بلوچستان ءِ مستریں میڈیکل سنٹر سول ھسپتال شال ءَ ڈیوٹی ءِ وھد ءَ زالبولیں ڈاکٹر ءِ سر ءَ تیزاب ءِ ارش کنگ بوتگ کہ ایشی ءِ آسر ءَ ڈاکٹر ماہ نور ناصر سک ٹپیگ بوتگ۔
بنداتی ھالانی رد ءَ آئی ءِ جسم ءِ 70 درسد ءِ کساس ءَ سُتکگ ءُ آئی ءَ را زوتیں دوا ءُ درمان کمک کنگ بوھگ ءَ اِنت۔
پولیس ءِ بنشون ءِ رد ءَ اے وئیل ءَ ھواریں کتکار نادراھجاہ ءَ پرائیویٹ لفٹ آپریٹر ءِ بستار ءَ کار کنگ ءَ بوتگ۔ کتکار وئیل ءَ چہ پد ھما دمان ءَ تچگ ءَ پد پٹ ءُ پولی واکداراں نادراھجاہ ءِ سی سی ٹی وی فوٹیج زرتگ ءُ جتا جتائیں تکاں چہ پٹ ءُ پول برجاہ اِنت۔
وئیل ءَ پد ینگ ڈاکٹر ایسوسی ایشن بلوچستان ءَ تُرندیں لیکہ درشان کتگ ءُ زالبولیں ڈاکٹر ءِ سر ءَ اُرش ءِ تُرندی ءَ ایر جتگ۔ گل ءَ گشتگ کہ ڈاکٹر ءُ میڈیکل اسٹاپ ءِ رکھینگ ءِ ناکامی پدردی انت ءُ اے وئیل سیکورٹی بندوبست ءِ بابت ءَ مزنیں جست ءُ پرس ءِ چست کنت۔
وائی ڈی اے بلوچستان ءَ چہ سرکار، جاندراھی تک ءُ پولیس واکداراں لوٹ کرتگ کہ اے اُرش ءَ ھواریں ملزم زوت دزگیر بہ کن اَنت ءُ کانود ءِ رد ءَ سکیں سزا بہ کن اَنت۔ تنظیم ءَ انسداد ناشرکاری ءِ کانود ءِ رد ءَ جرمدار ءِ ھلاپ ءَ کیس نبشتہ کنگ ءِ لوٹ کتگ ۔
ڈاکٹرانی نمائندہ گل ءَ ھال داتگ کہ اگاں 24 کلاک ءِ تہ ءَ جرمدار دزگیر کنگ نہ بیت گڑا سرجمیں بلوچستان ءَ طبی ھزمتانی بائیکاٹ ءَ ھوار زبردستیں زھرشانی ءِ گامگیجانی سر ءَ ھیال ءُ لیکہ کنگ بیت۔ وائی ڈی اے ءِ گشگ انت کہ اے حکومت ءِ مستریں زمہ واری انت کہ آ زالبولیں ڈاکٹراں ھوار درستیں طبی کارندھاں یک ایمنیں چاگردے ءِ ھاترا دیم ءَ بیار ایت-