بلوچ نیشنل مومنٹ ( بی این ایم ) ءِ بنجاھی جارکش ءَ بلوچ راجی راھشون استاد واحد کمبر ءِ زور بیگواھی ءِ دو سال سرجم بیگ ءِ درگت ءَ وتی درشان ءَ گْوشتگ کہ استاد واھد کمبر ءَ پریں دو سال اِنت کہ پاکستانی پوجءِ آزارجاھاں بند اِنت۔ آ بلوچ راج ءِ سریں راھشون اِنت ، پمیشکا جنگی بندیگ منگ ءُ زیت مردمانی دیم ءَ آرگ بہ بیت۔
جارکش ءَ گْوشتگ بلوچستان پاکستان ءِ چیردستی ءَ زورگپتیں ڈیھے ءُ استاد واھدکمبر پہ وتی گلزمین ءِ آجوئی ءِ جھد ءِ سھرائیں مردماں یکے۔آجوئی ءِ جھد ءَ راجی رنگے ءِ دیگ ءَ آئی ءِ پر ارزشت ءُ گیشینوکیں کردے اَت۔
بنجاھی جارکش ءَ گْوشتگ کہ 19 جولائی 2024 ءَ استاد واھد کمبر ایران ءِ شھر کرمان ءَ پاکستان ءِ چیریں ادارھانی کارمنداں آوار جتگ ، آ پہ دل ءِ نادْراھی ءِ درمان ءَ وتی نزیکیں مردمانی کمک ءَ ھمود ءَ نندوک اَت۔
آئی ءَ گْوشتگ میان راجی راھبند ءُ مردمی دودانی پد ءَ استاد واھدکمبر جنگی بندیگ منگ بہ بیت۔ پہ ھال آ ماں زندان ءَ آزار دیگ بیگ ءَ اِنت داں آئی ءَ بہ پروش اَنت ءُ آئی ءَ آئی ءِ جند ءِ سیاسی لیکھانی بگیری ءَ گپ جنگ ءَ بہ پرما اَنت۔ آ کماش ءُ نادْراہ اِنت ، پمیشکا آئی ءِ زند ءُ جاندْراھی ءِ بارہ ءَ سکا بے تاھیری ھست اِنت۔
جارکش ءَ گْوشتگ انسانی ھکانی میان استمانی دارہ ’ پاکستان ‘ ءَ انسانی ھکانی پاسداری کنائینگ ءَ بے سوب اَنت۔پاکستان چہ میان راج ءَ گزرانکی ءُ سپارتی سیت گرگ ءَ اِنت ، کہ پہ آیاں بنکی جمھوری ، راھبندانی واکداری ءُ انسانی ھکانی منگہ دیگ المی اِنت ، بلے پاکستانی ریاستاے ڈکانی پیلو کنگ ءَ یکشل ءَ بے سوب اِنت۔
آئی ءَ لوٹ کرتگ کہ میان استمان پاکستان ءِ گر ءُ دار ءَ آئی ءِ سر ءَ سانمندیں پابندی بہ جنت پرچا کہ بلوچستان ءَ انسانی ھکانی جاور یکشل ءَ بدتر بیگ ءَ اَنت ءُ زوربیگواھی ، در آمیدگسی کوش ، مچکی ڈنڈ ءُ سیاسی زوراکی ءِ تہ ءَ یکشل ءَ گیشی آیگ ءَ اِنت۔