ھیروپ پرچا ؟
نبشتہ کار : بُرزکوھی
رجانک : کماندان
باز انچیں ساھت بنت ھردے یک کارے ، روچے یا یک اُرشے چہ وتی پوجی کالب ءَ در کیت ءُ بُندپتر ءِ زانشت ءَ سُرین اِیت۔ چشیں ساھتاں پد تاکت ءِ برجاھیں ھیال ، تُرس ءِ سیمسر ءُ ایردستی ءِ نپسیات یکیں وھد ءَ مٹ بیگ ءَ بنت۔ آپریشن ھیروپ را گوں ھمے نگاہ ءَ چارگ الّمی اِنت ، پرچا کہ ایشی ءَ تھنا یک جنگی کارے ءِ ھساب ءَ وانگ ءُ پھمگ بزاں آئی ءِ مانا ءُ بزانت ءِ کسان کنگ اِنت۔
اے ویل ھما کچ ئیگ اِنت چش کہ فلسفی الین آئی ءَ بدیو ایونٹ (ویل ) ءِ نام ءَ دنت ، بزاں “انچیں ساھت کہ آ ھستیں سیاسی ترزکار ءِ اندر ءَ یک انچیں گمانے ودی کنت کہ پیسر ءَ گندگ نہ بوتگ ۔ چریشی ءَ پیسر دنیا یک رد ءُ بندے ءَ جُنزگ ءَ بیت، بلے ایشی ءَ پد آ رد ءُ بند سرجم ءَ پیسرگیں داب ءَ نہ بیت۔” بلوچستان ءِ ھستیں بُندپتر ءِ اندر ءَ آپریشن ھیروپ ھمے کچ ءِ یک پرشت ءُ پروشے ، آئی ءَ ناں تھنا استان ءِ تاکت ءِ ھیال چیلنج کت بلکیں بلوچ گھگیری ءِ ھیال را یک نوکیں جاھے ءَ سر کت۔استان مدام وتی تاکت ءِ چپ ءُ چاگرد ءَ یک داسپانی کسھے جوڑینگ لوٹ اَنت۔ دنیا ءِ ھمک پوج وتی درگت ءَ یک انچیں کسھے ساز اِیت کہ آ ناباجبریں پروش اِنت، آئی ءِ رھبند مھکم ءُ بُنجل پھریز اِنت۔
میشل فوکو ءِ نگاہ ءَ “تاکت ءِ ھکیگیں پڑ تھنا جنگ ءِ پڑ نہ اِنت بلکیں ھما کالب اِنت کہ آئی ءِ اندر ءَ تاکت ءَ را ناکابل ءِ چیلنج راستی ءِ داب ءَ پیش دارگ ءُ منّگ بیت۔”
ھردیکہ کہ یک استانے تاکت ءَ را اے پلگاریں ءُ مُجتی راستی یے جوڑ کنت گڑا ایردستیں چاگرد ءِ گھگیری ءَ بُنکی گام پہ ھمے ھیال ءِ پروشگ ءَ بیت۔آپریشن ھیروپ ءَ ھمے کار کُت، ھیروپ ءِ ھمے ھیال نہ منّ اِت ، کہ آئی ءِ سبب ءَ کبزہ گیریں استان ءَ وتی ھست بیگ ءَ مدامی پیش داشتگ۔ ھر وھدیکہ دژمن ءِ لشکر چہ وتی بنجلاں درآتک مہ کنت گڑا تاکت ءِ ھما داسپانی پردگ کہ چہ سالاں جوڑینگ بیتگ، آ پرُشت ءُ پروش بیت ءُ پد ءَ یک جنگے تھنا جنگے کارے نہ بیت بلکیں آ سیاسی بزانت جوڑ کنان بیت ۔آپریشن ھیروپ ءَ بی ایل اے ءَ چہ کساس کتگیں تْرندی گوریلا تاکت ءَ کشّ اِت اسٹریٹجک پوجی تاکتے ءِ رد ءَ دنیا ءِ دیم ءَ آؤرت ۔
اے مٹّی تھنا پوجی ناں بلکیں جھلانکیں سیاسی بزانتے دار اِیت پرچا ھر وھدیکہ یک جُنزے اے جاہ ءَ وتی تنزیمی بودشت ءُ کمانڈ ءِ ھم ھیالی ءَ پیش دار اِیت گڑا آ وتی دژمن ءَ جنگی پڑ ءَ ناں بلکیں پگری رد ءَ ھم یک کلوھے دنت کہ آ تھنا شنگ ءُ شانگیں ٹولی یے نہ اِنت بلکیں یک مھکمیں بُندپتری تاکتے ۔ ایشی ءِ متلب ھمیش اِنت آیوکیں وھد ءَ چنائیں ھم سیاسی ندارگ کشّی ءِ اندر ءَ بلوچ راج ءِ تاکت ءَ را ڈالچار کنگ نہ بوتگیں گپّے بیت۔ جنگ ءِ کلاسیکی تھیوری ءَ نامداریں پروشین پوجی تھیورسٹ کارل وان کلازویٹز ءَ نبشتہ کتگ اَت کہ “ جنگ تھنا سلاھانی ناں بلکیں ارادھانی جنگ ھم بیت ۔
ھردیکہ یک ٹولی یے وتی ارادھانی ترندی ءَ ھما جاہ ءَ پدّر کنت وھدے دژمن ءِ ھیالی بُزتری ءِ پردگ پُرشت ءُ پروش بہ بیت گڑا جنگ ءِ شاھیم مٹ بیت۔” آپریشن ھیروپ ءَ ھمے شاھیم پہ مُجتی مٹ کُتگ ۔ اے گپ ءِ تہ ءَ ھچ شک نیست کہ 31 جنوری ءَ بلوچ ءَ گوں ارادھی ھما تُرندی ءَ دژمن مانپتاتگ اَت ایشی ءَ دژمن ءَ را ماں راستی ءَ بیمّ آماچ کتگ ۔
راجی جوڑشت، ھما بُندپتری کار اِنت کہ آئی ءِ تہ ءَ شنگ ءُ شانگیں چاگردے مھکمیں سیاسی زانشت ءِ تہ ءَ مٹ بیت۔
فرانز فینن نوک آبادیاتی چاگردانی ہدرگت ءَ نبشتہ کنت کہ “ آجوئی ءِ جُھد تھنا سیاسی آجوئی ءِ پدکرد نہ اِنت بلکیں انسان ءِ نپسیاتی ءُ چاگرد ءِ نوک ساچگ ءِ ھم پدکرد بیت ۔” بلے چاگرد ءَ اے مٹّی ءِ گیش اِتگیں درور زالبولانی کردار کہ آ انی انچیں تاکتے جوڑ بوتگ کہ آئی ءِ پروش دیگ نہ بوتگیں گپے، داں یک دھکے ءَ پیسر بلوچ زالبول ءِ چاگردی بستار گچینیں ربیتانی ءُ گسانی پیژگاہ ءَ بندیگ بوتگ ، بلے ھستیں بلوچ آجوئی ءِ جُنز ءَ اے سانکل پہ مُجتی پروشتگ آ واکدار جوڑ کتگ اَنت ۔ مرچی بلوچ زالبول تھنا ربیتانی پھریزوک نہ اَنت بلکیں سیاسی کارانی سرجم ءُ بنداتی لڑ ءَ ھوار اَنت۔
وھدے چاگرے ءِ زالبول وتی سیاسی ایجنسی ءَ درگیج اِیت ءُ آ چاگرد ھچبر پیسرگیں داب ءَ نہ بیت ، ءُ بلوچ چاگرد ءَ ھمے ھاموشیں آشوب ءَ سر کشّ اِتگ ۔ بلوچ زالبول نوں ھما جاہ ءَ سر بوتگ اِنت اود ءَ برابری وتی اُگبال ، ءُ وتی راجی کردار ءِ درگت ءَ ھچ وڑ ءَ پد کنزگ ءَ تیار نہ اَنت ۔ بلوچ زالبول ءِ کردار نوں ھمینچک بُنجاھی ءُ بنداتی بوتگ کہ آئی ءَ را دوار لوگانی پیژگاہ ءَ بند کنگ نوں ھچ نپر ءِ استان ءِ یا پد منتگیں پگرانی کارے نہ اِنت۔
بلوچ زالبول ءِ اے چاگردی ءُ نپسیاتی نوک سازی ءِ مستریں شوربندی ءُ کردی زاھری مارا آپریشن ھیروپ ءَ گندگ ءَ کیت، اود ءَ بلوچ زالبولاں وتارا تھنا گوں سیاسی پلہ مرزی ءَ بندوک نہ کُت بلکیں فدائی ءُ جنگولے ءِ دروشم ءَ جنگ جاہ ءِ ھمک پھنات ءَ بنداتی لڑ ءَ کردے پیلو کت۔ آپریشن ھیروپ ءَ زالبولانی پدائی اُرشانی ءُ جنگی کارانی تہ ءَ تچک ءَ بھر زورگ ھمے گپ ءِ جار اِنت کہ بلوچ گھگیری نوں یک انچیں جاھے ءَ سر بوتگ اود ءَ زات ءِ بنیات ءَ جوڑ کُتگیں نوک آبادیاتی ءُ ربیتی سیمسر ھلاس بوتگ اَنت ۔
وھدے یک راجے ءِ زالبول وتی ھستانک ءَ شورھانی تہ ءَ سمبھین اِیت ءُ دژمن ءِ بُنجلاں ٹُک اِیت گڑا اے تھنا پوجی شوربندی ناں بلکیں ھمے گپ ءِ نشونی اِنت کہ سرجمیں چاگرد وتی لیکھی ھُنر ءِ اندر ءَ مٹ بوتگ ۔
زالبولیں پدائیانی ماں جنگ ءَ ایر کپگ ھمے راستی ءَ منّارین اِیت کہ آجوئی ءِ زانت نوں بلوچ چاگرد ءِ مجگ ءَ پُترتگ ، کہ اود ءَ زالبول تھنا لوگ ءَ ناں بلکیں سنگرانی پھریزگ ءَ زانشتی رد ءَ بودناک اَنت۔ ھیروپ ءِ سوبمندی ءَ اے زالبولانی ھون ھما نوکیں بلوچ چاگرد ءِ پیشگال اِنت کہ اود ءَ گھگیری تھنا مردینانی زمہ واری نہ اِنت بلکیں یک سرجمیں راجے ءِ مُچّانکی ، زات ءِ برابری ءَ بُرزتریں سوگندے جوڑ بوتگ۔
آپریشن ھیروپ ءِ پوجی مکسد اگاں جُھلانکی ءَ چارگ بہ بیت گڑا ایشی ءِ دگہ ھم پھناتے دیم ءَ کیت کہ ھیروپ ءَ دژمن ءِ انٹیلیجنس ءُ چاریگی رھبند سرجم ءَ بے سوب کُت ۔ اینچُکیں مزنیں کچّے ءَ یکیں وھد ءَ اُرشانی شوربندی ءُ آیانی سر ءَ سوبمندی ءَ کارگر بیگ ھمے گپّ ءِ دلیل اِنت کہ بی ایل اے ءِ وتی انٹیلیجنس کالب ناں تھنا کاربندیں بلکیں آئی ءِ گور ءَ دژمن ءِ نوکتریں چاریگی رھبند ءَ را چکپروش کنگ ءِ بودشت ھست ۔
جنگی بُندپتر ءَ انٹیلیجنس ءِ سَوائی چہ سلاھانی سَوائی ءَ گیش کارمند بیت، پرچا کہ وھدے دژمن ءَ سما بہ بیت کہ آ وتی گس ءَ ھم پھریز نہ اِنت ءُ آئی ءِ انٹیلیجنس رھبند سرجم ءَ بے سوب اِنت گڑا آئی ءِ ھوسلہ کپ اَنت ۔ ایشی ءِ نفسیاتی سان تھنا گوں یک سپاھی یے ءَ بندوک نہ بنت بلکیں سرجمیں لشکری سروکانی شوربندی ءَ پھریزی دفاعی ) جوڑ کنت ۔ وھدے یک گبزہ گیریں لشکرے پھریز ءِ جاہ ءَ سر بہ بیت گڑا ایشی ءِ متلب ھمیش بیت جنگ ءِ بنداتی شاھیم گھگیری کنوکانی ھک ءَ مٹ بیتگ۔ تُرس ھما دیوال اِنت کہ اُلس ءَ زانشتی ءِ رد ءَ چہ گھگیری ءَ دور دار اِیت بلے وھدے اُلس گوں وتی چماں گند اِیت کہ استان پروش دیگ بیت گڑا آئیءِ دیوال انچیں تْرک زور اَنت کہ آیانی پُر کنگ ءِ گمان ھم کنگ نہ بیت ۔ فینن ءِ ھساب ءَ “گھگیری ءِ مستریں نپسیاتی سان ھمیش بیت کہ آ ایردستیں انسان ءَ آئی ءِ وتی بیگواہ بوتگیں تاکت ءِ سما ءَ دنت ۔” بلوچستان ءَ ھمے کار برجا اِنت وھدے اے مردم گند اَنت کہ دژمن ءِ لشکر وتی مھکمیں بُنجلاں ھم بندیگ بوت بکنت گڑا آ چہ اے نوآبادیاتی ھیال ءَ در کاینت کہ تاکت مدام یک نیمگی بیت نوں بلوچ راج تاکت ءَ استان ءِ میراس سرپد نہ بیت بلکیں آ ایشی ءَ وتی باسکانی اندر ءَ سما کنت۔
آپریشن ھیروپ ءَ میان استمانی رد ءَ بلوچ جیڑہ ءِ بیانیہ ءَ را ھم چہ روتگاں سان مند کرتگ پرچا کہ استان مدام ھمے جھد کن اَنت کہ راجی جُنزاناں تھنا ناشرکاری ءُ سکیورٹی ءِ جیڑہ ءِ داب ءَ دیم ءَ کار اَنت بلے وھدے یک جُنزے چشیں مزنیں ادارھی بودشت ، سیاسی جُھلانکی ، ءُ اخلاقی سَوائی ءَ سھرا کنت گڑا میان استمانی رسانکدر ءُ میان استمانی تجزیہ کارانی پھمگ ءِ بودشت مٹ بیان بیت۔ نوں بلوچستان ءَ پیسرگیں داب ءَ تھنا یک اندری بے ایمنی ءِ داب ءَ پیشدارگ پہ استان ءَ ارزان نہ اِنت پرچا کہ نوں دنیا پہ منّگ ءَ لاچار اِنت کہ اد ءَ یک مھکمیں ، زانشتی ءُ راجی بستار ءِ گھگیری یے بیگ ءَ اِنت کہ آ وتی زمین یک یک انچنائی ءِ ھم وت واجھی ءِ ھک ءَ دار اِیت ۔اے میان استمانی دلگوشی آیوکیں وھد ءَ بلوچی جیڑہ ءَ میان استمانی تلواں یک نوکیں ارزشتے بکش اِیت ءُ دژمن ءِ روزیگی پائدگاں گوں بلوچ ءِ رزامندی ءِ شرت ءَ بندوک کنت۔
کبزہ گیریں پاکستانی لشکر یک بیپاری لشکرے ، آئی ءَ وتی سپاھیگانی ساہ ءِ پرواہ نہ اِنت بلے وھدے اے بیپاری لشکر ءِ روزیگی شھرگ ءَ بلوچ ءِ دزرس مھکم بوت گڑا اے پتلونانی پشت گیجگ ءَ وتی گوستگیں رکارڈ ءِ پروشگ ءَ ھم دیر نہ کنت۔
بُندپتر ءِ پرّگ ھردے کہ چرّ ِانت تہ آ مزن مزنیں بُتاں لپاشان کنت ۔ بلوچ چاگرد ءِ اندری دیمروئی اگاں ھورتی ءَ چارگ بہ بیت گڑا اے گپ گیش اِیت کہ اے جُنز نوں تھنا چہ جزباتی اوگام ءَ در کپتگ سائینسی راستی یے جوڑ بوتگ ۔ وھدے جُنزے ءِ سپاھیگ تھنا مڑوکیں سپاھیگ مہ بنت بلکیں سیاسی ، ءُ ازمی رد ءَ زانتکاریں مردم بہ بنت ، وھدے سرجمیں چاگرد وتی راجی پجّار ءَ نوکیں دابے ءَ پولگ ءَ بہ بیت ، وھدے زالبول وتی راجدپتر ءَ چہ ھوناں نویسگ ءَ بندات بہ کن اَنت، ءُ ھردے تُرس ءِ کوھنیں دیوال بہ پُرش اَنت ھاک بہ بنت گڑا ایشی ءِ متلب تچک بیت کہ یک جھلانکیں راجدپتری کارے وتی آسر ءِ نیمگ ءَ جُنزان اِنت۔ یک پُرمانائیں کردے تھنا ویلے ءِ، یا ھالے ءِ سبب ءَ پھمگ نہ بیت بلکیں اے ھما دیمرئی اِنت کہ آ وھد ءِ ھمراھی ءَ وتی ساناں گیش سھرا کنان کنت۔
پاکستان، دنیا یا لھتے بلوچاں ھم اے گپّ ءِ پھم نیست کہ وھدے یک راجی جُنزے ءَ پیرزال توپک ءَ بڈّ ءَ کن اَنت پہ پدائی ءَ در کپ اَنت تہ اے تھنا اناگھی یا جزباتی ویلے نہ بیت ، اے ھمے گپّ ءِ نشونی اِنت کہ بلوچ چاگرد چہ وتی روتگاں چنچو مٹ بوتگ ءُ آئی ءِ پگری دروشم چونیں جھلانکیں جاھے ءَ سر اِنت ۔
دنیا ءَ یا وت بازیں بلوچے اے گپ ّ اندازگ ءَ جنت نہ کنت کہ آیانی بے کساسیں دیمھونی ءُ گوستگیں داں دھکانی دراج کشیں جُنز ءَ بلوچ چاگرد اندری رد ءَ کجام کساس ءَ مٹ کُتگ ۔ اے اندر ءِ مٹی نوں سھرا بیان اِنت ءُ وھدے یک راجے ءِ سدانی کچّ ءَ ورنا یکیں وھد ءَ پہ مرگ ءَ لڑانی دروشم ءَ در بیا اَنت گڑا چشیں راجے ءِ دیم ءَ اوشتگ پد ءَ دنیا ءِ ھچ وڑیں تاکت ءِ وس ءَ نہ بیت ۔ نوں جُست ایش نہ اِنت کہ اراں بلوچ آجو بیت ، نوں ھکیگیں جُست ھمیش اِنت کہ کدی آجو بیت نوں ایشی ءَ شک نیست ۔ آپریشن ھیروپ ءِ اے ھاسیں شوربندیں سوبمندی ءِ ھکیگیں اسرال ھما پگری ءُ نپسیاتی آشوب ءِ تہ ءَ چیر اِنت کہ آئی ءَ بلوچ سرمچار چہ مرگ ءِ تُرس ءَ آجو کتگ ءُ راجی ھستمندی ءِ زانت ءَ سرچکار کُتگ اَنت۔ ھیروپ ءِ شھید ءُ گازیاں وتی جاناں ندر کنان ءَ بلوچ گھگیری ھما جاہ ءَ سر کتگ کہ آئی ءَ بلوچ گھگیری ءِ دروشم ءُ بستار پہ مُجتی مٹ کت ۔ بُندپتر زانت اے کرداراں تھنا یک ویلے ءِ سپاھیگ ءِ داب ءَ ناں بلکیں یک انچیں شرپمندیں درورے ءِ رد ءَ یاد داشت کنت کہ اے پہ آیوکیں پدریچاں مڈّی جوڑ بنت ۔
نوں وھد اتکگ بلوچ راج اے کربان بیوکیں سرمچاراں آیانی شان ءُ شرپمندی ءَ بہ دار اَنت ۔ ھیروپ ءِ دوئیں فیزانی تہ ءَ ندر بیوکیں ھمک بچ (ھیروپی شھید) ءِ پلگاریں پنّام ءَ گیر آرگ بہ بنت ءُ دژمن ءِ مان میاتکی ءَ را پروش دیگءُ زندگ ءَ واتر بیوکیں ھمک سرمچار (ھیروپی گازی ) ءِ شرپمندیں نام ءَ توار جنگ بہ بنت۔ اے پنام تھنا نام نہ اِنت بلکیں یک اھدے ءِ گواہ اَنت وھدیکہ بُندپتر ءَ بُست کُت تہ بلوچ ءَ چہ وتی ھوناں آجوئی ءِ نوکیں نبشتانکے نویس اِتگ ۔ ھیروپ نوں تھنا یک آپریشنے ءِ نام نہ اِنت بلکیں انچیں مُجتی سیادی یے جوڑ بوتگ کہ پہ آئی ءَ پھربندگ آیوکیں ھمک پدریچ ءِ بھت ءَ کپ اِیت ۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-