شال: ائید ءِ روچ ءَ بیگواھیں مردمانی کھولانی زھرشانی

بلوچستان ءِ بنجاھی شھر شال ءَ مزنیں ائید روچ ءَ زورانسری ءَ بیگواہ کنگ بوتگیں مردمانی کھولانی نیمگ ءَ زھرشانی کنگ بوتگ – اے زھرشانی وائس فار مسنگ پرسنز ءِ چیردستی ءَ کنگ بیتگ-

شال پریس کلب ءِ دیم ءَ برجم داشتگیں زھرشانی ءَ زالبول ءُ زھگاں ھم بھر زرتگ۔ زھرشانی کنوکاں وتی نزیکیں مردمانی اکس چِست کتگ ءُ آھانی سلامتی ءَ یل کنگ ءِ اوگام جتگ –

زھرشانی ءَ گوں تران کنان ءَ گل ءِ چیئرمین نصر اللہ بلوچ، نیاز بلوچ ءُ مزنیں سیاسی رھشون مھیم خان بلوچ ءُ ھمے رنگ ءَ بیگواھیں مردمانی کھولاں ھم وتی ھیال ءُ لیکہ درشان کتگ اَنت۔

زورانسری ءَ بیگواھیں مردمانی کھوکلاں گْوشتگ: وھدے کہ سرجمیں ملک ءَ مردم ائید کنگ ءَ اَنت دومی نیمگ ءَ وتی نزیکیں مردمانی جتا بیگ ءِ سوب ءَ اے روچ ءَ زھرشانی کنگ ءَ لاچار اَنت۔ ایشانی گشگ ءِ رد ءَ سالانی گوزگ ءَ ابید ھم ایشانی نزیکیں مردمانی بابت ءَ ھچ وڑیں سرپدی دیگ نہ بوتگ کہ ایشی ءِ سبب ءَ ایشانی جیڑہ مدام گیش بوھگ ءَ اَنت۔

نصر اللہ بلوچ ءَ مچی ءَ گوں تران کنان ءَ گشتگ کہ منی گل ءِ لوٹ کنت کہ بیگواھیں مردمانی جیڑہ ملک ءِ قانون ءِ رد ءَ گیش ءُ گیوار کنگ بہ بیت، البت آئی ءِ گشگ ءِ رد ءَ سرکار اے بابت ءَ وتی زمہ واریانی پیلو کنگ ءَ بے سوب بوتگ۔

آئی ءَ گوشت کہ ’وھدے کہ سرکار اے جیڑہ ءَ را گیش ءُُ گیوار نہ کنگ ءَ اِنت گڑا ما ایشی ءَ را سول سوسائٹی ءِ گور ءَ برگ ءَ ایں دانکہ آ وتی کرد ءَ پیلو بہ کنت۔‘

آئی ءَ گیش گْوشتگ کہ بلوچستان سرکار ءَ اے ٹاہ داتگ کہ اے جیڑہ فروری ءَ پیش بوتگیں کانود ءِ وسیلگ ءَ گیش ءُ گیوار کنگ بوتگ بلے زمینی راستی ایشی ءِ چپ اَنت۔

آئی ءِ گشگ ءِ رد ءَ آئی ءِ گل ءَ چہ فروری ءَ چہ زورانسعیءَ بیگواہ کنگ ءِ 257 نوکیں کیس نبشتہ کتگ ءُ سرکاری بنجلاں ایوک ءَ کمیں مردم ھست اَنت۔

نسراللہ بلوچ ءَ گْوشتگ کہ گوستگیں لھتیں ماھاں چہ کیمپ ءِ انچارج نیاز بلوچ ءَ را سرکاری واکدارانی تکانسر کنگ بوگ ءَ انت کہ زھرشانی کیمپ بند کنگ بہ بیت۔

زھرشانی کنوکاں لوٹ کتگ کہ دراھیں بیگواھیں مردم زوت پٹ ءُ پول کنگ بہ بنت ءُ ھرکس ءَ ھرچ وڑیں جرمے ءِ تہ ءَ ھوار اِنت آئی ءِ سر ءَ آمیدگس ءِ دیم ءَ آرگ بہ بیت۔