روبینہ بلوچ ءُ بھر بلوچ چہ اسلام آباد ءَ زورانسری بیگواہ، بلوچ اسٹوڈنٹس کونسل زوت یل کنگ ءِ لوٹ کتگ

بلوچ اسٹوڈنٹس کونسل اسلام آباد ءَ وتی باسک روبینہ بلوچ ءُ نودربر بھرام بلوچ ءِ زورانسری آوار جنی دلپردی درشان کنان ءَ آئی ءِ زوت پہ سلامتی یل کنائینگ لوٹ کتگ-

درشان ءِ رِد ءَ بلوچ اسٹوڈنٹس کونسل ءِ باسک ءُ بی ایس ماس کمیونیکیشن ءِ چارمی سمسٹر ءِ نودربر روبینہ بلوچ وھدے کہ نودربر بھرام بلوچ دو جولائی ءَ چہ اسلام آباد ءَ زورانسری بیگواہ کتگ-

بلوچ اسٹوڈنٹس کونسل ءِ گوشگ اِنت کہ گوستگیں یک ھپتگے ءِ میان ءَ اسلام آباد ءَ بلوچ نودربر لوگانی سر ءَ بیڑبرتگ، بیھار ءُ تُرسینگ وئیل ءِ تہ ءَ گیشی اتکگ- چریشی ءِ سوب ءَ بلوچ نودربرانی تہ ءَ تُرس ودی بیتگ-

کونسل ءَ روبینہ بلوچ ءُ بھرام بلوچ ءِ زورانسری آوار جنی ایرجتگ گوشتگ کہ آیانی کھول ءَ پسّہ دیگی اِنت ءُ دوئیں نودربراں ھستیں جاورھال ءُ ھند ءِ درگت ءَ زوت سرپدی بدے اَنت-

درشان ءَ انسانی ھکانی گلاں ،وکیل، سیاسی پارٹیاں، سول سوسائٹی ءُ نودربر گلاں چہ لوٹ کتگ کہ آ زورانسری آوار جنی ءُ نودربر نشانگ کنگ ءِ ھلاپ ءَ توار چست بکن اَنت ءُ انسانی ھکانی، کانودی واکدار ءُ بُنیادی آزاتی ءِ پھاز ھاتر ءَ وتی کرد ءَ پیلو بہ کنت-