکم کنان کنت ۔
جارکش ءَ وتی درشان ءِ گڈسر ءَ گوشتگ کہ زیدی ءِ وڑیں ھاسیں اسٹریٹجک دمگے ءِ سر ءَ بی ایل اے ءِ کنٹرول زورگیریں پوج ءِ درسیں بٹاکاں ھاکاں ھوار کنت ، پرچا کہ اے سرجمیں دمگ دژمن ءِ دو مزنیں بنجلانی میان ءَ اِنت۔ دژمن ءِ مزنیں پوجی ھست بوھگ، سیکورٹی کارڈن ءُ ھوائی ءُ زمینی نیٹ ورک ءَ ابید سرمچاراں ناکہ ایوک ءَ زیدی گپتگ بلکیں اودا بازیں کلاکاں وتی ھاکمیت ھم برجاہ داشتگ ءُ چریشی ءَ اے گپ پدر بوتگ کہ ایردستیں بلوچستان ءِ ھچ دمگ نوں بی ایل اے ءِ دست ءَ در نہ اِنت۔ اے جنگ پہ زورگیریں پاکستانی پوج ءَ یک پدّریںءُ شوری کلوہ یے کہ آ وتی مزنیں پوجی اڈھانی میان ءَ ھم وت ءَ پھریز ات نہ کنت ءُ وت ءَ ایمن مہ لیک اِیت، پرچا کہ بلوچ سرڈگار ءِ سر ءَ گُڈّی ءُ گُڈّی پیسلہ ءَ ایوک ءَ سرڈگار ءِ ھکئیں وارس کن اَنت۔