بلوچستان ءِ جتاجتائیں دمگاں شھدگانی ناکہ بندی، مڈی بروکیں گاڑیانی سر ءَ اُرش ءُ لین ٹاور ،پُھل تراکینگ بیتگ اَنت

بلوچستان ءِ جتاجتائیں دمگ نوشکی، مستونگ ءُ ڈیرہ مراد جمالی ءَ سلاہ بنداں شھدگ ءِ سر ناکہ بندی کتگ، مڈی بروکیں گاڑی مانداشتگ اَنت ءُ یک پُھلے ءُ دو لین ءِ ٹاور گوں تراکناکیں شورواں تباہ کتگ اَنت-

گیشیں ھالانی رِد ءَ مروچی سھب ءَ مستونگ ءِ دمگ کانک ءَ شال –تفتان بُنجاھی شھدگ ءِ سر ءَ سلاہ بندیں مردماں کرومائیٹ برؤکیں پنچ گاڑیانی دستیگ کنگ ءَ پد مانداشتگ ءُ تباہ کتگ-

ھمے وڑ مستونگ ءِ دمگ شیخ واصل ءِ ھند آباد ءَ سلاہ بندیں مردماں بُنجاھی پُھل گوں تراکناکیں شورواں تراکینتگ ءُ تباہ کتگ شال – تفتان شھدگ پہ گاڑیانی واستا بند کتگ-

ھمے وڑ نوشکی ءِ دمگ مَل ءَ ھم شال – تفتان بُنجاھی شھدگ سلاہ بندیں مردماں دستیگ کتگ- چمّگدانی رِد ءَ سلاہ بندیں مردمانی مزنیں کچے ءَ بُنجاھی شھدگ سر ءَ ھستیں گاڑیاں پٹ ءُ پول کنگ ءَ اَنت-

دومی نیمگ ءَ گوستگیں شپ ءَ ڈیرہ مراد جمالی شھر نزیک ءَ اوچ پاور پلانٹ ءَ چہ ھمگرنچیں لین ءِ دو بُنجاھی ٹاور تراکناکیں شورواں چہ تباہ کتگ اَنت وھدے کہ یک ٹاورے ءَ تاوان رس اِتگ-

اے میان ءَ پوج ءَ چوکیاں چہ سر ءُ دیم تیرگواری کتگ چریشی ءَ گیش تُرس ودی بیتگ-

اے وئیل انچیں وھدے ءَ دیم ءَ اتکگ اَنت وھدے بلوچ لبریشن آرمی ءَ شال – تفتان آر سی ڈی شھدگ سر ءَ شیخ واصل، کردگاپ، نوشکی ءُ دالبندین ءَ پنچ کاروائیانی زمہ واری منّ اِتگ اَنت-

اے اُرشاں شیخ واصل ءِ ھند سر ءَ مڈی بروکیں بیست گاڑیانی کاروان سر ءَ اُرش ءَ ھوار نوشکی ءَ دو ءُ دالبندین ءَ یک ھندے ءِ سر ءَ ناکہ بندی ھوار اَنت وھدے کہ دالبندین ءَ چہ سیاہ دک پروجیکٹ ءِ سے کارندہ ھم دزگیر کتگ اَنت؛

شیخ واصل، کانک ،نوشکی ءُ ڈیرہ مراد جمالی ءَ بیتگیں اُرشانی زمہ واری انگت ھچ گل ءَ نہ زرتگ اَنت-

گوستگیں روچ ءَ پاکستان پیپلز پارٹی ءِ پارلیمانی سروک صادق عمرانی ءَ بلوچستان اسمبلی ءَ وتی لیکہ درشان کتگ گوشتگ کہ بلوچستان ءَ جاور ھما جاہ ءَ سر بیتگ اَنت کہ وزیر ھم وتی دمگاں تاں پہ گاڑیانی سر ءَ شت نہ کن اَنت-

صادق عمرانی ءَ اسمبلی ءِ بائیکاٹ ءِ بیھار داتگ گوشتگ کہ ریاست ءُ انتزامیہ ایمنی جوڑ کنگ اربانی زر ھرچ کنگ ءَ اَنت بلے اشی ءَ اَبید جاور ھال شر بیگ ءَ نہ اَنت- آئی ءِ رِد ءَ پولیس گندگ نہ بیت وھدے کہ ایف سی کارندہ بیگاہ پنچ ءَ پد وتی بُنجلاں رو اَنت-

آئی ءَ دیمتر ءَ گْوشتگ کہ بلوچستان ءَ ھُزدار، ژوب ءُ نصیر آباد ءِ گچین ءِ شھدگ بند اَنت-